Zerendi aýdandyq polısııa bóliminiń qyzmetkerleri tún jamylyp ańǵa shyǵyp, zań buzǵandardy ustady. Olardyń kóliginen eki elik tabylǵan. Sondaı-aq, tirkelmegen ańshy myltyǵy men 26 oq tárkilendi. En dalanyń erke ańyna sýyq qarý kezengender zań boıynsha jaýap beretin bolady. Bir ókinishtisi, osy tarapta qanshama túsinik jumystary júrgizilip, zań buzǵandar jazaǵa tartylyp jatsa da, el ishinde myltyq asynyp, tabıǵatqa taǵylyq jasaıtyndar aıyldaryn jııatyn emes. Osy aýdandaǵy Aıdabol kólinde zańsyz balyq aýlaǵan Zerendi aýylynyń turǵynynyń áreketi áshkere boldy. Brakoner balyqshydan aq balyqtyń 164 kelisi tárkilendi.
–Zańsyz balyq aýlaýdan tabıǵatqa kelgen zalal 627 myń teńge dep baǵalanyp otyr. Bul is boıynsha materıaldar Zerendi aýdandyq polısııa bólimine jiberildi, – deıdi oblystyq orman sharýashylyǵy jáne janýarlar dúnıesi aýmaqtyq ınspeksııasynyń bólim basshysy Sansyzbaı Ydyrysov, – ákimshilik-quqyq buzýshylyq týraly kodekstiń 393-baby boıynsha shara qoldanylady.
Joǵaryda aıtylǵan eki oqıǵadan kelgen shyǵyn bir jarym mıllıon teńgeden asady eken. Endi myna bir derekke nazar aýdaralyq, oblys aýmaǵynda ótkizilip jatqan «Brakoner» jedel aldyn alý sharasy barysynda balyq aýlaý erejelerin buzǵan 190, zańsyz ań aýlaýdyń 251 oqıǵasy oryn alǵan.
–Nebary 9 kún ishinde 129 zań buzýshylyq anyqtaldy, 20 qarý tárkilendi, – deıdi oblystyq polısııa departamentiniń jergilikti polısııa qyzmeti basqarmasy bastyǵynyń orynbasary Rýslan Mýsaev, – olardyń barlyǵy ákimshilik jaýapkershilikke tartylady.
Bir aptadaǵy zań buzýshylyq deregi osyndaı bolsa, tabıǵattyń en baılyǵyna suqtanǵan «qyzyl kózderdiń» qyrǵynyn kóz aldyńyzǵa elestetýdiń ózi qıyn.
Aqmola oblysy
