75 jyldyq tarıhy bar áıgili dodada talaı myqty veloshabandozdardyń óner kórsetkeni belgili. Bıyl da bul jarystan ataqty sportshylar tys qalǵan joq. Atap aıtar bolsaq, ataqty «Týr de Frans» básekesiniń tórt dúrkin (2013, 2015, 2016, 2017) jeńimpazy, «Ispanııa Výeltasy» (2017) men «Djıro d'Italııa» (2018) dodasynda bir márte dara shyqqan brıtanııalyq Krıs Frým, jýyrda ǵana máresine jetken «Týr de Fransta» ekinshi oryn ıelengen slovenııalyq Prımoj Roglıch, byltyrǵy «Djıro d'Italııa» dodasynyń bas júldesin oljalaǵan ekvadorlyq Rıchard Karapas jáne 2017 jylǵy jeńimpaz Tom Dıýmýlen (Nıderland) jáne taǵy basqa esimderi álemge áıgili veloshbandozdar osy jarystyń kórigin qyzdyrýda.
Atalǵan jarysqa elimizdiń «Astana» velokomandasynyń Aleksandr Vlasov, Ion Isagırre, Gorka Isagırre, Lýıs Leon Sanches, Omar Fraıle, Aleks Aranbýrý, Dmıtrıı Grýzdev jáne Merhavı Kýdýs sekildi sportshylary qatysyp, bas júlde úshin baq synap jatyr. Árıne jankúıerler de, klýb basshylyǵy da bul qurammen jarystyń kóshin bastaý ońaı emes ekenin jaqsy túsinedi. Áıtkenmen London Olımpıadasynyń chempıony Aleksandr Vınokýrov basshylyq etetin ujym «Výeltada» joq degende kezeń jeńimpazy ataný úshin bar kúshin salatyny anyq. О́ıtkeni Ispanııa tas jolynda «Astananyń» jeńispen órilgen dástúrli joly bar. Máselen, 2006 jyly Aleksandr Vınokýrov bastap bergen jeńisti Alberto Kontador (2008) men Fabıo Arý (2015) sátti jalǵaǵan. Sonymen qatar byltyrǵy dodada Mıgel Anhel Lopes pen Iаkob Fýlsang kezeń jeńimpazy atansa, «Astana» komandalyq esepte úzdikter qatarynan kórindi.
О́zge jarystar sııaqty «Ispanııa Výeltasy» da bıyl erekshe jaǵdaıda ótip jatyr. Koronavırýs pandemııasyna baılanysty osy jylǵy barlyq jarys belgilengen ýaqytynan kesh uıymdastyrylǵany belgili. Sondyqtan bıyl birinshi márte veloshabandozdar arasyndaǵy eń mártebeli eki jarys – «Ispanııa Výeltasy» men «Djıro d'Italııa» dodasy tarıhta alǵash ret bir ýaqytta ótkizilip jatyr. Sondaı-aq álemdegi koronavırýstyń ekinshi tolqynyna baılanysty «Výeltaǵa» ádettegiden az komanda qatysyp jatqanyn da aıta keteıik.
Ispanııa tas jolynda ótip jatqan jarystyń alǵashqy kúninde byltyrǵy jeńimpaz – slovenııalyq Prımoj Roglıch (Team Jumbo – Visma) top jardy. Irýn – Arrate qalalaryn jalǵaǵan 173 shaqyrymdyq qashyqtyqty ol 4 saǵat, 22 mınýt, 34 sekýndta basyp ótti. Roglıchten 1 sekýndqa artta qalyp qoıǵan ekvadorlyq Rıchard Karapas (Ineos) pen ırlandııalyq veloshabandoz Denıel Martın (Israel Start-Up Nation) ekinshi jáne úshinshi oryndy ózara bólisti. «Astana» komandasynan birinshi kezeńde jaqsy nátıjege ıspanııalyq Gorka Isagırre qol jetkizdi. Máre syzyǵyn 13-shi bolyp kesken Isagırre jeńimpazdan 51 sekýndqa qalyp qoıdy. Sonymen qatar qalyń toppen birge kelgen «Astananyń» taǵy eki ókili – Lýıs Leon Sanches pen Aleksandr Vlasov 41 jáne 42-oryndarǵa jaıǵasty.
