Brıfıngte departament bastyǵynyń birinshi orynbasary, polısııa polkovnıgi Shamshıddın Ámıtov BAQ ókilderine jyl basynan beri tirkelgen qylmystyq quqyqbuzýshylyq ótken jyldyń osy kezeńimen salystyrǵanda 36 paıyzǵa tómendegenin aıtyp ótti.
Qoǵamdyq oryndarda, kóshelerde jasalatyn qylmystar da azaıǵan. Top bolyp qylmys jasaıtyndar kórsetkishiniń de tómendegeni baıqalady. Qazir oblysta «Ýchaske» jedel profılaktıkalyq is-sharasy ótýde. Qyrkúıekten jeltoqsanǵa deıin sozylatyn sharanyń maqsaty – qylmys pen quqyqbuzýshylyqty boldyrmaý, ýchaskelik polısııa ınspektorlarynyń jáne jalpy ishki ister organdarynyń ımıdji men bedelin kóterý, halyqtyń olarǵa degen senimin arttyrý bolyp otyr.
Osy shara barysynda, barlyǵy 75 myńnan astam páter men jeke- menshik úıler tekserildi. Nátıjesinde, oblys ortalyǵynda 54 páterdiń jalǵa zańsyz berilip jatqandyǵy anyqtalyp, qujattar tıisti organǵa joldandy. Ishki ister organdarynyń esebinde turǵan 4 myńnan asa turǵyn mekenjaılary boıynsha tekserilip profılaktıkalyq jumystar júrgizilipti.
Shamshıddın Egemberdiulynyń aıtýynsha «Ýchaske» jedel profılaktıkalyq sharasynda zańsyz aınalymnan 37 qarý tárkilenip, 7 myńnan astam ákimshilik quqyqbuzýshylyq derekteri anyqtalǵan.
Brakonerlik pen bıologııalyq resýrstar obektileriniń zańsyz aınalymyn anyqtaý maqsatynda 12 qazanda «Brakoner» sharasy bastaldy.
Alǵashqy aptanyń ózinde tabıǵat qorǵaý zańnamalaryn buzǵan 59 derek belgili boldy. Onyń bireýi qylmystyq, qalǵany ákimshilik quqyqbuzýshylyqtar.
Qalalyq polısııa basqarmasy qolǵa alǵan «Qaýipsiz qala» sharasynyń da mańyzy zor. Polıseıler, qalalyq ákimdik, prokýratýra, taýarlar men kórsetiletin qyzmetterdiń sapasy men qaýipsizdigin baqylaý basqarmasy ókilderi, volonterler birlese ótkizgen reıdtiń 2 kúninde 53 quqyq- buzýshylyq anyqtaldy. Qoǵamdyq tártiptiń saqtalýyn qadaǵalaıtyn reıd kezinde karantındik shekteýdiń sheginen shyǵyp ketkender kóp kezdesipti.
– Toı jasap, as berip, týǵan kúnin atap ótetinder áli de tyıylar emes. Bul karantın talaptaryna qaıshy ekendigin bile tura jurtty jınap kesh ótkizetin zań aldynda barlyq adam birdeı ekendigin túsingeni jón. Jalpy, bizdiń departament qyzmetkerleri talapty buzǵan 225 derekti anyqtady. Mobıldi toptarmen birge aralaýda taǵy 334 derek belgili boldy. Osylarǵa baılanysty jınaqtalǵan qujattar tıisti oryndarǵa joldandy, – deıdi departament bastyǵynyń birinshi orynbasary.
О́tken aptanyń sońǵy 2 kúninde 97 zańbuzýshylyq anyqtalsa, sonyń 81-i tyǵylyp toı ótkizgender. Karantın talaptaryn elemegender qatarynda kompıýterlik klýbtar men dúkender de bar.
Oblys ortalyǵynda karantın talaby 143 márte buzylypty. Aýdandarda da eskertýdi elemegender kóbeıip otyr.
Qyzylorda
