"Ulttyq qoǵamdyq senim keńesi qoǵam ókilderi men sarapshylardyń jabyq klýby emes. Bul udaıy jańaryp otyratyn ashyq dıalog alańy. Munda túrli ustanym men kózqaras turǵysynan san alýan pikirler aıtylady. Rotasııanyń negizgi maqsaty da osy. Ulttyq keńeste bátýaǵa kelý qaǵıdaty men ótkir máselelerge degen syndarly kózqaras ornyqqan. Bul bizdiń qoǵamdaǵy ózara pikir almasý mádenıetiniń aıqyn kórsetkishi ári elimizdiń turaqty damýynyń mańyzdy faktory dep sanaımyn", dedi Prezıdent.
Onyń aıtýynsha, indetten týyndaǵan daǵdarys pen álemdegi kúrdeli ahýal kezinde elimizdiń odan ári qarqyndy damýy úshin jańa tásil, tyń serpin qajet.
"Bıylǵy Joldaýymda men barlyq máseleni ashyq aıtyp, ony sheshýdiń naqty joldaryn usyndym. Memlekettik basqarýdyń tıimdiligin kúsheıtý ıdeıasy Joldaýdyń negizgi ózeginde turǵan másele. Jalpy memlekettik basqarý júıesin reformalaý óz aldyna keń aýqymdy mindet. Tipti, bul barlyq reformalardyń qaınar kózi. Memleketti jańǵyrtýdyń basty arqaýy desek artyq emes. Biz bul reformany memlekettik josparlaý júıesin qaıta qurý isinen bastaýdy uıǵardyq", dedi Memleket basshysy.
