Karantın sharalary boıynsha talaptar men shekteýler qadaǵalanady. Olardyń mindeti-qaýipsizdik týraly qajetti aqparatty halyqqa jetkizý. Jalpy reıdter adamdar kóp jınalatyn jerlerde aptasyna bes kún ótkiziledi.
"Monıtorıngtik top kúndelikti óz jumystaryn úzdiksiz atqarýda. Negizgi maqsatymyz – vırýstyń taralýynyń aldyn alý jáne meılinshe ekinshi tolqynnan aınalyp ótý. Monıtorıng barysynda tamaqtaný oryndaryna, saýda ortalyqtaryna, kóńil kóterý oryndary men oıyn klýbtaryna baryp, sanıtarlyq talaptardyń oryndalýyn qadaǵalaımyz", deıdi Nur-Sultan qalalyq jastar saıasaty basqarmasynyń bólim basshysy Aqulan Tastemir.
Eriktilerdiń aıtýynsha, turǵyndar qarapaıym qaýipsizdik erejeleri ózderiniń ǵana emes, jaqyndarynyń da ómirin saqtaıtynyn túsinbeı, keı talaptarǵa beıjaı qaraıdy.
"Qala turǵyndarynda bosańsý baıqalady. Kóp tártip buzýshylyq kóbine túńgi ýaqytta bolady: bı alańdary, tamaqtaný, kóńil kóterý oryndary ýaqytqa qaramaı óz jumystaryn jalǵastyryp jatady. Tipti kompıýterlik klýbtar "jabylǵan" syńaı tanytyp, ishte esh talaptardy oryndamaı jınalyp, oıyn oınap otyrǵan jaǵdaılar da kezdesti. Mundaı jaǵdaıda tıisti sharalar qoldanylady. Turǵyndarǵa barlyq talaptardy aıtyp, túsindiremiz. Keı azamattar bizge rahmet aıtyp, alǵysyn bildirip jatady", deıdi Aqulan Tastemir.
"Birqatar adam ózderimen birge maska alyp júredi, biraq erejege sáıkes qoldanbaıdy. Bizdiń eriktiler olardy toqtatyp, onyń qaýipti ekenin túsindiredi. Deni dereý qatelikterin túzetip, keıde tipti qamqorlyq bildirgenimiz úshin alǵys aıtady", deıdi "Astana Jastary" KMM basshysy Shyńǵys Tileýlın.
Mobıldi toptarda barlyǵy eki júzge jýyq volonter jumys isteıdi.
Eske sala keteıik, elordada 14 qazannan bastap karantın rejımi kúsheıtildi. Bıznes ortalyqtar men oıyn-saýyq mekemeleriniń jumys ýaqyty qysqartyldy. Adamdar maska taǵyp, qashyqtyqty saqtaý kerek.
