Foto avtory: Maksım Zolotýhın
Almaty oblysynyń qala mańyndaǵy aýdandary Almatymen tyǵyz baılanysta damyp keledi. Shetsiz qala baǵdary boıynsha damý standarty ortalyq pen qala mańyndaǵy aýdandardaǵy alshaqtyqty joıýǵa múmkindik beredi.
Almaty qalasynyń ákimi Baqytjan Saǵyntaevtyń Almatyny damytý strategııasy aıasynda «shetsiz qala» qaǵıdasyna erekshe kóńil bóletini belgili, jatyn aýdandardy damytý, megapolıstiń barlyq aýdandarynda turǵylyqty jerine qaramastan halyqtyń joǵary ómir súrý standarttaryn qamtamasyz etýdi maqsat etetin qala basshylyǵynyń tapsyrmasyna oraı Alataý aýdanynda turǵyndar tarapynan burynnan beri birneshe ret kóterilgen kókeıkesti máseleler sheshimin tabýda. Osy oraıda Almaty qalasy óńirlik kommýnıkasııalar qyzmetiniń uıymdastyrýymen ótken baspasóz týry aıasynda Alataý aýdany ákimi Azamat Qaldybekov aýmaqtyń damý barysymen tanystyrdy.
Baspasóz týry barysynda «Halyq únine qulaq asatyn memleket» tujyrymdamasyn iske asyrý aıasynda ashylǵan Alataý aýdany ákimi apparatynyń ǵımaratyndaǵy «Ashyq ákimdik» front-ofısiniń jumysy tanystyryldy. Jobanyń maqsaty – memlekettik organdardyń azamattar úshin qoljetimdiligin arttyrý, kedergisiz orta qalyptastyrý, halyqqa «bir tereze» qaǵıdaty boıynsha qyzmet kórsetý. «Munda abattandyrý, turǵyn úı-kommýnaldyq sharýashylyq, kásipkerlik jáne áleýmettik salany qamtıtyn 4 bólim jumys isteıdi. Sonymen qatar, aýdan ákimdiginiń quzyretine kirmeıtin jer qatynastary, sáýlet jáne basqa qalalyq basqarmalarǵa qatysty máseleler de bar»,- dep atap ótken aýdan ákimi A. Qaldybekov osyǵan oraı mamandardyń jumysy uıymdastyrylyp, aptasyna eki ret qala turǵyndaryn qabyldaıtyndyǵyn jetkizdi.
Aýdanda «Alataý analary» qorynyń úlgisinde halyqtyń áleýmettik-sezimtal toptaryna kómek kórsetetin qoǵamdyq qorlardyń qyzmeti de tanystyryldy. Munda tiginshi, vızajıst, shashtaraz, sánger bolyp 12 maman jumys isteıdi. Qor sonymen qatar áıelder men balalardy tigin isine, kosmetologııaǵa, bıge, mýzykalyq aspaptarǵa úıretýge múmkindik beredi. Kúni búginge deıin 2500-den astam adam oqytylǵan. Sonymen qatar, «Jumyspen qamtý jol kartasy» memlekettik baǵdarlamasy aıasynda júzege asyrylyp jatqan Aqbulaq shaǵyn aýdanyndaǵy skverdi aǵymdaǵy jóndeý jobasy tanystyryldy. Saıabaqta balalar men sport alańdary, jekpe-jek alańdary ornalastyrylyp, ınfraqurylymy turǵyndar yńǵaıyna qaraı jaraqtandyrylǵan. Aýdan ákiminiń aıtýynsha, saıabaqta balalarǵa arnalǵan oıyn alańdary jáne demeýshilerdiń kúshimen sporttyq manej ornatylǵan. Búgingi tańda taekvondo, karate, boks, kúres jáne kýdo sııaqty sport túrlerimen jattyǵýǵa múmkindik bar.
Alataý aýdanynda sonymen birge «Shyńǵa órleý» baǵdarlamasy aıasynda «Dombyra ortalyǵy» áleýmettik nysany ashyldy. Demeýshilerdiń kómegimen ortalyqqa qural-saımandar satyp alynyp, ǵımaratqa jóndeý jumystary júrgizilgen. Búginde ortalyqtan 100 bala dombyra oınaý daǵdysyn meńgergen.
Abbattandyrý barysynda Shańyraq-2 shaǵynaýdany, «Shapaǵat» shaǵyn mańy, sondaı-aq, «Uljan» shaǵyn aýdanyndaǵy sport aımaǵy tanystyryldy. Onda jaqynda fýtbol alańynyń ashylýy ótti. Aýmaqta jattyǵý qurylǵylary ornatylǵan workout aımaǵy bar. Atalǵan nysan bıznestiń áleýmettik jaýapkershiligi aıasynda salyndy. Sonymen qatar saıabaqty jóndeý jumystarymen tanysty. Úsh gektar aýmaqty alyp jatqan aýmaqta balalar, basketbol, workout alańdary ornalasqan. Aýdandaǵy 13 shaǵyn aýdanynda uzyndyǵy 108,2 km bolatyn jańa joldardyń qurylysy júrgizilýde.
ALMATY
