Gúlshat Ahmetqyzy – orta mektepti támamdaǵan soń 1950 jyly Qazaq memlekettik ýnıversıtetinde oqýyn jalǵastyryp, ári myltyq atý sportymen aınalysady. 1952 jyly Qazaqstan qurama komandasy sapyna qabyldanyp, alǵash ret Ýkraınanyń Lvov qalasynda ótken Odaq birinshiligine qatysty. Kelesi, ıaǵnı 1953 jyly ótken taǵy bir resmı jarysta kishi kalıbrli vıntovkamen «MV – B» jattyǵýyn oryndaý barysynda Gúlshat apamyz alýǵa tıis 600 múmkindikten 549 upaı jınap, KSRO sport sheberi normatıvin oryndaıdy.
Úzdiksiz ter tógýdiń arqasynda arada eki jyl ótken soń, ıaǵnı 1955 jyly joǵarydaǵy upaı sanyn 569-ǵa jetkizedi. Bul kórsetkish sol kezde Qazaqstannyń jańa rekordy retinde tirkelgenin aıta ketken jón. Odan keıin 1956 jyly ótken KSRO Halyqtarynyń I spartakıadasynda qazaq qyzdary arasynan tuńǵysh ret erler sapynda óner kórsetip, nysana kózdeýden (600 múmkindikten 587 upaı) óziniń burynǵy rekordyn jańartty.
1957 jyly Odessa qalasynda ótken KSRO chempıonatynda 600 múmkindikten 594 upaı jınap, birinshilikten qola medal aldy. Sondaı-aq jatyp atýdan 200 múmkindikten 200 upaı jınap, taǵy da elimiz rekordyn toqtatty. Bir tańdanarlyq jaǵdaı, osy rekordty áli kúnge deıin eshkim jańartqan joq.
Gúlshat apamyz sporttyq jolynda KSRO jáne QazKSR-niń DOSAAF ortalyq komıtetiniń quramasy sapynda óner kórsetti. 1959 jyldan bastap tóreshilik qyzmetin atqardy. Respýblıka jáne KSRO jarystarynda qazylyq etti.
1961 jyly Máskeýdiń M.V.Lomonosov atyndaǵy memlekettik ýnıversıtetin támamdap, joǵary oqý oryndaryna dáris oqydy. Bilim berý salasynda pedogogıka ǵylymdarynyń kandıdaty ataǵyn qorǵady. «Qurmet Belgisi» ordenimen jáne medaldarmen marapattalǵan.
