Bul jumysty Prezıdent janyndaǵy Memlekettik basqarý akademııasy óz moınyna aldy. Memlekettik qyzmet isteri agenttiginiń tóraǵasy Anar Jaılǵanova Akademııada «A» korpýsynyń memlekettik qyzmetshilerine arnalǵan qaıta daıarlaý kýrstarynyń ashylý saltanatyndaǵy alǵy sózinde bul qadamnyń kásibı, básekege qabiletti basshylardy daıarlaýǵa baǵyttalǵanyn atap ótti. «Atalǵan kýrs Qazaqstannyń Tuńǵysh Prezıdenti – Elbasy N.Nazarbaevtyń qoǵam qajettilikterine basa nazar aýdaratyn, zamanaýı memlekettik apparattyń talaptaryna jaýap beretin basshylardy daıarlaý týraly tapsyrmasyn iske asyrý maqsatynda júrgizilip jatyr», dedi A.Jaılǵanova. Sondaı-aq vedomstvo basshysy N.Á.Nazarbaevtyń «saıası kóshbasshylar saıasatty qalyptastyrady, kásibı memlekettik qyzmetkerler onyń oryndalýyn qamtamasyz etedi» degen sózin basa aıtty.
Kýrsty Memlekettik basqarý akademııasy men Nazarbaev Ýnıversıteti birlese uıymdastyryp otyrǵanyn aıta ketken jón.
«A» korpýsy – bul saıası basshylyq pen oryndaýshylyq býyn arasyndaǵy ózara baılanysty qamtamasyz etýge arnalǵan kásibı basqarýshylyq býyn. Baǵdarlamaǵa memlekettik basqarý, kadr saıasaty, sheshim qabyldaý júıesi tásilderin jáne basqa da birqatar basym máselelerdi ózgertý boıynsha aldyna mańyzdy mindetter qoıylǵan tájirıbeli, qalyptasqan iri qurylymdardyń basshylary qatysady.
Strategııalyq kóshbasshylyq, ózgeristerdi basqarý jáne tıimdi kommýnıkasııalar sııaqty daǵdylar Prezıdenttiń Joldaýynda aıtylǵan mindetterdi jedel jáne sapaly sheshýge kómektespek. Sondaı-aq mamandardyń biliktiligin arttyrý eldegi ekonomıkalyq ósý qarqynyn qalpyna keltirý, halyqtyń ómir súrý sapasyn jaqsartý men memlekettik organdar qyzmetiniń tıimdiligin túbegeıli arttyrý jumysynda da óte ózekti bolyp otyr.
«Memlekettik basqarý men qoǵamdyq damýdaǵy júıeli ózgeristerdiń qazirgi zamanǵy trendteri men joǵary qarqyny eldiń strategııalyq mindetterin tıimdi sheshý úshin ınnovasııalyq jáne ınklıýzıvti oılaý qabileti bar basshylardyń jańa býynyn qalyptastyrýdy talap etedi», dep qorytyndylady A.Jaılǵanova.
