Jas Otan jastar qanatynyń jıyrma jyldyǵyna oraı uıymdastyrylǵan jarys elorda bazarlary men saýda úılerinde jumys isteıtin jastardy jasyl alańda jınady. 12 qazanda bastalǵan jarysta qalanyń saýda úıleri men bazarlarynda jumys isteıtin jas qyzmetkerden qurylǵan on tórt komanda baq synasty.
Saýda bazarlarynyń satýshylary, TJO qyzmetkerleri, ámbebap jumysshylar men kýrerler az ýaqyttyń ishinde fýtbolshylarǵa aınalyp, óz komandalaryn jınaqtap, baq synasty. Úzdikterine kýbok pen aqshalaı syıaqy berildi. Týrnırdiń jalpy júlde qory 600 myń teńgeni qurady. Jarys talaby boıynsha, oıynshylardyń jasy 35-ten aspaýy tıis-ti.
Týrnır qorytyndysy boıynsha, «Esil» saýda úıiniń komandasy birinshi oryndy ıemdense, ekinshi oryndy «Astanalyq» bazarynyń komandasy aldy. Úshinshi oryn «Kók bazar» komandasyna buıyrdy.
Sonymen qatar týrnır barysynda kózge túsken oıynshylar «Úzdik oıynshy», «Úzdik shabýylshy», «Úzdik qaqpashy» atalymdarymen marapattaldy.
«Jalpy týrnır joǵary deńgeıde uıymdastyryldy. Barlyq komandalar myqty boldy. Ár oıyn tartysty ótti. Mundaı týrnırler jıi ótip, júzdegen jasty qalanyń sport alańdarynda jınasa eken deımin. Uıymdastyrýshylarǵa rahmet!», dedi týrnır qatysýshysy Serikbek Kókenov.
Uıymdastyrýshylardyń aıtýynsha, «Dúısenbilik fýtbol-2020» týrnırine eki aı kóleminde respýblıkanyń bes óńirinen 100-den astam komanda qatysqan.
«Týrnır aıasynda 5 óńirde 100 komanda arasynda tartysty oıyndar ótti. Olardyń qorytyndysy boıynsha ár óńir jeńimpazdary anyqtaldy. Týrnır jumysshy jastar arasynda salaýatty ómir saltyn qalyptastyryp, bos ýaqyttaryn tıimdi paıdalanýǵa baýlýdy kózdeıdi. Mundaı sharalar aldaǵy ýaqytta jalǵasyn tabady», dedi Jas Otan jastar qanatynyń jetekshisi Elnur Beısenbaev.
