Ortalyq saılaý komıssııasy 2021 jylǵy 10 qańtarǵa taǵaıyndalǵan Qazaqstan Respýblıkasy Parlamentiniń Májilisi jáne máslıhattary depýtattarynyń kezekti saılaýyndaǵy shet memleketterdiń, halyqaralyq uıymdardyń baıqaýshylary, sheteldik buqaralyq aqparat quraldarynyń ókilderi qyzmetiniń keıbir máselelerine qatysty otyrys ótkizdi. Jıynǵa saıası partııalardyń ókilderi, Qazaqstan Respýblıkasy Syrtqy ister mınıstriniń orynbasary Marǵulan Baımuhan, onlaın rejimde oblystardyń, Nur-Cultan, Almaty jáne Shymkent qalalarynyń aýmaqtyq saılaý komıssııalary jáne buqaralyq aqparat quraldarynyń ókilderi qatysty.
Ortalyq saılaý komıssııasynyń múshesi Anastasııa Shegorsova Qazaqstan kóptegen halyqaralyq uıymdardyń múshesi retinde halyqaralyq baıqaý ınstıtýtyn ashý jónindegi mindettemelerin oryndaıtynyn habarlady. «Shet memleketter men halyqaralyq uıymdardyń baıqaýshylary Ortalyq saılaý komıssııasynyń tóraǵasy men Qazaqstan Respýblıkasy Syrtqy ister mınıstriniń shaqyrýy boıynsha qatysa alady», dedi A.Shegorsova.
Sondaı-aq otyrys barysynda Ortalyq saılaý komıssııasynyń qaýlysy qabyldandy. Onda «Qazaqstan Respýblıkasyndaǵy saılaý týraly» konstıtýsııalyq zańyna sáıkes birqatar ereje bekitilgen.
«Shet memleketter men halyqaralyq uıymdardyń baıqaýshylary Ortalyq saılaý komıssııasy Syrtqy ister mınıstrliginiń usynýy boıynsha akkredıtteledi. Sheteldik buqaralyq aqparat quraldarynyń ókili, eger onyń Syrtqy ister mınıstrligi bergen akkredıtteý týraly kýáligi bolsa, saılaýda baıqaýdy júzege asyra alady. Saılaý týraly konstıtýsııalyq zań sheteldik baıqaýshylarǵa aýdarmashynyń ilesip júrý múmkindigin qarastyrady. Akkredıtteýdi júrgizý daýys berý kúnine bes kún qalǵanda, ıaǵnı 2021 jylǵy 4 qańtarda jergilikti ýaqyt boıynsha saǵat 18.00-de aıaqtalatynyn belgileıdi», dedi A.Shegorsova.
Ortalyq saılaý komıssııasynyń tóraǵasy Berik Imashev halyqaralyq baıqaý ınstıtýtyn ashý týraly sheshim saılaý prosesiniń ashyqtyǵyn qamtamasyz etetinine senimdi.
«Búgin Ortalyq saılaý komıssııasy Parlament Májilisi men máslıhat depýtattaryn saılaýynda halyqaralyq baıqaý ınstıtýtyn ashý týraly sheshim qabyldady. Bul sheshim bizdiń saılaý prosesimizdiń ashyqtyǵy men jarııalylyǵyn qamtamasyz etý turǵysynda halyqaralyq mindettemelerdi qabyldaýymyzdyń rastalýy bolyp tabylady», dedi B.Imashev.
