"Jyl saıyn 15 qyrkúıek pen 15 qarasha aralyǵynda ótetin tirkelý naýqany kezinde egov.kz arqyly úıdiń janyndaǵy emhanaǵa tirkelip alǵam. Jaqynda emhanadan habarlasyp, jasyma qaraı profılaktıkalyq tekserýden ótýge shaqyrdy. Búgin soǵan bardym. Qan qysymymdy ólshedi, holesterın men qant mólsherin tekserdi. EKG-ǵa, mammologqa, gınekologqa jiberdi. Shynymdy aıtsam, osylaı arnaıy tekserilýge shaqyrǵandaryna rahmet, áıtpese áni-mini dep júre beremiz. Jalpy baıqaǵanym, myna MÁMS júıesin engizgeli beri, buryn uzaq kútetin kóptegen medısınalyq qyzmetter qoljetimdi", deıdi Nur-Sultan qalasyndaǵy № 9 emhana pasıenti J.Erlerova.
Esterińizge sala keteıik, Sovid-19 taralýyna baılanysty shekteý sharalary engizilgen kezde emhanalar profılaktıkalyq tekserýler júrgizýdi ýaqytsha toqtatqan bolatyn.
QR Densaýlyq saqtaý mınıstrliginiń № 685 "Profılaktıkalyq medısınalyq qarap-tekserýlerge jatatyn adamdardyń nysanaly toptaryn, sondaı-aq osy qarap-tekserýlerdi ótkizýdiń qaǵıdalary men kezeńdiligin belgileý týraly" buıryǵyna sáıkes, 0-den 18 jasqa deıingi balalar jáne 30-dan 70 jasqa deıingi eresekter skrınıngten ótýi tıis.
Balalar jyl saıyn kámeletke tolǵanǵa deıin profılaktıkalyq tekserýden ótedi. Mektepke deıingi mekemelerdiń tárbıelenýshilerin, mektep oqýshylaryn, orta arnaýly oqý oryndarynyń oqýshylaryn jáne 18 jasqa deıingi stýdentterdi bilim berý uıymdaryndaǵy kóshpeli brıgada tekseredi. Mektepke deıingi mekemelerge barmaıtyn balalardy tekserý emhanada nemese otbasylyq densaýlyq ortalyqtarynda júrgiziledi.
30 jastan 70 jasqa deıingi áıelder úshin tórt jylda bir ret jatyr moıny obyrynyń skrınıngi qarastyrylǵan, oǵan qarap-tekserý men sıtologııalyq zertteý kiredi. 40 jastan keıin eki jylda bir ret áıelderge sút bezi qaterli isigin erte anyqtaý úshin aldyn-ala tekserý jáne mammografııa júrgiziledi.
30-dan 70 jasqa deıingi erler men áıelder eki jylda bir ret ártúrli aýrýlardyń damýynyń minez-qulyq qaýip faktorlaryn erte anyqtaý úshin tekserilýi tıis. Eger dáriger pasıenttiń artyq salmaǵyn, fızıkalyq belsendiliginiń tómendigin, temeki shegetinin nemese qaýipti mólsherde ishimdik ishetinin anyqtasa, onda profılaktıkalyq keńes, minez-qulqyn ózgertý týraly usynystar beriledi, densaýlyqty saqtaý mektebine jiberedi.
40 jastan keıin erler men áıelder eki jylda bir ret arterııalyq gıpertonııany, júrektiń ıshemııalyq aýrýyn, qant dıabetin, glaýkomany erte anyqtaýǵa skrınıngten ótedi.
50-den 70 jasqa deıingi erler men áıelder eki jylda bir ret kolorektaldy obyrdy erte anyqtaý úshin skrınıngten ótýi qajet. Gemokýlt testi arqyly tekseredi. Eger ol oń nátıje berse, naýqas ishektiń kolonoskopııalyq zertteýinen ótýge jiberiledi.
Aıta ketý kerek, profılaktıkalyq tekserýlerdi qarjylandyrý MÁMS qarajaty esebinen júzege asyrylady, sondyqtan skrınıngten ótý úshin saqtandyrý mártebesine ıe bolý qajet. Sonymen qatar, aıta keteıik, memleket 15 jeńildik sanatyna jatatyn 11 mln qazaqstandyq úshin jarna tóleıdi.
