21 qazan kúni saǵat 22.00 shamasynda Qarasaı aýdanynyń Shóladyr taýynan tabıǵatty qorǵaý polıseıleri qoǵam ókilderimen birlesip, eki ańshylyq ıt pen búıir ilmekteri bar shanyshqylar túrindegi arnaıy brakonerlik qurylǵynyń kómegimen borsyqtardy aýlaǵan Qaskeleń qalasynyń 59 jastaǵy turǵynyn ustady. Oǵan tıesili “Nıva” markaly avtokólikti tekserý kezinde tártip saqshylary óltirilgen eki borsyqty, betinde qan izderi bar eki ıtti, sondaı-aq brakonerlik shanyshqylardy tapty.
Ustalǵan adamnyń Almaty oblystyq orman sharýashylyǵy jáne janýarlar dúnıesi aýmaqtyq ınspeksııasynyń ormanshysy bolyp tabylatyndyǵy anyqtaldy jáne qyzmettik mindetterine sáıkes ol brakonerlikpen kúresýge tıis bolatyn. Atalǵan derek QR QK 337-babynyń 4-bóligi (Zańsyz ańshylyq) boıynsha tirkeldi. Tergeý amaldary júrgizilýde.
