Qazaqstandyq boksshy negizi jekpe-jegin qarasha aıynda AQSh jerinde ótkizýi kerek bolatyn. Onyń qarsylasy da belgili edi. Golovkın IBF belbeýiniń mindetti qarsylasy polshalyq Kamıl Sheremetamen (21-0, 5 KO) aıqas ótkizý kerek tuǵyn. Biraq polshalyq boksshynyń promoýteri Andjeı Vasılevskı jekpe-jektiń keıinge shegerilgenin habarlady.
"Biz tikeleı Golovkınniń komandasynan jekpe-jek jeltoqsannyń aıaǵynda nemese qańtardyń ortasynda ótýi múmkin degen aqparat aldyq. Degenmen biz buǵan deıin de mundaı habar alǵan edik.
Bul jaǵdaı boksshynyń ózine bapkerler men proýometerlerge keri áserin tıgizýi múmkin. Biz kezdesýdiń naqty qashan ótetinin asyǵa kútip júrmiz. Kamıl kún saıyn jattyǵý jasap jatyr. Jekpe-jektiń keıinge shegerilgenine ol da ýaıymdap otyr", dep keltiredi promoýterdiń sózin RingPolska.
"Jeltoqsanda AQSh jerinde jankúıerlerdiń qatysýymen jekpe-jek ótkizýge bolady. Múmkin osy úshin de Golovkın kezdesýdi keıinge shegergen shyǵar. Qazir Top Rank kompanııasynyń basshysy Bob Arým bul máseleni sheshýdiń jolyn qarastyryp jatyr", dep jazady basylym.
Negizi Golovkın sharshy alańǵa 2020 jyldyń aqpan aıynda shyǵýy kerek edi. Biraq keıin bul data naýryzǵa aýystyryldy. Degenmen ol kezde jattyǵý barysynda Golovkın jaraqat alyp, jekpe-jek taǵy keıinge qaldy.
Eske salaıyq, Golovkın sońǵy ret sharshy alańǵa 2019 jyldyń qazan aıynda Nıý-Iork qalasynda shyǵyp, ýkraınalyq Sergeı Derevıanchenkony jeńdi. Bul keshte Kamıl Sheremeta da sharshy alańǵa shyǵyp, meksıkalyq Oskar Kortesten ústem tústi.
