Stepnogorsk qalasy ákiminiń shtattan tys keńesshisi Stanıslav Mýhamadıev Bashqurtstannyń Krasnyı Ýrıýsh aýylynyń týmasy. 1970 jyldan beri qushaǵy keń, peıili mol qazaq dalasyn qonys etken. 1976 jyly Selınograd aýyl sharýashylyǵy tehnıkýmyn aıaqtap, tehnık-elektromehanık mamandyǵyn alyp shyqqan. Otan aldyndaǵy boryshyn ótep júrgende boıyndaǵy aıryqsha tyndyrymdy, ár nársege zor jaýapkershilikpen qaraıtyn qasıetteriniń arqasynda rotanyń starshınasy bolyp qyzmet etken. Eńbek jolyn Ereımentaý aýdanyndaǵy «Qazaqstan» keńsharynda óz mamandyǵy boıynsha bastaǵan. Keıin jalyndy jas bilimin jetildirý maqsatynda Selınograd aýyl sharýashylyǵy ınstıtýtynyń syrttaı oqý bólimine túsip, joǵary bilimdi maman atanǵan.
Barlyǵy atqan oqtaı túp-túzý kele jatyr edi. Aldyna qoıǵan maqsaty da oryndalatyn syńaıly. Arman atty tulpardyń jalyna qoly jete bastaǵan shaq. Bilimmen birge tájirıbesi de tolysqan. Onyń ústine aldynan jumys úrkip otyratyn jas mamannyń boıyndaǵy tyndyrymdylyq qasıeti áriptesteri tarapynan oń baǵasyn alǵan. Áıtse de ómir joly bul oılaǵandaı tep-tegis emes eken. Taǵdyr tálkegi talmaý tustan soqqanda «MSÝ-81» kásipornynda jumys istep júrgen shaǵy edi. О́ndiris basyndaǵy aıtpaı kelgen apattan múgedek boldy da qaldy. 1986 jyly birinshi toptaǵy múgedektikke shyǵaryldy.
Qol qýsyryp qarap otyrýǵa bolmas, talpyný kerek dep sheshken. Onyń aldynda kúndi túnge, túndi kúnge ulastyrǵan uıqysyz, kúlkisiz qanshama táýlik ótti. Bir ýaq endigi kúnim ne bolar eken degen sýyq oı sýmańdap, sanasynda turyp alar edi. Kansha oılamaýǵa tyryssa da, áldeqaıdan sap ete túsedi. Júıkesi júndeı tútiletin ýaqyt boldy. Kúnderdiń bir kúninde Stanıslav Fazylzınovıch úmitti úzýge bolmaıtynyn túısingen. Qaıtadan qaıratyna minip, talpyný kerek. Ol úshin ne istegen lázim. Bul tus ótpeli kezeńniń ókpek jeli dúnıeni shaıqap turǵan ýaqyt. I-toptaǵy múgedek túgili on eki múshesi saý, tepse temir úzetin azamattardyń ózi tabys taba almaı, ańtarylyp qalǵan. Osyndaı qıyn ýaqytta qarǵa adym jer muń bolǵan múgedek ne isteı alýy múmkin? Burynǵy mamandyǵyn kóńili qulaı súıgenimen, endi oǵan aspandaǵy aı jaqyn. О́zine laıyq, qolynan keletin, onda da jasaǵan dúnıesine suranys bar bir kásipti ıgerý kerek boldy.
Eger bastap ketse, jerine jetkize isteı alatyndyǵyna kóńili kámil senedi. Eki aıaǵyn qaz basyp júrgende jumysty japyryp tastaıtyn. Sońynan eshkim kúlbiltelep kúmán keltirmeıtindeı etip minsiz atqarýshy edi ǵoı. Táýekel etip tas jutyp, tirshilik qamyn oılamasa bolmaıdy. Sóıtip júrip, turmystyq qyzmet úıimen habarlasyp, úıinde otyryp toqymamen aınalysýdy jón kórdi. Buryn qolǵa alyp kórmegen sharýasy. Áıtse de az ýaqyttyń ishinde bar ynta-jigerin jumyldyrǵan soń táp-táýir meńgerip aldy. Birte-birte kásibı sheberligi tolysty. Boıynda jiger bar edi. Men de myna ómirde bireýge qajet bolsam, bireýdiń kádesine jarasam degen umtylys bar edi. Sol ynta-jigeriniń arqasynda tájirıbesi tolysyp, ótinish aıtýshylardyń talap-tilegine oraı qajetti zattaryn toqyp beretin boldy. Alǵashqyda kúmán keltirýshiler de bolǵan. Keıin eshkim Stanıslav Fazylzınovıchtiń qolynan shyqqan buıymdarǵa syn aıta almaıtyn, qaıta minsiz dúnıege rızashylyq lebizderin bildiretin. Az ýaqyttyń ishinde tóńirektegi el qulaqtanyp, qolqa salatyndar kóptep kelip jatty. Sol sátte kóńili kóterilgen. Áli de halyqqa qajet bolatyndyǵyn uqqan. Sol eńbegi arqyly kúnkóristiń kózin tapty. О́z boıyndaǵy sezimdi ǵana qanaǵattandyrǵan joq, jańa josyqtaǵy súıikti isi arqyly úmit otyn laýlatty, istegen isimen elge jaqty. Tóńirektegi halyq múgedek bolyp qalǵan adamnyń ómirge degen umtylysyn, boıyndaǵy bolattaı berik qajyr-qaıratyn úlgi etip aıta bastady. Toryǵýdyń da, túńilýdiń de jalǵyz emi alǵa umtylý eken. Stanıslav Fazylzınovıchtiń boıynan el ómir úshin kúresken erlikti kórdi.
– 2015 jyldan bastap Stepnogorsk qalasyndaǵy qımyl-qozǵalysynda aqaýy bar qalalyq múgedekter qoǵamyna jetekshilik etip kelemin, – deıdi keıipkerimizdiń ózi, – memlekettik áleýmettik tapsyrys boıynsha qıly-qıly jumystar atqaramyz. 2018 jyldan bastap «Invataksı» qyzmeti jandana bastady. Memlekettik tapsyrmalardy úılestirýshiniń jumysy aýyrlaý. О́ıtkeni múgedek adamdardyń kópshiligi zańdy bile bermeıdi. О́zderine qandaı kómek kórsetilýi kerek, qandaı jeńildikter bar ekendiginen habarsyz. Mine, osy turǵyda kómek kórsetemiz. Taǵdyrdyń jazýymen múgedek bolyp qalǵan adamdardyń jaıyn bálkim biz ǵana túsinetin shyǵarmyz. О́ıtkeni basymyzdan ótkerip otyrmyz ǵoı. Eń bastysy, olarǵa dem berip, qoltyǵynan demep, tirshilikke degen mahabbatyn oıatý. Al onyń jeńbeıtin qıyndyǵy joq, – deıdi ol.
Tabany kúrekteı 36 jyl boıy I-toptaǵy múgedek sanatyndaǵy keıipkerimizdiń pikirinshe, basqa túsken aýyrtpalyqtan arashalaıtyn qudiretti kúsh – eńbek. Tyrbanyp tirshilik etip, tóńiregińdegi adamdarǵa qolǵabysyń tıse, jan dúnıeń jadyrap, rahat bir sezimge bólenesiz. Odan artyq pendege ne kerek?
– Osydan jıyrma jyl burynǵy jaǵdaıǵa qaraǵanda qazir barlyq múmkindik jasalyp otyr, – deıdi ol. – Jańa mamandyqty meńgerýge, óz isińdi bastaýǵa jol ashylǵan. Kýrsta oqısyz ba, trenıngke qatysasyz ba, qalaýyńyz bilsin. Biz de ózimizdiń eńbegimiz arqyly memleketke, otbasymyzǵa paıda keltirýimiz kerek qoı. «Eńbek etkisi kelgen adam jol izdeıdi, eńbek etkisi kelmegen adam sebep izdeıdi». Osy sózdi jıi aıtamyn. Uqqan jan umtylsa eken deımin.
Shynynda da, qanshama qıyndyqty basynan keshirse de, qaırat-jigeri muqalmaǵan qajyrly jannyń sózinde jan bar-aý.
Aqmola oblysy,
Stepnogorsk qalasy
