Oblystyq qoǵamdyq densaýlyq basqarmasynyń basshysy Marat Pashımov óńirde koronavırýs ınfeksııasynyń yqtımal beleń alý jaǵdaılary eskerile otyryp, medısınalyq uıymdarda 6 myńǵa jýyq tósektik orynmen qamtý qarastyrylǵanyn aıtady.
«Aýrýhanalarda materıaldy-tehnıkalyq baza jaqsartyldy. О́kpeni jasandy tynystandyrý apparattarynyń sany 65 paıyzǵa artty. Sonymen qatar qýattylyǵy myqty 80 oksıgen apparaty alyndy. Ottegi konsentratorlarynyń sany 900 birlikke jetip, búginde ósim 95%-dy qurap otyr. Qosymsha 5 rengten jáne 1 kompıýterlik tomograf apparattaryn aldyq. Aýrýhana aımaqtarynan salynǵan ottegi stansalary da eki esege artty. Kórshi eldermen shekaralas Saryaǵash pen Maqtaaral aýdandarynda karantındik stasıonarlyq oryndardy daıarlap qoıdyq. Budan bylaı shekaradan ótken árbir azamattyń qolynda COVID-19 ınfeksııasyna tekserilgen analız qorytyndysy bolýy tıis. Bolmaǵan jaǵdaıda jergilikti dárigerler olardan analız alyp, stasıonarǵa jatqyzady. Dál qazirgi ýaqytta Saryaǵashtaǵy stasıonarda 10 azamat jatyr. Jalpy, oblys kóleminde naýqastarǵa arnalǵan 6500 tósektik-oryn daıyn tur. Barlyq mekemelerde 2-3 aılyq dári-dármek qory jasaqtalǵan. Qazir oblysta epıdemııalyq ahýal turaqty, ınfeksııalyq stasıonarda eki naýqas em qabyldaýda. Olardyń jaǵdaıy turaqty», deıdi M.Pashımov.
Oblystyń bas dárigeri sondaı-aq jyl sońyna deıin 122 jedel járdem kóligi beriletinin jetkizdi. Iаǵnı óńirdegi jedel járdem kólikteri 100 paıyz jańarady. Odan bólek jaqyn kúnderi 12 jyljymaly medısınalyq keshen óńirdiń shalǵaı aýyldaryna baryp qyzmet kórsetpek. Medısınalyq avtokeshen ÝDZ, rentgen apparattary, zerthanamen jabdyqtalǵan. Aýyl turǵyndary munda analız tapsyryp, dárigerlerdiń tekserýinen óte alady.
Alǵashqy tolqynda 1400-ge jýyq pasıentti emdep, koronavırýs juqtyrǵan júkti áıeldi de aman-esen bosandyryp alǵan Kentaý qalalyq aýrýhanasy da naýqastarǵa sapaly medısınalyq kómek kórsetýge daıyn. Aýrýhananyń bas dárigeri Gúlbaný Syzdyqova 580 oryn ázir turǵanyn aıtady. «Búginde oblys boıynsha 8 ottegi stansasy iske qosylǵan. Sonyń biri osy Kentaý aýrýhanasynda ornalasqan. Stansany jergilikti mesenat Bekbolat Bekenov óz qarajatyna salypty. Quny 60 mln teńgelik stansa táýligine 250 ottegi ballonyn toltyra alady. Qajet bolǵan jaǵdaıda ózge de mekemelerdi ottegimen qamtamasyz ete alamyz», deıdi bas dáriger.
«Naýryz aıynan bastap oblystyq qoǵamdyq densaýlyq basqarmasy tarapynan 75 mln teńgege deıin dári-dármek berildi. Aýrýhanada 10 dana ókpeni jasandy tynystandyrý apparaty, 47 ottegi konsentratory bar. Elý tósektik orynǵa arnalǵan ınfeksııalyq gospıtal naýqastardy qabyldaýǵa tolyǵymen daıyn. Bizde maman tapshylyǵy joq. Jalpy, 520 medısına qyzmetkerimiz bar. Onyń 57-si dáriger, 220 orta býyndy qyzmetker», deıdi Gúlbaný Jumaǵalıqyzy.
Al Arys qalalyq ortalyq aýrýhanasy jeke qorǵanys kıimderi men dári-dármektiń eki aılyq qorymen qamtamasyz etilgen. Jansaqtaý bóliminde 9 ókpeni jasandy tynystandyrý apparaty, qosymsha 50 ottegi oksıgeneratory jáne basqa da qajetti medısınalyq qural-jabdyqtar ornatylǵan. Qanda otteginiń qanshalyqty qanyqqanyn anyqtaıtyn pýlsoksımetrdiń 144 danasy alynǵan. Osy quraldyń kómegimen dárigerler naýqastyń jaǵdaıy qanshalyqty aýyr nemese qanaǵattanarlyq ekenin anyqtaı alady. Satýrasııasy 93-ten tómen pasıentter birden jansaqtaý bólimine jatqyzylady eken. Aýrýhanada 40 provızorlyq tósektik oryn men 20 naýqasqa arnalǵan ınfeksııalyq gospıtal daıyn tur. Jalpy, qazir Arysta koronavırýs ınfeksııasymen kúreske jumyldyrylǵan 19 mobıldi top halyqqa qyzmet kórsetýde.
Ordabasy aýdandyq aýrýhanasy da indettiń ekinshi tolqynyna daıyn. Emdeý mekemesi jeke ottegi stansasy, 23 ókpeni jasandy tynystandyrý apparatymen jasaqtalǵan. Aýrýhananyń eski ǵımaratyn tolyq jóndeýden ótkizgen ujym endi koronavırýs ınfeksııasyn ózderi anyqtaı alady. Sebebi munda indetti anyqtaıtyn zerthana iske qosyldy. PTR synamasy boıynsha anyqtaıtyn zerthananyń táýligine 500-ge jýyq test qabyldaýǵa múmkindigi bar. Aldaǵy ýaqytta Arys qalasy men Báıdibek aýdandarynan synama qabyldaý josparlanýda. Oblys boıynsha mundaı 12 zerthana jumys isteýde.
О́ńirde búginde halyqqa qyzmet kórsetip júrgen 23 429 medısına qyzmetkeriniń 5 myńnan astamy – dáriger, qalǵandary – orta býyn mamandary. Statıstıkalyq derekterge súıensek, Túrkistan oblysynda – 31, Shymkent qalasynda 21 aq halatty abzal jan pandemııa kezinde ajal qushqan.
Taıaýda «Ońtústik» medısına qyzmetkerleri qaýymdastyǵy» qoǵamdyq birlestiginiń uıymdastyrýymen pandemııa kezinde kóz jumǵan medısına qyzmetkerlerine qurmet kórsetilip, «Dárigerler alleıasyndaǵy» taqtaıshalarǵa gúl shoqtary qoıyldy. Shymkent qalasyndaǵy Abaı saıabaǵynda ornalasqan О́teýboıdaq Tileýqabylulynyń eskertkishi aldyna jınalǵan qaýym bir mınýt únsizdikpen dárigerlerdi eske alyp, Quran baǵyshtady. Túrkistan oblysy jáne Shymkent qalasyndaǵy medısına mekemelerinde qyzmet etip, jumys barysynda qaza tapqan aq halattylardyń et jaqyndary men týystary dáriger anty jazylǵan taqtaısha aldyna gúl shoqtaryn qoıdy. Uıymdastyrýshylardyń aıtýynsha, is-shara qyzmet babynda aýrýdan kóz jumǵan medısına qyzmetkerlerine qurmet kórsetý maqsatynda ótkizilip otyr. Sondaı-aq ul-qyzdary nemese ata-analary olardy maqtan etip, erlikke para-par eńbekterin baǵalap júrsin, týystaryna rýhanı demeý bolsyn degen nıetpen arnaıy medaldardy qaza tapqan medısına qyzmetkerleriniń týystaryna berý uıǵarylypty. Bul oraıda, «О́mir úshin», «Altyn dáriger» jáne «Meıirim» medaldary tabys etildi. Mysaly, Ordabasy aýdandyq aýrýhanasynda 35 jyl tapjylmaı meıirbıke bolǵan Orynkúl Quralbekovanyń «Meıirimin» qyzy Elmıra alýǵa kelipti.
«Anamnyń qazasy júregime qatty batty. Meni de jastaıymnan medısına salasyna baýlyǵan anam edi. Qazir anamyń izin qýyp, sol aýrýhanada qyzmet etip júrmin. Pandemııa kezinde terapııa bólimine naýqastar óte kóp tústi. Anam eńbek demalysyna da sol úshin keshigip shyqty. Jumys barysynda keıde úzilissiz jumys istep júrdi. «Naýqas kóp, al maman jetispeıdi. Sondyqtan men jumysta bolýym kerek» dep isine adaldyq tanytty. Maýsym aıynda medısına qyzmetkerleri kúninde oblys ákimi О́mirzaq Shókeevtiń Alǵys hatyn alǵan bolatyn. Sol kúni aýyryp, mazasy bolmaı turǵan. Bul onyń kózi tirisinde alǵan sońǵy marapaty ekenin qaıdan bileıik. Úsh kúnnen keıin anam aýyryp, qaıtys boldy», dep kózi jasaýraǵan Elmıra Qorǵan anasynyń eńbegin baǵalaǵan uıymdastyrýshylarǵa alǵysyn bildirdi.
Sondaı-aq qoǵamdyq birlestik ókilderi koronavırýstan kóz jumǵan medısına qyzmetkeleriniń ómiri men qıyndyqqa toly qyzmet joldaryn baıandaıtyn elektrondy kitap ázirlep jatqandaryn jetkizdi.
Aıta ketelik, aq halatty jandardyń eren eńbeginiń nátıjesinde óńirde qaýipti indetti juqtyrǵan 3 331 naýqas tolyq jazylyp shyqqan. Jalpy, sońǵy málimetterge sáıkes pandemııa beleń alǵaly oblysta COVID-19 ınfeksııasy rastalǵan 3 395 jaǵdaı tirkeldi. Olardyń 2 355-inde aýrý sımptomsyz ótken.
Túrkistan oblysy
