Atalǵan máselege Jambyl oblysynyń ákimdigi tarapynan shara qabyldanyp, Tarazdaǵy iri saýda oryndarynda nan qaıtadan 85 teńgeden satyla bastady. Alaıda, qala aýlalaryndaǵy shaǵyn dúkenderdiń keıbirinde nan 5-10 teńgege qymbat satylýda eken.
Taraz qalasynda negizgi 6 naýbaıhana jumys isteıdi. Onyń ishindegi 5 naýbaıhana ıeleri baǵany kóterý týraly sheshimge kelgen. Olar as atasynyń qymbattaýyn elimizdiń soltústik óńirlerinen keletin un baǵasynyń ósimimen túsindirýde. Bul rette oblys ákiminiń orynbasary Berik Nyǵmashev jergilikti turǵyndardy sabyrǵa shaqyryp, jaǵdaıdyń retteletinin jetkizdi.
Onyń aıtýynsha, monıtorıng kezinde birqatar nan óndirýshilerdiń nan baǵasyn 85 teńgeden 95 teńgegedeıin ósirgeni anyqtalǵan. «Qazir jedel shtab munyń qanshalyqty qısyndy ekenin anyqtaý maqsatynda tekseris júrgizýde. Jergilikti bılikpen aqyldaspaı áreket etken kásipkerler jaýapqy tartylady», dedi ol. Tıisti monıtorıng jumystary monopolııaǵa qarsy jáne salyq organdarymen birlese júrgizilýde eken. Bul oraıda, Berik Nyǵmashev nan baǵasy birneshe faktorlarǵa baılanysty ekenin aıtty. «Biraq eń negizgisi unnyń baǵasyna kelip tireledi. Al, qazir unnyń quny 115 teńgeden 130-140 teńgege deıin ósip ketken», dedi ákimniń orynbasary. О́tken jyly da osy ýaqytta nan baǵasy ósken bolatyn. Sondyqtan da bıyl nan baǵasyn ustap turýǵa baǵyttalǵan aldyn alý sharalary qabyldanyp, naýbaıhanalarǵa un naýryz aıynan qazan aıyna deıin turaqtandyrý qorynan tómen baǵamen berilgen. Qazir turaqtandyrý qorynda 500 tonna un bar. Qosymsha taǵy 2000 tonna un alynady. Oblys ákimi áleýmettik mańyzy bar taýarlar, onyń ishinde nannyń baǵasyn negizsiz ósirýge jol bermeýdi tapsyrdy. Biz jaǵdaıdy turaqtandyrý úshin barlyq sharalardy qoldanatyn bolamyz. Qajetti resýrstarymyz jetkilikti. «Taraz» áleýmettik-kásipkerlik korporasııasy un satyp alyp, nan óndirýshilerge tómendetilgen baǵamen usynbaq», deıdi Berik Nyǵmashev. Alaıda onyń aıtýynsha, Taraz qalasyndaǵy nan baǵasy ózge óńirlermen salystyrǵanda arzan. Sonymen qatar, «Taraz» áleýmettik-kásipkerlik korporasııasynyń áleýmettik dúkenderinde nan 55 teńgeden satylýda.
Jambyl oblysy
