Elordadaǵy oıynda Qazannyń «Ak Bars» komandasynan 3:1 esebimen jeńilgen «Barys» bul joly da syrt aıdynda dál osyndaı nátıjemen «Sıbır» hokkeıshilerine ese jiberdi. Kezdesýdiń birinshi kezeńinde ádettegideı esep ashylǵan joq. Ádettegideı dep ekpin berýimizdiń sebebi, «Barystyń» keıingi tórt oıynynyń barlyǵynda komandalar bir-biriniń birinshi kezeńde qaqpasynan sańylaý taba almaı keledi.
Ekinshi 20 mınýtta jerlesterimizge qaraǵanda, muzaıdyn ıeleri shıraq qımyldap, belsendi oıynymen kózge tústi. Nátıjesinde, kezdesýdiń 24-mınýtynda esep ashty. Shaıba avtory – Nıkıta Shashkov. Dese de, «Barystyń» qarymta shaıbasy kóp kúttirgen joq. Maýsymaralyq úziliste elordalyq klýbtyń jeıdesin kıgen shvesııalyq Iаkob Lılıa 32-mınýtta mergendigimen kózge túsip, tarazy basyn teńestirdi. Turaqty birinshilikte 14-shi oıynyn ótkizgen shabýylshy nebary 4-shi shaıbasyn soqty. Ázirge ol komandanyń da, jankúıerlerdiń senimin aqtaı alar emes.
Ekinshi kezeń aıaqtalǵanǵa deıin «Sıbır» oıynshysy Egor Mılovzorov komandasynyń ekinshi golyn soǵyp, jaqsy kóńil-kúımen úziliske shyqty. Úshinshi kezeńde esepti teńestiremiz dep alǵa umtylǵan qazaqstandyq komanda qorǵanysty umyt qaldyrdy. Nátıjesinde, básekeniń sońǵy mınýtynda muzaıdyn qojaıyndary úshinshi shaıbasyn soǵyp ketti. Bul joly Oleg Lı óz atyn tabloǵa jazdyrtty.
Endi jerlesterimiz syrt aıdyndaǵy ekinshi oıynyn búgin Sochıdiń «Sochı» komandasymen ótkizedi. Keıin elordaǵa oralyp, óz jerimizde «Kýnlýn» jáne «Dınamo Rıga» klýbtaryn qabyldaıdy.
