Prezıdenttik mádenıet ortalyǵynda qazaqtyń birtýar perzenti, Alashtyń ardaqty azamaty, qoǵam qaıratkeri, aqyn, jazýshy, kósemsózshi Mirjaqyp Dýlatovtyń 125 jyldyq toıyna arnalǵan saltanatty kesh bolyp ótti. Keshti Mádenıet mınıstri Muhtar QUl-MUhammed sóz sóılep ashty.
Mirjaqyp Dýlatulynyń ómiri men shyǵarmashylyǵy jaıynda arnaıy túsirilgen “Urpaqqa amanat” atty beınefılm kórermenderge usynylǵannan keıin ortaǵa shyqqan mınıstr: “Ár qazaqtyń júreginen oryn alǵan, halqyna “Oıan, qazaq!” dep uran tastaǵan Mirjaqyp muralary halqymen birge jasaı bermek. Aıaýly tulǵanyń mereıtoıynyń Prezıdenttik mádenıet ortalyǵynan bastalǵany úlken toıdyń bastaýy bolady dep senemin”, – dedi. Munan keıin kesh tizginin júrgizýdi Prezıdenttik Mádenıet ortalyǵynyń dırektory, professor Myrzataı Joldasbekov aldy. Ǵalym Mirjaqyp muralaryna birshama toqtala kele, ótken jyly Gúlnár Mirjaqypqyzynyń atalmysh ortalyqtyń murajaıyna ákesiniń udaıy ústinen tastamaǵan shekpenin tapsyrǵanyn jáne sol shekpendi kórermen nazaryna usynatyndyǵyn aıtty. HH ǵasyrdyń basyndaǵy qazaqtyń aǵartýshylyq, demokrattyq baǵyttaǵy oqyǵan azamattardyń biri, talantty qalamger, qoǵam qaıratkeri Mirjaqyp Dýlatov edi. Alash azamattarynyń aýmaly-tókpeli zamanda eldiń bolashaǵy úshin atqarǵan kúreske toly qoǵamdyq-saıası qyzmeti, aǵartýshylyq-shyǵarmashylyq mol murasy – qazaq úshin baǵa jetpes qymbat qazyna. Al onyń esimi halqy úshin aıaýly, eline qurmetti bolyp máńgilik jasaı beredi. Mirjaqyp qoǵamda da, ádebıette de halqynyń táýelsizdigin birinshi kezekke qoıǵan jan. Ol óz shyǵarmalarynda týǵan elin oıatýǵa umtyldy. “Alash” qozǵalysynyń belsendi qaıratkeri boldy. Keńes zamanynda M.Dýlatovtyń esimi men ádebı murasy týraly aıtýǵa da, jazýǵa da tyıym salyndy. Elimiz óz táýelsizdigin alǵan tusta ǵana Mirjaqyp halqyna qaıtyp oraldy. Esimi de, shyǵarmashylyq murasy da tolyq aqtalyp, ol búgingi urpaqtyń qolyna jetip otyr. Kesh barysynda Bekbolat Tileýhan, Seken Turysbekov, Ǵazıza Jumekenova bastaǵan óner sheberleri jáne Astana qalasynyń memlekettik fılarmonııasynyń kameralyq hory óz ónerlerin ortaǵa saldy. Ábdirahman QYDYRBEK.
