Jol kartasymen bólingen kúrdeli jóndeý jumystaryn «Nur-shapaǵat qurylys» JShS atqaryp jatyr. Merdigerler búginde nysannyń ishki jumystaryn 100 paıyzǵa aıaqtaǵan. Endi aýlasyndaǵy abattandyrý-kógaldandyrý, jaryq shamdaryn ornatý sharýalary qaldy. Tozyǵy jetken mekemeni bıylǵa deıin qys kezinde jylytý biraz másele bolǵan. Jańartylýy kezinde jylytý jaǵyna basa mán berilýde.
– Jylytý peshin syrtqa shyǵardyq. Elektr júıeleri 95 paıyzǵa jańardy. Esik-terezeleriniń 90 paıyzy qoıyldy. Jylý júıesi 100 paıyz daıyn. Aýyz sý jáne káriz júıesi jasaldy. Sonymen qatar seısmokúsheıtý jumystaryn júrgizip jatyrmyz. Qazirgi tańda jumysshy kúshi jetkilikti. Jospar boıynsha qarashada nysandy aıaqtap ótkizemiz, – deıdi merdiger mekemeniń proraby Aıdyn Jaıshybekov.
«Jumyspen qamtýdyń jol kartasy» boıynsha jańartylyp jatqan joba quny – 958 mln teńge. Merdigerler qurylysty mamyrdyń ortasynda bastaǵan. Sodan beri 178 jergilikti turǵyn jumysqa tartylyp otyr. Bastamanyń basty maqsaty – aýyldaǵy eki qolǵa bir kúrek izdegen azamattardy jumysqa tartý bolǵan. Osy rette mundaǵy jumysshylardyń aılyq jalaqysy 85 myńnan 200 myń teńgege deıingi aralyqta berildi. Dál qazirgi kúni qurylystyń birshamasy aıaqtalýyna baılanysty 45 myń teńgege jumys istep jatyr. Mekteptiń parta-taqta, kabınetteri, synyptardyń materıaldyq-tehnıkalyq bazasy tolyǵymen jańartylady. Bul maqsatqa jobadan bólek, 23 mln teńge qarjy bólingen.
Shırek ǵasyrlyq tarıhy bar bilim shańyraǵy 1 172 orynǵa laıyqtalǵan. Shaǵyn ortalyǵymen qosqanda búginde 750 bala tárbıelenip jatyr. Pandemııa jaǵdaıyna baılanysty oqýshylar tolyǵymen úılerinde oqytylýda. Jańa oqý jylynda kópbalaly, az qamtylǵan, muqtaj otbasy balalaryna mektep tarapynan 20 noýtbýk-smartfondar úlestirilip berildi. Aıta ketken jón, keler jyly aýdanda qos mektep tabıǵı gazǵa qosylady. Jambyl jáne Hamraev orta mektepterine kógildir otyn jetkizý úshin búginde jobanyń smetalyq qujattamalary ázirlený ústinde.
Penjim aýylyndaǵy jańa ambýlatorııanyń salynýyna jol kartasy negiz boldy. Aýyl turǵyndarynyń ıgiligi úshin irgetasy qalanyp jatqan nysan – 50 oryndyq. 7 myńǵa jýyq halqy bar eldi mekende búginge deıin zamanaýı jańa emdeý mekemesi bolmaǵan. Basy aýyryp, baltyry syzdaǵan aýyldaǵy aǵaıyn shaǵyn dárilerlik ambýlatorııany jaǵalap keldi. Endi mine, kóp uzamaı qarasha aıynan bastap jańa keshenge keletin bolady. Mundaǵy basty erekshelik – ishindegi qondyrǵylar, materıaldyq-tehnıkalyq baza jańa zamanǵy jabdyqtarmen qamtamasyz etiledi. Ázirge, 4 dáriger qyzmet kórsetedi dep josparlanǵan. «Nur-shapaǵat qurylys» JShS 30 qarashada nysandy tolyqtaı el ıgiligine beremiz dep bilek sybanyp otyr. Búginde jalpy jumystyń 70 paıyzy bitken. Ambýlatorııa ǵımaratynyń qurylysyn salýǵa 259,2 mln teńge bólingen. Munymen qosa, aýdanaralyq kópsalaly aýrýhanany abattandyrý jumystary 52,8 mln teńgege atqarylýda.
