Kentaýlyq azamattar Prezıdentke aryzdandy (Al qala ákimi olardyń ýájimen kelispeı otyr)

Eki taraptyń ýájin saralaı otyryp, qaladaǵy máseleler jergilikti ákimdik pen turǵyndar arasynda talqylanbaǵan, ıaǵnı qoǵamdyq dıalog, ashyqtyq, adam­dardyń muń-muqtajyna jedel nazar aýdarý syndy memlekettik organdar qyzmetiniń negizgi basymdyqtary tıisti deńgeıde oryndalmaǵan ba degen oıda qaldyq. Retimen baıandasaq.

Kentaý qalasynyń turǵyndary: Soǵys jáne eńbek ardagerleri keńesiniń tóraǵasy О́.Pýkashevtiń, eńbek múge­degi, qalalyq Ardagerler keńesi, qala­lyq Qoǵamdyq keńestiń múshesi R.Nu­ryl­lanyń, qalanyń qurmetti azamaty, Qazaq KSR-iniń eńbek sińirgen me­tal­lýrgi S.Qambarovtyń Prezıdent Qasym-Jomart Toqaevqa jazǵan aryzyn oqyp shyqqanda alǵashynda Kentaý qalasynyń ákimi Dáýren Mahajanov qyz­metine kelgeli eldiń pikirimen sa­nas­paı, zańdy belden basyp, sybaılas jemqorlyqqa jol berýde me degen pikir de týyndaıdy. Máseleniń mán-ja­ıyna qaraǵanda, byltyr aryzdanýshy­lar Dáýren Mahajanovtyń jeke qa­byldaýyna kirip, ótinish aıtqan. Olar sereb­raldy sal aýrýymen (DSP) aýyratyn balalar men jasóspirimderge arnap ońaltý ortalyǵyn ashý jóninde ­jos­par jasalǵanyn aıtyp, oǵan qaladaǵy bos ǵımarattardyń birin senimgerlik basqarýǵa, keıinirek óteýsiz berýdi su­ranǵan. О́tinish hat tapsyrǵan. Ákim orynbasary B.Alımbetov pen qarjy bó­liminiń basshysy I.Azızbaevqa Pýsh­kın kóshesi №28 mekenjaıdaǵy ǵıma­rattyń qujattaryn daıyndaýdy júk­tegen. Aryzdanýshylardyń jazýynsha, keıinirek «Paryz» múgedekter qoǵamyna beriledi degen ǵımaratty D. Mahajanov basqa kásipkerge satyp jibergen.

Aryzdyń jazylýyna negizgi sebep bolǵan osy jaıt ekendigi aıdan anyq. Biraq shaǵymdanýshylar ózde­ri­niń Prezıdentke jazǵan hatynda qala­daǵy basqa da máselelerge keńinen toq­talypty. Soǵan súıensek, ákim bolyp kelgen D.Mahajanov «Táýelsiz Qazaq­stannyń 20 jyldyǵyna» qoıylǵan es­kertkishti demontaj jasap, Tóle bı kó­shesin Ál-Farabı kóshesine deıin ashýǵa ýáde bergen. Bul másele Qoǵamdyq ke­ńes­te, Ardagerler keńesinde, máslıhatta birneshe ret qaralypty. Alaıda ákim búginge deıin keńester men de­pý­tattar usynysyn oryndamaı jal­taryp kele jatqanǵa uqsaıdy. My­na bir faktige nazar aýdaralyq. Aryz­daný­shylardyń jazýynsha, ákim 75 mln teńgeni sybaılastyq jolmen A.Jar­bolov degen azamatqa aýdaryp, isi sotta qaralyp jatqanyna qaramastan ózi­­niń naǵashy týysy D.Muhamedıevti jer qa­tynastary bólimine basshy etip taǵa­ıyndapty. D. Mahajanov eshkimmen aqyl­daspaı ózimbilermendikpen «Altyn adam» monýmentin buzdyryp, sonyń daıyn turǵan betondalǵan tuǵyryna Abaıdyń eskertkishin qoıypty. Sebebi ákimge qurylystan «aqsha jeý» úshin «Altyn adam» astyndaǵy daıyn temir-beton tuǵyr kerek bolǵanǵa uqsaıdy. Mahajanov qyzmetine kele salysymen «Tazalyq-Kentaý» mekemesin talqandap, tender ótkizip, barlyq qarjyny ózimen ilese kelgen fırmalarǵa berip jiberipti. Qalanyń negizgi tirek kásiporny bolǵan, 2012 jyly modernızasııalanǵan ken baıytý fabrıkasy ákimniń qupııa qol­daýymen talan-tarajǵa túsip, metallalom bolyp satylyp jatyr eken. «Bul ózekti máseleni kóterip kásibı mamandar, kombınat ardagerleri, máslıhat depýtattary qala ákimi D.Mahajanovqa birneshe ret kirdik, biraq nátıje keri­sinshe bolyp shyqty. Qala ákimi D.Ma­hajanovqa qalanyń máselesin aıtyp kirý degen aqyrettiń isi, oryssha ári barynsha dóreki adam», dep jazǵan aryzdanýshylar Soǵys jáne eńbek ardagerleri keńesiniń tóraǵasy О́mirbek Pýkashevtiń ákimniń qabyldaýyna 9 aıda 10 ret jazylyp, biraq kire almaǵanyn alǵa tartypty.

Alaıda Kentaý qalasynyń ákimi Dáý­­ren Mahajanovtyń osy aryz bo­ıyn­sha bergen túsiniktemesine qara­sańyz, jaǵ­daı múldem basqasha sııaq­ty. Birinshiden, ákimdik Pýshkın kó­shesindegi ǵımaratty «Paryz» múge­dek­ter qoǵamyna berilýine qarsy bol­­maǵan. Byltyr sáýirde atal­ǵan ǵı­­ma­­ratqa saýda-sattyq jarııala­nady. Mem­lekettik múlik tizilimi veb-por­ta­lynda jarııalanǵan saýda-sat­tyq­qa eki qatysýshy ótinish tastaıdy. Jeńim­paz bolyp Erjan Jumashev degen kásipker tanylady. Al aryz ıeleri kon­kýrsqa qatyspaǵan. Iаǵnı ákimdiktiń aıt­­qan ýájinen túsingenimiz, barlyq másele zań sheńberinde júzege asýy tıis. «Ǵımarat taýyp ber» dep júrgen aza­­mattardyń konkýrsqa ne sebepti qa­tys­­­paı qalǵany belgisiz kúıde qalyp otyr.

Ákimniń bergen jaýabyna qaraǵanda, Kentaý qalasyndaǵy Tólebı kóshesin Ál-Farabı kóshesine deıin qosý jónindegi berilgen usynystarǵa sáıkes Táýelsiz Qazaqstannyń 20 jyldyǵyna arnalyp qoıylǵan eskertkish demontaj jasalynyp, ornyna arnaıy qurylys materıalynan daıyndalǵan brýschatkalar tóselingen. Alaıda jer astyndaǵy ınjenerlik kommýnıkasııalardyń ótýi­ne baılanysty Tólebı kóshesin Ál-Farabı kóshesine deıin uzartyp jol salýǵa múmkindik bolmaǵan.

Ákim «naǵashy týysy» D.Muhame­dıev­tiń qyzmetke taǵaıyndalýynda esh­qandaı zańsyzdyq joq ekendigin alǵa tartyp otyr. Buǵan deıin Kentaý qalalyq jer qatynastary bóliminiń burynǵy basshysy A.Baýbek Jer ko­deksiniń talaptaryn saqtamaı jáne zań buzýshylyqtarǵa jol berip, ózine júktelgen mindetterdi tıisti dáre­je­de oryndamaǵan. Sol úshin oǵan qala ákiminiń ókimimen «laýazymyn tó­mendetý túrindegi» tártiptik jaza qol­danylyp, Kentaý qalasy ákiminiń keńesshisi bolyp taǵaıyndalǵan. Al onyń ornyna D.Muhamedıev zańdy negizde, konkýrstyq komıssııanyń hattamasy negizinde taǵaıyndalǵan.

Kentaý qalasyndaǵy «Táýelsizdikke 10 jyl» monýmenti 2001 jyly Abaı dańǵyly boıyna ornatylǵan. Kentaý qalalyq máslıhatynyń 2020 jylǵy 26 naýryzdaǵy kezekten tys elý toǵy­zynshy sessııasynyń №43 hattamasymen berilgen usynysyna sáıkes, uly Abaıdyń 175 jyldyǵyna oraı 2020 jyly «Táýelsizdikke 10 jyl» mo­nýmenti alynyp, dańǵyl boıyna dana Abaıdyń eskertkishi ornatylǵan. Iаǵnı ákimniń aıtýynsha, bul jumystardyń barlyǵy da ózimbilermendikpen emes, qalany abattandyrý jobasyna sáıkes júzege asyrylǵan. «Kentaý qalasynda sanıtarlyq tazalyq jumystary «Taza­lyq Kentaý» JShS, «Grýppa Inteko» JShS jáne «Jan Kentau» JShS-leri tarapynan jumyldyrylyp, kestege sáıkes jumystar atqarylýda», delin­gen ákimniń jaýabynda. Iаǵnı «tal­qandaldy», «ózge fırmalarǵa berilip ket­ti» delingen «Tazalyq Kentaý» meke­mesi ózine tıesili jumysty atqaryp júr. Sonda aryzdanýshylar mán-jaıdy bil­megeni me?

Dál osyndaı jaǵdaı Kentaý ken baıytý fabrıkasyna da qatysty. Bıyl «NATA» holdıngi Kentaý qalasynda temir-beton buıymdary óndirisi boıynsha jobany júzege asyrýdy josparlap, Kentaý ken baıytý fabrıkasyn satyp alǵan. Tartylatyn ınvestısııalardyń kólemi 10 mln AQSh dollaryn quraı­dy. Kompanııa birqatar óndiristik jobalardy júzege asyrýdy qolǵa alǵan. Joba boıynsha 100 jańa jumys ornyn qurý kózdelgen. Osy jóninde qalalyq qo­ǵamdyq keńes músheleriniń aldynda tyńdaý ótkizilgen.

Endi D.Mahajanovtyń aldyna ki­rý­­diń qıyndyǵyna toqtalsaq. Ákim al­dyn ala bekitilgen tártip boıyn­sha qala ákimdiginde apta saıyn sár­senbide, Nur Otan partııasy qalalyq fı­lıalynyń jetekshisi retinde ár juma saıyn qabyldaý ótkizetinin má­limdep otyr. Jaýap hatta Soǵys jáne eńbek ardagerleri keńesiniń tór­aǵasy О́.Pýkashevtiń tarapynan 2019-2020 jyldary jáne búginge deıin qala áki­miniń jeke qabyldaýyna jazyl­maǵan­dyǵy da keltirilipti. Sonda jalǵan aıtyp otyrǵan kim? Aryzdy jazýshylar ma, álde jaýap berýshiler me?

«Jaqynda Shornaqtaǵy oryn al­ǵan qaqtyǵys aldynda eskertip, shara qoldansyn degen taqyryppen ákim­ge baryp, jolyǵa almaı shyqtyq... Qazaq­stan Respýblıkasynyń Prezıdenti Q.Toqaev aıtyp júrgen «estıtin Úki­met» degenimizdiń sıqy Kentaýda osy­laı bolyp tur», depti aryzdanýshy­lar Prezıdentke joldaǵan shaǵymynyń sońynda. Memleket basshysy «Azamat­tardyń barlyq syndarly ótinish-tilek­terin jedel ári tıimdi qarastyratyn «Ha­lyq únine qulaq asatyn memleket» tujyrymdamasyn iske asyrý – bári­mizge ortaq mindet» degen bolatyn. Bul oraıda elimizde, onyń ishinde Túr­kistan oblysynda tujyrymdamany is­ke asyrýǵa baǵyttalǵan birqatar ju­mys­ júzege asyrylyp, halyqpen ty­ǵyz qarym-qatynas ornatýdyń túr­li tetikteri iske qosylýda. Bılik ókil­deriniń halyqpen kezdesýleri artyp, aza­mattardy jeke máseleleri boıynsha qabyldaý úrdisi jetildirilýde. Desek te, kentaýlyqtardyń Prezıdentke júginýi Kentaý qalasynda tujyrymdama sheń­berindegi jumystardyń kemshin tustary baryn da ańǵartady.

Túrkistan oblysy