Ishki ister mınıstrligi Kóshi-qon qyzmeti komıteti tóraǵasynyń orynbasary, polısııa polkovnıgi S.Seıitjanovtyń málimdeýinshe, qazir elimizde KSRO kezeńinen beri qujattandyrylmaǵan nemese jeke basyn kýálandyratyn qujaty joq, tólqujatyn aýystyrmaǵan azamattardy anyqtaıtyn respýblıkalyq aksııa ótip jatyr. Aksııanyń maqsaty – sondaı adamdardy qujattandyrý.
– Atyraý oblystyq polısııa departamentiniń kóshi-qon qyzmeti basqarmasy atalǵan aksııa kezinde 12 tulǵany anyqtady. Onyń ishinde KSRO-nyń qyzyl pasportymen júrgen úsh adam anyqtaldy. Sondaı-aq Qazaqstan Respýblıkasynyń azamaty ekenin basqa qujatpen aıqyndaıtyn qujatsyz úsh adam bar. Prezıdent Jarlyǵymen Qazaqstan Respýblıkasynyń azamattyǵynan shyǵýyna baılanysty azamattyǵy joq adam dep tanylǵan 1, shet memlekettiń azamattyǵynan shyǵýyna baılanysty azamattyǵy joq adam dep tanylǵan 6 tulǵa belgili boldy, – deıdi polısııa polkovnıgi S.Seıitjanov.
Oblystyq polısııa departamentiniń qyzmetkerleri reıdtik is-sharalar kezinde Qazaqstan Respýblıkasynyń zańnamasyn buzǵany úshin sheteldik 1986 azamatty ákimshilik jaýapkershilikke tartty.
– Olardyń kóshi-qon zańnamasyn buzǵany dáleldenip, 184-i elden shyǵaryldy. Shetel azamattaryna qatysty 49 qylmys tirkelip, 43 sheteldik tarapynan qylmys jasalǵany belgili boldy. Onyń kópshiligi О́zbekstan Respýblıkasynyń azamattary tarapynan oryn alady. Jalpy, túrli ákimshilik quqyq buzǵan sheteldikterden
5 mln teńge óndirildi. Sondaı-aq ákimshilik jaýapkershilikke qazaqstandyq 10 jumys berýshi tartyldy, – deıdi oblystyq polısııa departamentiniń bastyǵy Qamza Úmbetqalıev.
Onyń aıtýynsha, jyl basynan beri Atyraý oblysyna qonys aýdarǵan sheteldikter sany ótken jylmen salystyrǵanda 77%-ǵa azaıyp otyr. Degenmen atyraýlyq polıseıler sheteldikterge patentter berý ıaǵnı jeke tulǵalarǵa jumys isteýge ruqsat berý arqyly zańdastyrý boıynsha jumystardy belsendi júrgizilýde. Jyl basynan polısııa qyzmetkerleri tek Atyraý qalasynda 50 myń sheteldikke jeke tulǵalarda jumys isteýin júzege asyrýǵa arnalǵan patentter rásimdegen. Olardyń basym bóligi О́zbekstan eliniń azamattaryna qatysty bolǵan.
Al oblystyq polısııa departamenti baspasóz qyzmetiniń aqparatyna qaraǵanda, sheteldikter tarapynan ákimshilik quqyqbuzýshylyq azaımaı otyr. Ákimshilik jaýapkershilikke tartylǵan sheteldikterge odan ári sharalar qabyldaý úshin kóshi-qon qyzmeti bólimderine 70-ten astam qujat túsken eken. Máselen, qylmystyq, ákimshilik quqyqbuzýshylyqtardyń aldyn alý úshin júrgizilgen sharalar kezinde anyqtalǵan sheteldikterdiń arasynda О́zbekstan azamattary da bar. Shetel azamattary tarapynan alkogoldik ishimdik iship, qoǵamdyq oryndarda júrý, avtokólikti mas kúıde júrgizý, qoǵamǵa qaýip tóndiretin basqa da quqyqbuzýshylyqtar jasalǵan. Azamattyq tártipte qaraý úshin jınaqtalǵan qujattar Atyraý qalalyq sotyna joldandy.
Tártip saqshylary túrli quqyqbuzýshylyq jasaǵan sheteldikterdiń taırańdap júrýine jol bergen joq. Bıyl sot sheshimimen osyndaı teris áreketimen tanylǵan sheteldik azamattardyń el aýmaǵynan shyǵarylýyn udaıy qadaǵalady.
– Quqyq buzǵan sheteldiktiń biri – 29 jastaǵy azamattyń kólikti mas ári júrgizýshi kýáliginsiz basqarǵany anyqtaldy. О́zbekstan Respýblıkasynyń bul azamaty Ákimshilik quqyqbuzýshylyq týraly kodekstiń 608-babynyń 6-bóligine sáıkes 20 táýlikke qamaýǵa alyndy. Osy azamatqa qatysty jınaqtalǵan qujattarmen tanysqan Atyraý qalalyq soty 13 qazanda ony deportasııalaý týraly sheshim qabyldady. О́zbekstan eliniń taǵy bir azamaty jaqynda qoǵamdyq orynda mas kúıinde júrgeni úshin ustaldy. 1986 jyly týǵan azamatqa Ákimshilik quqyqbuzýshylyq týraly kodekstiń 440-babynyń 1-bóligine saı, ákimshilik aıyppul salynyp, elden shyǵarý týraly sheshim shyǵaryldy, – deıdi oblystyq polısııa departamentiniń baspasóz hatshysy Gúlnazıra Muhtarova.
Sot sheshimimen keıin Atyraý qalalyq polısııa basqarmasynyń qyzmetkerleri sheteldikterdiń el aýmaǵynan shyǵyp ketýine yqpal etti. Sóıtip sheteldikterdi Túrkistan oblysynyń Saryaǵash aýdanynda ornalasqan «Jibek joly» baqylaý-ótkizý pýnktine deıin jetkizip, Qazaqstan terrıtorııasynan shyǵarý úshin shekara qyzmetiniń qyzmetkerlerine tapsyrdy.
Atyraý oblysy
