Besterektegi Ǵadas Salyqov atyndaǵy mekteptiń dırektory Roza Mýgýlıevanyń aıtýynsha, daıarlyq synybynan bastap 9-synyp aralyǵyndaǵy 38 oqýshynyń bári sanıtarlyq talaptardy saqtaı otyryp, kádimgideı mektep qabyrǵasynda oqyp jatyr. Daıarlyq tobyn qosa eseptegende tórt synyp túske deıin, úsh synyp tústen keıin oqıtyn kórinedi.
– О́tken oqý jylynyń tórtinshi toqsany qıyn boldy. Biraq tyǵyryqtan shyǵýdyń jolyn tapqan edik. Eki muǵalim buıryqpen kýrer bolyp bekitilip, oqýshylardyń úıine tapsyrma tasydy. Kýrer tapsyrmalardy oqýshylardyń úıindegi poshta jáshigine salyp, erteńinde oryndalǵan tapsyrmany muǵalimderine jetkizip júrdi, – deıdi Roza Tilesqyzy.
Al stýdentter keıde Wi-Fi jelisine qosylý úshin mekteptiń mańyna baratyn. Endi jańa oqý jylynan bastap basqa mektepterde oqıtyn aýyldyń balalaryna da jaǵdaı jasalyp, mektepten ınternet jelisi bar arnaıy kabınet usynylǵan. Olarǵa araqashyqtyqty saqtaı otyryp, onlaın oqýlaryna múmkindik jasalǵan.
– Stýdentter, oqýshylar mektep ishin aralap júrmeı, syrtqy esikten týra kiredi. Olardyń sabaǵyn kezekshi muǵalim qadaǵalaıdy. Ata-anasy ótinish jazyp, sabaq kestesi boıynsha ǵana mektep qabyrǵasynda bolady. Aýdannyń ár mektebinde osyndaı synyptar bar. Biraq noýtbýk, kompıýter bermeımiz. Tek Wi-Fi parolin ǵana usynamyz. Al az qamtylǵan nemese kópbalaly otbasynan shyqqan oqýshylarǵa ózderi oqyp jatqan bilim mekemesi tehnıka jaǵynan kómektesedi, – dedi Ulan aýdandyq bilim bóliminiń basshysy Qýat Oqasov.
Mektep qabyrǵasynan arnaıy kabınettiń ashylǵanyna aýyldaǵy stýdentter, gımnazııa oqýshylary qýandy. Interneti joq aýyldarda onlaın oqý kúrmeýi qıyn másele edi. Endi qashyqtan oqý múlde qıyndyq týǵyzbaıtyn sııaqty. О́ıtkeni atalǵan eki aýylǵa da ınternet jelisi tartyldy.
– O basta onlaın oqý ońaı bolmady. Ásirese oqý jyly sońynda qınaldyq. Kún sýyqta daladan ınternet núktesin izdep júretinbiz. Bıyl jańa oqý jylynda aýyl mektebinen arnaıy kabınet ashyp berdi. Endi sabaǵymyzdy jyly jerde otyryp, onlaın oqyp júrmiz, – degen edi О́skemendegi daryndy balalarǵa arnalǵan Jambyl atyndaǵy mektep-gımnazııasynyń 11-synyp oqýshysy Aqgúl Jeńishanqyzy.
Kóp uzamaı halyqtyń muń-muqtajyna qulaq túrgen Ulan aýdanynyń basshylyǵy «Qazaqtelekom» AQ birlesip, Izǵutty Aıtyqov pen Besterek aýyldaryndaǵy bıik tóbelerge ınternet qurylǵylaryn ornatqan. Jyldamdyǵy joǵary ınternet jelisine eń aldymen aýyldardaǵy oqýshylar men stýdentter qol jetkizdi.
Sonymen qatar ınternet jelisin tartý jumystary Bozanbaı aýylynan bastap, Asýbulaq aýylyna deıin aıaqtalyp qaldy. Keń jolaqty ınternet rettelgen soń barlyq turǵyndar esh kedergisiz úıdi-úıine ornata alady.
Interneti álsiz mektepterdiń qataryna Joǵary Taıynty, Jantas, Manap aýyldarynyń mektepteri de kiredi. Troısk, Proletarka aýyldaryndaǵy mektepterde de ınternet júıesi nashar. Sondyqtan da bul atalǵan mekteptiń oqýshylary qashyqtan emes, shtatty rejimde bilim alýda.
Shyǵys Qazaqstan oblysy
