Jastardyń ata kásipti jańǵyrtýǵa nazaryn aýdarý, eńbekke baýlýdy maqsat etken konkýrsqa qatysýǵa nıet bildirgender qarasy kóp boldy. Uıymdastyrýshylar jastardy aýyl sharýashylyǵy salasyndaǵy kásipkerlik belsendilikke yntalandyrýdy da kózdep otyrǵanyn jetkizdi.
Bul jobaǵa Túrkistan óńiri aýdandarynan 30-ǵa jýyq volonter qatysyp, «Alataý», «Qarataý», «Syrdarııa» jáne «Turan» degen tórt komandaǵa bólinip jarysty.
Jarystyń alǵashqy kúni Qazyǵurt aýdanyndaǵy baqtan alma terýmen bastalyp, jigitter qaýymynyń qoı qyrqýyna ulasty. Alǵashqy saıysta «Alataý» quramasy basym tússe, qoı qyrqý kezinde «Syrdarııa» jigitteri eptiligimen alǵa shyqty. Jigitterdiń aıtýynsha, qoı qyrqýda qolyna alǵash ret qaıshy alǵandary da bar, soǵan qaramastan olar uıymdastyrýshylardyń tapsyrmasyn joǵary dárejede oryndaýǵa tyrysty.
Al saıystyń ekinshi kúni Saýran aýyldyq okrýginde kartop qazyp, ony jınaýmen bastaldy. Bul jerde baıqaýǵa qatysýshylardyń kartop jınaýdaǵy jyldamdyqtary men salmaq boıynsha basymdylyqtary eseptelip, nátıje boıynsha «Syrdarııa» toby alǵa shyqty. Ári qaraı qatysýshylar saıysty maqta alqabynda jalǵastyrdy. Elimizdiń ońtústigi – aq altynnyń Otany ekeni bárimizge belgili. Sondyqtan bul jarysta atalǵan saıystyń bolýy zańdy. Maqta terý kezinde qatysýshylarǵa baǵa bergen qazylar terilgen maqtanyń tazalyǵyna, salmaǵyna jiti mán berdi.
«Turan» komandasynyń kapıtany Áıkerim: «Jarysta berilgen tapsyrmalardy buryn estigenimizben, eshqashan oryndap kórgenimiz joq. Mysaly, ózim maqta alqabyna birinshi ret kelip turmyn. Alma, maqta, kartop tere júrip, osy salada burynnan qyzmet etetin sharýalardyń eńbegin túsinip jatyrmyz. Mundaı jobalardyń bolýy eńbek adamdaryna degen qurmetti arttyrady jáne jastardy da soǵan baýlıdy dep oılaımyn», deıdi.
Jarystyń bir qyzyǵy – jastar ózderi týǵan óńirdegi kásip túrlerinen bolǵan dodada eptilikterin baıqatty. Mysaly, maqtaaraldyqtar maqta terimde birinshi bolsa, «Alataý» quramasy alma men kartop terýde kózge tústi.
«Bul – jastardy eńbekke baýlýǵa arnalǵan jaqsy joba. Bizdiń Túrkistan oblysy halqynyń 80 paıyzy aýylda turady. О́ńirimizde aýyl sharýashylyǵy áleýeti qarqyndy damyp keledi. Bul – atadan balaǵa mıras bolyp kele jatqan kásip. Ata kásiptiń jandanýy, aýyl sharýashylyǵyndaǵy ınnovasııalyq damý, sharýashylyqqa jańa tehnologııalardy engizý – endigi jastardyń enshisinde. Qazaqstan keleshekte álemdik azyq-túlik qaýipsizdigin qamtamasyz etýde óziniń tabıǵı resýrstaryna saı, laıyq ornyn alady dep senemiz. Osy maqsatta qyzmet etemiz», deıdi «Jastar resýrstyq ortalyǵy» basshysy Amalbek О́mirtaı.
Jastar eki kún boıy naǵyz aýyl ómirin sezinip jáne ózderiniń eńbekke qanshalyqty qabiletti ekenin dáleldedi. Jobaǵa aýylsharýashylyq salasynyń mamandary, sharýa qojalyqtarynyń ıeleri, kópbalaly analar qazylyq etti. Nátıje boıynsha, «Qarataý» komandasy III oryn, al «Alataý» II oryndy ıelendi. I oryndy «Syrdarııa» quramasy enshilep, bas júldeni «Turan» qanjyǵasyna baılady. Jeńimpaz jastarǵa Alǵys hat pen baǵaly syılyqtar tabystaldy.
