Kardıologııalyq aýrýhanada ortalyq júıke júıesi zaqymdanǵan naýqastarǵa arnalǵan ınsýlt ortalyǵyn ashý josparlanyp otyr. Joba boıynsha munda jeke qabyldaý bólimi men reanımasııa qarastyrylǵan. Búginde medısınalyq mekeme ǵımaratynda jóndeý jumystary júrip jatyr. Sonymen qatar, ǵımarattyń 400 sharshy metri PTR zerthanasyna beriledi. PTR taldaýlaryn zertteý kelesi aptada bastalady.
Qalalyq №1 aýrýhanasynyń aýmaǵynda óńir basshysy qabyldaý bólimi, operasııalyq jáne reanımasııalyq bloktar ornalasatyn qosymsha qurylystyń barysyn tekserdi. Merdigerler eki qabatty da kóterip, ishki bezendirý jumystaryna kiristi. Jańa korpýsqa arnalǵan jabdyqtardyń alǵashqy legi jetkizilip qoıdy.
"Pasıentter aǵyny men jabdyqtardy ornalastyrýdy keıin eshteńeni qaıta jasaýdyń qajeti bolmaıtyndaı etip qarastyrý qajet. Korpýstyń syrtqy túrine nazar aýdaryńyzdar. Kelesi aptada osy ǵımarattyń syrtqy jáne ishki dızaıny boıynsha usynystar berińiz, ol búgingi kúnge sáıkes bolýy kerek", dep atap ótti Ábilqaıyr Sqaqov.
Ǵ. Sultanov atyndaǵy oblystyq aýrýhananyń teri-venerologııalyq jáne juqpaly aýrýlar bólimi salynyp jatqan ýchaskede Ábilqaıyr Sqaqov merdigerlerdi baıaý jumys qarqyny úshin synǵa aldy.
"Shatyr jabylmaǵan, ishki árleý jumystary tipti bastalmaǵan, abattandyrý jumystary da solaı. Shamasy, sizder keshiktiresizder. Sizder bul jobany qolǵa alǵan kezde jaýapkershilikti óz moıyndaryńyzǵa aldyńyzdar. Bul - Pavlodar úshin áleýmettik mańyzy bar nysan", dedi oblys ákimi merdigerlerge.
Ábilqaıyr Sqaqov bólimshe belgilengen merzimde tapsyrylmaǵan jaǵdaıda memlekettik qyzmetkerler men merdiger uıymnyń basshylyǵy jaýapqa tartylatynyn eske saldy. Ǵımarat jeltoqsannan keshiktirilmeı tapsyrylýy tıis.
