«Bıyl elordada shóleıt, qaraýsyz qalǵan ýchaskeler men sazdy jerler aıtarlyqtaı azaıdy. Olardyń ornyna qala turǵyndary men qonaqtary bos ýaqytyn tıimdi ótkizýge arnalǵan oryndar paıda boldy. Aýlalar men qoǵamdyq keńistikterdi (gúlbaqtary, jelekjoldar, saıabaqtar) abattandyrý boıynsha aýqymdy jumys júrgizildi. Osy jyly 760 myń sharshy metr (76 gektar) jer abattandyryldy! Qala turǵyndarynyń tórtten birine serýendep, sportpen aınalysýǵa arnalǵan qoljetimdi jaıly oryndar paıda boldy.
Abattandyrý kezinde qalanyń eski bóligi men turǵyn alaptarǵa erekshe nazar aýdaryldy. Mysaly, halyq tyǵyz ornalasqan aýdandardyń biri – Baıqońyr aýdanynda 53 aýla men 13 iri qoǵamdyq keńistik salyndy. «Jastar» yqsham aýdanynda 50 kóppáterli turǵyn úı kesheni ornalasqan. Onda 23 aýla abattandyryldy. Kópshiliktiń kóńili aýǵan jumystyń biri kópir asty keńistikter boldy. Olardyń biri L.N. Gýmılev atyndaǵy EUÝ mańynda ornalasqan. Ondaǵy 3 myń sharshy metrlik orynǵa basketbol, vorkaýt jáne skeıt-alańdar, tennıs ústelderi jáne t.b. ornalastyrylǵan.
«О́ndiris» turǵyn alabynda (Lesozavod) da ózgerister oryn aldy – aýmaqtaǵy sazdy jáne 1950 jylǵy úılerdiń ornyna fýtbol, basketbol alańdary bar shaǵyn saıabaqtar (Taıbýryl kóshesi, 9A, Aqbıdaı kóshesi, 11 jáne t.b.) salyndy.
Saryarqa aýdanynda - 40 aýla jáne 20 qoǵamdyq keńistik. «Kóktal-1» turǵyn alabyndaǵy jańa saıabaqtyń kólemi 16 gektar shamasynda. Onda sport pen oıyn-saýyqqa arnalǵan úlken aýmaqtan bólek, amfı-teatr men jas jubaılardyń neke qııý rásimin ótkizýge arnalǵan rotýnda ornatyldy, ıtpen serýendeýge arnalǵan arnaıy alań jabdyqtaldy. Sondaı-aq, Jeltoqsan, Esenberlın, Jangeldın, Seıfýllın kósheleri, Beıbitshilik dańǵyly boıynda ornalasqan aýlalardyń bir bóligi abattandyryldy. Bul kósheler oń jaǵalaýdyń rýhanı atmosferasyn boıyna sińirgen ár adamǵa jaqsy tanys dep oılaımyn.
Almaty aýdanynda – 50-den astam aýla men qoǵamdyq keńistik bar. Qaladaǵy alǵashqy kópir keńistiginiń aýmaǵy 8 myń sharshy metrden asady jáne Trıatlon men Prezıdenttik saıabaqtar arasyn baılanystyryp turǵan arterııa bolyp sanalady. Aýmaq sport túrlerine bólingen. Qala turǵyndary teplohodpen júrýi úshin pırster ornatyldy, munda ózine tán ekoaýmaq ta bolady. Azamattardy qabyldaý kezinde Qajymuqan, 15, Petrov, 32, Qudaıberdiuly, 17/6 kósheleriniń turǵyndary qaraýsyz qalǵan ýchaskeler dep aıtqan bul jerler qazir turǵyndardyń súıikti ornyna aınaldy.
Esil aýdanynda 27 aýla jáne 7 qoǵamdyq keńistik bar. «Telman», «Úrker», «Prıgorodnyı» jáne t.b. turǵyn alaptarynda jaıly oryndar paıda bolyp, burynǵy saıabaqtar ózgerdi.
Jaıly aýmaqtyń, saıabaqtardyń, gúlbaqtary men jelekjoldar sanynyń artýy turǵyndardyń sportpen belsendi túrde aınalysýyna, al balalardyń erte jastan densaýlyǵyna kóńil bólýine áser etedi.
Pandemııa kezinde qala turǵyndary taza aýada kóbirek serýendeý kerektigin túsindi. Jańa qoǵamdyq keńistikterdiń artyqshylyǵy olardy qysta da paıdalanýǵa bolady. Keńistikterde muz aıdyndaryn jasap, basqa da qysqy sport túrleri men oıyndaryna saı jabdyqtaımyz.
Memleket basshysynyń tapsyrmasyna sáıkes, aýlalardy abattandyrýǵa, kógaldandyrýǵa erekshe kóńil bólemiz. Bıyl 30 myńnan astam aǵash jáne 80 myńnan astam jasyl jelek otyrǵyzyldy - qaladaǵy ekoaýmaq kólemi ulǵaıyp keledi. Abattandyrý boıynsha aýqymdy jumystardy kelesi jyly da jalǵastyratyn bolamyz», dep jazdy Altaı Kólginov.
