Halqyna mol rýhanı baılyq qaldyrǵan jazýshynyń mereıtoıyna oraı «Zeınola Sánik atyndaǵy mádenıet qory» ıgilikti is-sharalar atqaryp otyr. Atap aıtqanda, qalamgerdiń ata qonysy Úrjar aýdanynyń Qabanbaı aýylynda aýdan ákimdiginiń qoldaýymen «Zeınolla Sánik atyndaǵy ádebıet kabıneti» ashyldy. 3 mıllıon teńgege zamanaýı úlgide jabdyqtalǵan arnaıy kabınetke 60-qa tarta tanymal aqyn-jazýshylardyń kitaptary syıǵa tartyldy. Sonymen qatar Qabanbaı aýylyndaǵy eki mekteptiń áleýmettik az qamtylǵan eń úzdik, talantty 7 oqýshysyna yntalandyrý retinde 50 000 teńgeden shákirtaqy berildi. Aldaǵy ýaqytta da mekteptiń talantty oqýshylaryna turaqty túrde qoldaý jasala bermek. Iаǵnı oqýshylar arasynda olımpıada men ǵylymı jobalar baıqaýyn ótkizý jáne úzdik mektep túleginiń joǵary oqý ornynda suranysqa ıe mamandyq boıynsha bilim alýyna kómektesý kózdelgen. Taǵy bir atap óterligi, indet órshigen tusta mádenıet qory Qabanbaı aýyldyq aýrýhanasyna 3,5 mıllıon teńgege 6 dana ottegi apparaty men arnaıy medısınalyq tósek alyp berdi. Sonymen qatar qor Tarbaǵataı aýdandyq aýrýhanasyna da 3 ottegi apparatyn jetkizdi.
Zamanaýı úlgidegi ádebıet kabınetiniń ashylýyna Qazaqstan Jazýshylar odaǵy basqarma tóraǵasynyń birinshi orynbasary, tanymal aqyn Aqberen Elgezek, Úrjar aýdany ákiminiń orynbasary Birjan Qadiruly, aýdandyq ishki saıasat, bilim bólimniń mamandary, aýyl aqsaqaldary, aqyndar men ustazdar aq batasyn berip, tilektestigin bildirdi.
Aýyldyń rýhanı ómirine qan júgirtip, ádebıet pen ónerdi damytýǵa úzbeı úles qosyp kele jatqan mádenıet qorynyń taǵylymdy is-sharasy Úrjar aýdandyq mádenıet úıinde jalǵasty. Aýdandyq mádenıet jáne tilderdi damytý bóliminiń uıymdastyrýymen aqyn Aqberen Elgezektiń Almaty men Nur-Sultanda josparlap ótpeı qalǵan «Bolmaǵan balalyq shaq» kitabynyń tanystyrylymyna arnalǵan shaǵyn ádebı kesh ótti. Aqynnyń óleńderi oqylyp, óleńine jazylǵan ánder shyrqalyp, oqyrman kókeıindegi suraqtarǵa avtordyń ózi jaýap berdi. Sondaı-aq talantty 3 ónerpazǵa qor atynan arnaıy shákirtaqy berildi.
Qordyń qoldaýymen qos aqyn Aqberen Elgezek pen Dáýletkereı Kápulynyń 100 kitaby Úrjar kitaphanalaryna jol tartty.
Taıaýda ǵana «Zeınolla Sánik atyndaǵy mádenıet qorynyń» júldesi úshin astanalyq BAQ ókilderi arasynda shaǵyn fýtboldan mereıtoılyq týrnır ótkizilgen edi. Atalǵan sporttyq shara 31 qazanda Almatyda jalǵaspaq. Oǵan BAQ ókilderi men qatar aqyn-jazýshylar da qatysýǵa nıet bildirip otyr.
Iisi qazaqqa ıgiligi jetetin jaqsy isterdiń uıytqysy bolyp kele jatqan «Zeınolla Sánik atyndaǵy mádenıet qory» buǵan deıin zertteýshiler men qalamgerlerdiń kitabynyń shyǵýyna qoldaý jasady. Alakólde aqyndar aıtysy, Almatyda oqýshylar arasynda «Dilmar» sheshendik óner baıqaýy, Oralda batys aımaqtyq jyrshy-termeshiler festıvalin ótkizýge demeýshilik jasap uıytqy boldy. Aldaǵy ýaqytta da mádenıet qorynyń mándi-mazmundy sharalary jalǵasa bermek.
