Atalmysh shara Aqmola oblysynda jergilikti atqarýshy organdardaǵy onomastıka bólimderiniń jumysyn kúsheıtý, sala mamandarynyń ataý berý jáne qaıta ataý jumystaryn jetildirý jáne damytýǵa yntalandyrý, jergilikti turǵyndar arasynda túsindirý jumystarynyń sapasyn arttyrý jáne kúsheıtý maqsatynda uıymdastyryldy.
Baıqaýǵa aýdandar jáne Kókshetaý, Stepnogor qalalarynyń mádenıet jáne tilderdi damytý bólimderiniń basshylary, tilderdi damytý máselesine jaýapty mamandar, aýyldyq okrýgterdiń mamandary qatysty.
Qatysýshylar 2015-2020 jyldar aralyǵynda onomastıka salasynda atqarylǵan jumystar (jalpy aýdandaǵy ataýlar, qaıta atalǵany, ataý berilgeni, ıdeologııalyq turǵydan eskirgen ataýlar, t.s.s), túsindirý jumystary, tarıhı ataýlardy anyqtaý jumystary qamtylǵan, tolyq taldaý júrgizilgen 7 mınýttyq slaıd daıyndady. «Qazaqstan Respýblıkasyndaǵy tilder týraly» Zańynan, onomastıka salasyn retteıtin normatıvtik quqyqtyq aktilerden, «Qazaqstan Respýblıkasyndaǵy til saıasatyn iske asyrýdyń 2020-2025 jyldarǵa arnalǵan memlekettik baǵdarlamasynan» qoıylǵan suraqtarǵa jaýap berdi.
«Bul baıqaý bıyl alǵash ret ótkizilip otyr. Daıyndalǵan slaıdtar oblysymyzdaǵy onomastıkanyń jaı-kúıinen habar beredi. Jergilikti mamandar da ózderiniń bilimderin synady. Baıqaý barlyǵymyz úshin óte paıdaly boldy», – dedi qazylar alqasynyń tóraǵasy, oblystyq onomastıka komıssııasynyń múshesi, oblystyq tarıhı-ólketaný mýzeıiniń dırektory Q.Shaqshaqov.
Baıqaýǵa usynylǵan materıaldarmen tanysyp, qatysýshylardyń slaıdtary men jaýaptaryn taldaı kele, qazylar alqasy Kókshetaý qalasy Mádenıet jáne tilderdi damytý bóliminiń bas mamany Dına Beısembekovaǵa I oryndy, Aqkól aýdany mádenıet jáne tilderdi damytý bóliminiń basshysy Aıgerim Túmenbaeva men Selınograd aýdanynyń mamany Aqbota Amangeldıevaǵa II oryndy berdi.
Al Býrabaı, Ereımentaý aýdandary mádenıet jáne tilderdi damytý bólimderiniń mamandary Dınara Hamzına men Aıaýlym Baltabaıqyzy Qanapııanovaǵa III oryndy berý týraly, Birjan sal, Zerendi, Jarqaıyń aýdandarynyń mamandaryn yntalandyrý syılyqtarymen marapattaý týraly sheshim qabyldady. Sondaı-aq baıqaýǵa qatysýshylarǵa alǵys hattar men baǵaly syılyqtar tabystaldy.
