Jyl basynan beri oblysta 547 órt tirkelip, onyń ishinde 43 adam qaza tapqan. Keltirilgen materıaldyq zalaldyń kólemi 116 mln teńge. Bul byltyrǵymen salystyrǵanda shamamen eki esege artyq.
Osy órttiń 75%-y jekemenshik turǵyn úıler sektorynda bolǵan. Qaza tapqandardyń da 41 adamy osy sektordyń úlesinde. Naqty aıtsaq, 8 órtte 20 adam qaza tapqan. Onyń ishinde 14 adam (70%) mas kúıinde qaza bolǵan. Máselen, bıylǵy qańtarda Petropavldaǵy «Jumysshylar kentindegi» jeke úıde bolǵan órt saldarynan 1991 jyly týǵan áıel jáne 2016 jáne 2018 jyldary týǵan onyń eki uly qaıtys boldy. О́rt elektr symdarynyń qysqa tuıyqtalýynan shyqqan.
2020 jylǵy 7 tamyzda da osy kenttegi jeke úıde bolǵan órt saldarynan 1988 jyly týǵan úıdiń ıesi jáne onyń 2011 jáne 2015 jyldary týǵan onyń eki balasy qaza tapty. О́rt saldarynan shatyr, úıdiń ishki qaptamasy, múlikter men sharýashylyq qurylysy tolyǵymen janyp ketti. Tipti kórshi úıdiń qabyrǵasy zaqymdaldy. О́rttiń jalpy aýmaǵy 141 sharshy metrdi qurady. Bul órt – temeki shekkendegi abaısyzdyqtan bolǵany anyqtaldy. Osy tamyz aıynda Ilınka selosynda jeke turǵyn úıde bolǵan órttiń saldarynan 1969 jyly týǵan erli-zaıypty men olardyń 1992 jyly týǵan uly jáne nemereleri ajal qushty. Bul joly da órt temekiden tutanǵan.
Sol kúni Aıyrtaý aýdany Aıyrtaý selosynyń mańyndaǵy karerdegi jyljymaly turǵyn vagonda bolǵan órtten «Kókshe-Býr» JShS jumysshy-burǵylaýshysy, 1960 jyly týǵan azamat qurban boldy.
Bolǵan órtterdiń negizgi sebebi – jylytý peshterin paıdalaný kezinde órt qaýipsizdigin saqtamaý. Sonymen qatar qaıtys bolǵan eresekterdiń bári mas kúıinde bolǵanyn atap ótý kerek. Demek, mas bolyp ot tutatý adam ómirine aıryqsha qaýipti ekenin árqashan eskergen jón.
Sondaı-aq oblysta ýly gazben ýlaný saldarynan zardap shekkender de kóp. 2019 jyly osy sebeppen 27 adam zardap shegip, bir adam qaıtys boldy. Aǵymdaǵy jyly 4 adam jaraqat alǵan jáne taǵy tórteýi (onyń ishinde 1 bala) qaıtys boldy.
Bir top adamnyń qaza bolýy 2020 jylǵy 25 qazanda Qyzyljar aýdanynyń Peterfeld selosynda tirkeldi. Onda 1959 jáne 1963 jyly týǵan erli-zaıyptylar kómirtegi totyǵymen ýlanǵan.
Respýblıkalyq reıtıng boıynsha bizdiń oblys órt sany jaǵynan tómen bolǵanymen adam ólimi boıynsha ekinshi orynda tur. Kóńil kónshitpeıtin statıstıkanyń sebepteri birnesheý. Olardyń biri – halyqtyń osal toptaryna jatatyn óńir turǵyndarynyń basym bóliginiń áleýmettik jaǵdaıy. Qazir sondaı 4557 mekenjaı esepke alyndy, onda 16944 adam turady, onyń ishinde 4841-i bala. Bul turǵyn úılerdiń órtke qarsy jaı-kúıi óte qaýipti kúıde qalýda.
Elektr qaýipsizdigin tekserý barysynda 2956 úıde elektr jabdyqtary men jylytý júıelerin paıdalaný qaýipti jaǵdaıda ekeni anyqtaldy. Búgingi kúni sondaı 618 úıde elektrden órt shyǵý qaýpi joıyldy. Al halyqtyń áleýmettik osal toptarynyń 2338 úıinde 4964 buzýshylyq joıylmaǵan. Olar turatyn mekenjaılarǵa kómek kórsetý sheńberinde barlyǵy 274 avtonomdy datchıkter (191 ýly gaz, 83 tútin) ornatyldy, al oblystyń basqa óńirlerinde bul san birneshe ese asady.
О́ziniń sózinde R.Kamalov aǵymdaǵy jyly Tótenshe jaǵdaılar departamenti jergilikti atqarýshy organdarmen, eriktilermen, jergilikti polısııa qyzmetimen birlesip, oblystyń eldi mekenderiniń turǵyn úı sektorynda órtterdiń aldyn alý boıynsha aıtarlyqtaı profılaktıkalyq jumys júrgizgenderin jetkizdi. Osy jyldyń 15 tamyz ben 15 qazany aralyǵyndaǵy órt qaýipsizdiginiń eki aılyǵy barysynda reıdtik is-sharalarmen 20 myń turǵyn úıdi aralap, nusqaýlyqtar ótkizilgen, órt qaýipsizdigi erejelerin túsindiretin 50 myńnan astam jadynama taratylǵan. Adam óliminiń aldyn alý maqsatynda Tótenshe jaǵdaılar departamenti turǵyndarǵa peshpen jylytýǵa jáne elektr symdary men elektr aspaptarynyń jaramdylyǵyna erekshe nazar aýdarý kerektigin eskertken.
Soltústik Qazaqstan oblysy
