Taraz qalasynyń 85 jastaǵy turǵyny Lıdııa Sıdorenko ózi kólik júrgizgen 61 jyldyń ishinde birde-bir ret te jol erejesin buzbaǵan eken. Tájirıbeli júrgizýshi ertede «Moskvıch-vosmerka» jáne «Moskvıch-2140» kólikterin tizgindegen bolsa, 1990 jyly ony «VAZ-2106» temir tulparyna almastyrǵan. Al «Volga» GAZ-24 mashınasyn 2011 jyldan beri áli kúnge deıin basqaryp keledi. Ol júrgizýshi kýáligin 1959 jyly sol kezdegi Jambyl qalasynan alypty. Bir qyzyǵy, ol biraq eshbir kólik uıymynda jumys istemegen, uzaq jyldar boıy oblys boıynsha tutynýshylar odaǵynda eńbek etipti. Tájirıbeli júrgizýshi, ásirese jastardy jol qozǵalysy erejelerin múltiksiz saqtaýǵa, ózinen basqa adamdardy da qadirleýge shaqyrady. «Sonda ǵana tártip ornap, jol-kólik oqıǵalary men qaıǵyly oqıǵalar az bolmaq», deıdi ol.
Áýlıeata jerindegi eń tártipti júrgizýshimen jýyrda ǵana Jambyl oblystyq Polısııa departamentiniń bastyǵy, general-maıor Janat Súleımenov kezdesken bolatyn. Kezdesýde «Volga», «Moskvıch», «Jıgýlı» sııaqty jeti túrli retromashınalar qatarlasyp, boı túzedi. Olardyń keıbirin Lıdııa Sıdorenko jeke ózi basqaryp, jas polıseılerge kólik basqarý sheberligin kórsetken edi. Tipti árbir kóliktiń erekshelikteri týraly da aıtyp berdi. Bul rette óńirdiń bas polıseıi oǵan talaı jyl boıy tártipke baǵynyp, jol erejesin buzbaǵany úshin alǵys aıtyp, Alǵys hat, gúl shoqtaryn jáne baǵaly syılyq tabystady. Jasy seksenniń bel ortasyna kelse de Lıdııa Sıdorenko kólik júrgizýden sharshaǵan emes. Qaıta Taraz kóshelerinde kópshilikke úlgi kórsetip júr.
Jambyl oblysy
