Kesh shymyldyǵyn Rıkardo Amaranteniń "Longing" ("Qushtarlyq") bir aktili baleti ashty. Kórermen nazaryna adamdardyń qarym-qatynasy jaıly oı tolǵaıtyn balettiń álemdik premerasy usynyldy; bul álimsaqtan mazalap jatqan suraqtardyń jaýabyn zamanaýı horeografııa tiliniń kómegimen izdeý talpynysy: shyn máninde, mahabbattan ne qalaımyz, nelikten adamdar jan emes, tánge áýes?
Uzaq úzilisten keıin kórermen qaýym Farhad Bórıeva, Aıjan Muqatova, Súndet Sultanov, Ilıa Manaenkov jáne "Astana Balet" teatrynyń ózge de solıstterin óz kózimen kóre aldy.
"Rıkardonyń stılin biz tolyq meńgerip aldyq: onyń baletterin qalaı bıleý keregin dene-bitimimiz umytqan joq, sol sebepti, horeografııanyń ózi qıynǵa soqpady. Repetısııa jyl basynda ótip, kóktemde premerasy ótýi tıis edi, biraq, karantın jarııalanǵandyqtan, premera kúni shegerildi. Sahnaǵa qaıta oralyp, kórermendi kórý, onyń energetıkasyn seziný erekshe qýanysh syılaıdy. Meniń oıymsha, osy premeralardan keıin ártisterdiń bári baqytqa bólengen shyǵar", - degen oıymen bólisti Farhad Bórıev.
Rıkardo Amaranteniń aıtýynsha, ózge týyndylaryndaǵydaı, osy qoıylymnyń da kórkemdik bezendirilýinde mınımalızm basym. Jaryqty oınata otyryp, baletmeıster men jaryq dızaıneri Robert Daýtov sahnadaǵy áreketti tamashalap otyrǵan kórermendi tús kórgendeı áserde qaldyrdy.
Kostıým sýretshisiniń aıtýynsha, balettegi ár beıne kómek kórsetip, jol silteıtin sekildi. "Aq tús – sahnadaǵy árekettiń tús ekenin meńzeıdi. Munda oǵan perishte beınesindegi minsiz tulǵa elesteıdi; qara tús shynaıy ómirdi bildiredi, al, úshinshi bólimde, ártister adam táni tústes kıim kıip shyǵyp, jalańash turǵandaı áser qaldyrǵanda, bul - materıaldyq álemnen ada adam janynyń allegorııasy. Bul bólimde adamdar jandarmen kezdesedi", - deıdi Paýla Roza Santana.
"Longing", shaqyrylǵan horeograf Rıkardo Amaranteniń "Astana Balet" teatryna arnap qoıǵan onynshy baleti. Osy týyndysymen baletmeıster elordalyq teatrdaǵy jumysyn támamdaıdy.
Ekinshi bólimde kórermen nazaryna «Instinct» («Instınkt») bir aktili baleti usynyldy. Astanalyq kórermen "Astana Balet" teatrynyń jetekshi solısti Devıd Djonatannyń qoıýshy-horeograf retindegi eńbegimen alǵash tanysty. "Maǵan osynshalyqty senim artqany men úshin zor mártebe. Bul teatrdyń ártisteri ǵalamat. Olar meniń stılimdi, qımyldarymdy jyldam úırendi. Buǵan alǵysym sheksiz, sebebi, daıyndalýǵa ýaqytymyz óte az edi", - dep atap ótti horeograf.
Osy abstraksııaly balette horeograf jaqyn adamyńnan jyraqta qalý taqyrybyn qozǵaıdy. Qazirgi pandemııa men shekaranyń jabylǵan tusynda bul óte ózekti taqyrypqa aınaldy. Munda mýzyka men plastıka tutasa otyryp, kezdesýge asyq jandardyń ishki kúıinishin sýretteıdi.
"Balette men birneshe kompozıtordyń mýzykasyn qoldandym. Solardyń biri Jak Lýse – Bah pen djaz áýenderinen mıks jasaǵan. Onyń mýzykasyn alǵash estigende-aq, osy sazǵa balet qoıamyn dep sheshtim. Munda zamanaýı áýez basym. Keıde baraban oınap, keıin, sezimtal djaz áýeni áýeleıdi", - dedi horeograf Devıd Djonatan.
Kórermen qaýym oryndaýshylardyń minsiz tehnıkasyn, baletterdiń mýzykalyq sheshimin, tereń oılastyrylǵan detaldarǵa, kostıýmder jáne jaryqpen bezendirýge erekshe nazar aýdardy. "Eki qoıylym da erekshe kúıge bólep, umytylmas áser qaldyrdy. Men mýzykaǵa tánti boldym, jaryqty oınatqandary ǵajap. Sahnadaǵy kórinis erekshe boldy. Horeografııa óte ǵalamat, munda alaı-dúleı sezim, qushtarlyq pen emosııanyń shıryǵýyn túısindik", - degen oıymen bólisti Aısha Tólebergenova esimdi kórermen.
Aıta keteıik, 6 jáne 7 qarashada "Astana Balet" teatrynyń sahnasynda taǵy bir premera ótedi. Horeograf Anvara Sadyqova qoıǵan "Jeltorańǵy týraly ańyz" bir aktili baletinde adamdardyń tabıǵatqa qol suǵýy jaıly taqyryp kóteriledi. Osy kúni munyń saldarynyń keseldi zardabyn sezinip kelemiz.
