Vedomstvo ókilderiniń aıtýynsha, kezekke qatysty másele sheshimin tapqan kórinedi.
"Áleýmettik jelilerde, messendjerlerde О́skemen jáne Semeı qalalarynyń turǵyndary zerthanalarda ýaqytyly PTR-test tapsyra almaǵany týraly habar tarady. 2020 jyldyń 2 qarashasynda saǵat 12:00-ge deıin osyndaı jaǵdaıdyń bolǵany ras. Shyǵys Qazaqstan oblysynyń taýarlar men qyzmetterdiń sapasy men qaýipsizdigin baqylaý departamenti bul problemany rettep, kezekke qatysty máseleni sheshti", deıdi departament ókilderi.
3 qarashadan bastap qosymsha eki zerthana ashylady. Jalpy Shyǵys Qazaqstan oblysynda 10 klınıka zertteý júrgizedi.
"Oblys boıynsha 298 547 zertteý júrgizildi. Orta eseppen kúnine 2000-2200 zertteý jasalady", deıdi uıym ókilderi.
Aıta keteıik, búgin Semeıdegi PTR-test zerthanasynyń aldynda uzyn-sonar kezek paıda bolǵany týraly habarlandy. Zerthanalardaǵy jaǵdaı kóliktegi bas memlekettik sanıtar dárigerdiń qaýlysy shyqqannan keıin bastalǵan kórinedi. 2 qarashadan bastap shyǵys qazaqstandyqtarǵa jolaýshylar poıyzy men ushaqqa PTR-testiniń nátıjesi bolmasa, óńirden shyǵýǵa tyıym salynǵan.
