Mobıldi keshen zamanaýı rentgen jáne flıýrografııa bólimi, EKG-12 apparaty, gınekologııalyq tekserýge arnalǵan kreslo, qan saqtaýǵa arnalǵan tońazytqysh sııaqty jabdyqtarmen qamtylǵan. Sondaı-aq shuǵyl medısınalyq kómek kórsetiletin jyljymaly keshende shuǵyl bosandyryp alý múmkindigi qarastyrylǵan. Munda múgedek azamattar úshin avtomatty túrde kóteriletin pandýs ornatylǵan. Densaýlyq saqtaý basqarmasynyń basshylyǵy aldaǵy ýaqytta mundaı kólikterdiń sanyn arttyrý qajet bolǵan jaǵdaıda mınıstrlikke usynys ázirlemekshi.
«SK Farmasııa» kompanııasyna qarasty dári-dármek saqtaý logıstıkalyq qoımasynda 3 mlrd teńgege jýyq qarjyǵa alynǵan preparattar qajetti temperatýrada saqtalǵan. Aqtóbe oblysy boıynsha «SK Farmasııanyń» ókili Nurlan Jubanyshov Covid-19 indetimen kúresýge arnalǵan dári-dármek qorynyń jetkilikti ekenin aıtty. Qoıma Aqtóbe oblysynan ózge Batys óńirin dárilik preparattarmen qamtamasyz ete alady.
Bıylǵy tamyzda Aqtóbe oblystyq juqpaly klınıkalyq aýrýhanasynda, 130 orynǵa arnalǵan provızorlyq ortalyqta kúrdeli jóndeý júrgizilip, indettiń órshý qaýpi týyndap, naýqastar sany artqan jaǵdaıǵa ázirlengen. Qazir indetke shaldyqqandarǵa eń alǵashqy kómek kórsetiletin osy ortalyq maska, dári-dármek, zalalsyzdandyrǵysh quraldarmen tolyq jabdyqtalǵan.
Aqtóbe oblysy
