Atap aıtqanda Astana – Internasıonal, N.Nazarbaev – Abaı, Jambyl – Internasıonal kósheleriniń qıylysynda "Integra" beıne baqylaý júıesi jumys isteıdi. Árqaısy baǵdarshamnyń tyıym salynǵan túsine ótip ketý jáne toqtaý syzyǵynan shyǵý sııaqty buzýshylyqtardy tirkeıtin 9 kameradan turady.
Al Ǵ. Músirepov – Jambyl, N.Nazarbaev – Internasıonal, Jambyl – Partızan, K.Sútishev – M. Jumabaev kósheleriniń qıylysynda ornatylǵan "Mıraj" júıesiniń 4 kamerasy baǵdarshamnyń belgilerine qatysty erejelerdiń saqtalýyn baqylaıdy.
Sonymen qatar jyldamdyǵyn saǵatyna 60 km asyratyn kólikterdiń nómirlerin tirkeıdi. Aqparat kompıýtermen óńdelip, operator teksergennen keıin júıe avtomatty túrde hattama rásimdeıdi.
О́tken jyldyń jeltoqsan aıynda Ákimshilik quqyq buzýshylyqtardyń biryńǵaı tiziliminiń aqparattyq júıesi túrli memlekettik organdardyń derekter bazalarymen biriktirilgennen keıin "aqyldy" kameralar sheteldik nómirlerdi de anyqtaı bastady.
"Júrgizýshilerdiń tártibin arttyrýda ıntellektýaldy beıne baqylaý júıeleri mańyzdy ról atqarady. Osyndaı qıylystarda júrgizýshiler jol qozǵalysy erejelerin qatań ustanýǵa tyrysatyny burynnan belgili. Deı turǵanymen, kóbi asyǵystyq jasaıdy", deıdi SQO Polısııa departamenti bastyǵynyń birinshi orynbasary, polısııa polkovnıgi Qanat Aıtbaev.
Jyl basynan beri Petropavlda "ıntellektýaldy beıne júıeler" arqyly jyldamdyq rejimin buzýdyń 596 buzýshylyǵy tirkeldi.
PETROPAVL
