"Túrkistan qalasyn túrki áleminiń mádenı-rýhanı ortalyǵy retinde damytý jónindegi bas jospar tujyrymdamasyn maquldaý týraly» Elbasynyń 2018 jylǵy 29 qyrkúıektegi № 762 Jarlyǵy negizinde Túrkistan qalasynyń Bas jospary jobasy ázirlendi. Bastapqy qala aýmaǵy 19 627 gektar bolsa, qala shekarasyna ózgerister engizý arqyly jobalaý aýmaǵy 22 370 gektarǵa ózgertiledi", dedi О́mirzaq Shókeev.
Bas jospar boıynsha, birqatar jobalyq kezeń qabyldanǵan: bastapqy jyl – 2018 jyl, birinshi kezeń – 2025 jyl jáne eseptik merzim – 2035 jyl. Qala halqy 2018 jyly 165 myń adamdy qurasa, qazir – 176,2 myń adam turady. Bas josparǵa sáıkes, 2025 jylǵa – 250 myń adam, 2035 jylǵa – 350 myń adam jáne 2050 jylǵa – 500 myń turǵyn josparlanǵan.
"Qala jobasy ákimshilik-iskerlik ortalyq, rýhanı-mádenı ortalyq, turǵyn alaptary, jańa qurylys alańdary, óndiristik jáne tabıǵı-rekreasııalyq aýmaqtar bolyp birneshe bólikke bólinedi. Qalanyń shyǵys baǵytyndaǵy jańa ákimshilik-iskerlik ortalyq 1450 ga aýmaqty qamtıdy. Onda bilim berý, densaýlyq saqtaý, mádenı jáne sport nysandary, halyqqa qyzmet kórsetý ortalyqtary, turǵyn úı keshenderi, ákimshilik ǵımarattar kesheni, bıznes ortalyqtary, keńseler, bankter jáne basqa da nysandar salý kózdelgen. Búginde ákimshilik iskerlik ortalyǵynda josparlanǵan 14 nysan tolyq aıaqtalyp, qala kelbetine sáýlettik dızaın berýde", dep atap ótti oblys basshysy.
Túrkistan qalasynyń mádenı-rýhanı ortalyǵy 290 ga alqapty quraıdy. Onda Áziret Sultan qoryq murajaıy, Kerýen saraı, Tuńǵysh Prezıdent saıabaǵy, N.Nazarbaev alleıasy jáne jeke salymshylar tarapynan bes juldyzdy úsh qonaq úı syndy iri jobalar salynyp jatyr.
"Búgingi tańda mádenı-rýhanı ortalyqta Bas josparda jobalanǵan 10 nysannyń altaýy tolyq aıaqtaldy, qalǵan nysandar bekitilgen josparǵa sáıkes qoldanysqa beriledi. Atalǵan nysandar qalanyń tarıhı ótkeni men zamanaýı búgingi túrlengen kelbetin kórsetedi. Ortalyq qalaǵa kelýshi týrıster men qala qonaqtary tamashalaıtyn negizgi týrıstik baǵyt bolady", dedi О́.Shókeev.
Qala aýmaǵyndaǵy kógaldandyrý kólemi ázirge 187 ga jetip otyr. Eseptik merzimge qaraı 1539 ga nemese 44 m2/adam deńgeıine jetkizý josparlanǵan.
"Tujyrymdamaǵa sáıkes, qalanyń klımattyq jaǵdaıyn eskere otyryp, qala syrtynda kógaldandyrýdyń úzdiksiz júıesin jáne Syrdarııa ózeniniń tabıǵı ósimdikter dúnıesimen birigýdi qamtamasyz etetin jasyl beldeý qalyptastyrý kózdelgen. Budan basqa, qala turǵyndaryn ómir súrý deńgeıi men sapasyn jaqsartý maqsatynda qajetti ınjenerlik ınfraqurylym júıeleri men talapqa saı áleýmettik nysandar boı kóteretin bolady", dedi óńir basshysy.
