Koronavırýspen kúresý strategııasy birneshe pýnkten turady desek, olar – tósek oryndary, medısınalyq qyzmetkerler, dári-dármekter, qajetti jabdyqtar, zerthanalyq zertteýler, jeke qorǵanys quraldarymen qamtý sharalary jáne mobıldi toptardyń jumysy.
Bul oraıda Jambyl oblysynyń ákimi Berdibek Saparbaev barlyq qarjylyq jáne ınfraqurylymdyq resýrstardy jumyldyrýdy tapsyryp, qaýipti ınfeksııa órshı túsken jaǵdaıda barynsha daıyn bolýǵa shaqyrdy. Oblystyq jedel shtabtyń kezekti otyrysynda densaýlyq saqtaý basqarmasynyń basshysy Áset Qalıev medısınalyq mekemelerdiń 100 paıyz daıyn ekenin aıtty.
Oblysta 2530 tósek-oryn jasaqtalǵan, onyń 253-i jan saqtaý bólimine tıesili. Medısınalyq mekemelerde ókpeniń 253 jasandy jeldetkish qural, 706 ottegi ballony, 542 ottegi konsentratory, 1009 ımpýlstik oksımetr, 19 sıfrlyq rentgen apparaty, 10 kompıýterlik jáne 7 magnıttik-rezonanstyq tomograftar bar. Jaqyn arada taǵy 74 О́JJ, jeti kompıýterlik tomograf, tórt sıfrlyq rentgen apparaty, tórt ottegi stansııasy, sondaı-aq, 74 birlik jedel járdem kóligi, segiz jyljymaly medısınalyq keshen, 100 kópfýnksıondy tósek jetkiziledi dep kútilýde.
Berdibek Saparbaev barlyq reanımasııalyq tósekterdi О́JJ apparatymen qamtamasyz etýdi tapsyrdy.
Oblystyń bas dárigeri ambýlatorııalyq deńgeıde de, stasıonarlyq deńgeıde de dári-dármektiń jetkilikti qory bar ekenin tilge tıek etti.
Jalpy, 4 410 medısına qyzmetkerin tartý josparlanyp otyr desek, onyń ishinde 882 dáriger, 1764 orta býyn medısına qyzmetkerleri jáne sonsha kishi býyn medısına qyzmetkerleri bar. Oblys ákimi men S.D.Asfendııarov atyndaǵy Ulttyq medısınalyq ýnıversıtetiniń rektory arasynda jasalǵan yntymaqtastyq týraly memorandým aıasynda qosymsha 150 maman tartylmaq.
О́ńirde jeti PTR zerthanasy bar. Mindet – zerthanalyq zertteýlerdiń tıimdiligin, PTR zerthanalarynyń sany men syıymdylyǵyn arttyrý.
Oblys ákimi áli de mobıldi toptardyń jumysyna kóńili tolmaıtyndyǵyn jetkizdi.
"О́kinishke qaraı, koronavırýstyq ınfeksııa qaýpi áli joıylǵan joq. Biz naqty jáne dáıekti túrde áreket etýimiz kerek. Turǵyndar nemquraılylyq tanytqan saıyn, koronavırýsty jeńý múmkin emes. Halyq úılený toılary men mereıtoılardy ótkizýdi toqtatpaı otyr. Mundaı faktilerdi anyqtaýy tıis mobıldi toptar eshqandaı mardymdy shara qoldanyp jatqan joq, reıdterdi tek esep úshin júrgizýde", - dep ashýlandy oblys ákimi.
Mysaly, Taraz qalasynda 10-30 qazan aralyǵynda mobıldi toptar 3033 nysandy tekserip, karantındik rejımdi buzǵany úshin tek 18 hattama toltyrǵan. Sarysý, Moıynqum, Merki, Jýaly, Qordaı aýdandaryndaǵy mobıldi toptardyń da jumysy oıdaǵydaı emes.
Joǵaryda atalǵan aýdandar men oblys ortalyǵynyń ákimderi jaǵdaıdy túzetetindikterine sendirip baqty.
Berdibek Saparbaev kezdesýge qatysqan dárihana jelileri ókilderin jaǵdaıdyn kez-kelgen baǵytta órshýine daıyn bolý kerektigin, týyndap otyrǵan máseleler týraly ashyq aıtýǵa shaqyrdy.
