Brıtan ǵalymdary jaqynda koronavırýs ınfeksııasyn birneshe saǵat emes, birneshe sekýnd ishinde anyqtaýdyń qarapaıym ádisi paıda bolýy múmkin ekenin rastaıdy. Testtiń tolyq oryndalýy birneshe mınýtty alady. Ýelste jasalǵan tynys alý testi Covid-19 vırýsyn tynys alý joldarynyń basqa da ınfeksııalarynan birden ajyratady. Shotlandııa men Germanııada ótkizilgen jańa testtiń synaq nátıjeleri medısınalyq Lancet jýrnalynda jarııalanǵan. Ony jasaýshy Imspex Diagnostics kompanııasy qarjy tabylsa, synaq qurylǵysy alty aıda paıdalanýǵa daıyn bolatynyn málimdedi.
«Test nátıjesiniń tez daıyn bolatyny tek aýrýhanalarda emes, ártúrli jaǵdaılarda qoldanýǵa múmkindik beredi. Onyń áleýeti avıasııada, jalpy kólikte, mıgranttarmen jumys kezinde kórinedi. Tynys alý úlgisin tez alýǵa bolady, ol ınvazıvti emes, sizge arnaıy daıyndalǵan adam qajet emes, birneshe mınýt ishinde sizdiń qolyńyzda test jaýaby bolady», deıdi qurastyrýshylar.
Bul qurylǵy bastapqyda ókpeniń qaterli isigi sııaqty aýrýlardy dıagnostıkalaý men bakterııalyq jáne vırýstyq ınfeksııalardy tez ajyratý úshin testter ázirleý kezinde qoldanylatyn tehnologııaǵa negizdelgen. Alaıda álemdi jaılaǵan pandemııa bastalǵannan keıin fırma koronavırýsty dıagnostıkalaýǵa arnalǵan test jasaýǵa sheshim qabyldady. Zertteýshiler mundaı qurylǵy Covid-19 vırýsyn basqa ınfeksııadan qanshalyqty ajyrata alatynyn synap kórdi. Qurylǵy tynys alý úlgisin taldaıdy, turaqsyz hımııalyq elementterdi izdeıdi, olar respıratorlyq aýrýdyń túrin anyqtaıdy. Testter osy elementterdegi Covid-19 qoltańbasyn anyqtaı aldy, ol keıinirek basqa ınvazııalyq testileý ádisterimen rastaldy. Jalpy, tester koronavırýsty astma nemese bakterııalyq pnevmonııa sııaqty basqa aýrýlardan ajyrata otyryp, 80% jaǵdaıda vırýsty anyqtaı aldy.
