Sondaı-aq 30 qazandaǵy jer silkinisinen keıin jalpy sany 1 713 aftershok tirkelgen. Zilzala saldarynan 114 adam qaza bolyp, 1 035 adam jaraqat alǵan. Onyń 898-i medısınalyq kómek kórsetilgen soń úıine jiberilgen, 137-si emdelip jatyr. Izmırdegi 17 ǵımarattyń 15-inde izdeý-qutqarý jumystary aıaqtaldy. Qutqarýshylar qalǵan 2 ǵımaratta izdeý jumystaryn jalǵastyrýda.
Túrkııa úkimeti janyndaǵy Tótenshe jaǵdaılardyń aldyn alý jáne joıý basqarmasynyń habarlaýynsha, zilzala jergilikti ýaqytpen 14.51-de tirkelgen. Dúmpý oshaǵy Ege teńiziniń jaǵalaýynda, 16,5 shaqyrym tereńdikte ornalasqan kórinedi. 15 sekýndqa sozylǵan jer silkinisi Izmır qalasynan bólek Túrkııanyń batysyndaǵy kóptegen aýdanda sezilgen.
Dúmpýler Grekııa qalalarynda da sezilgen. Karlovasıdegi Teotokos shirkeýiniń bir bóligi qıraǵan. Sonymen qatar Grekııanyń Samos aralynda qatty jer silkingen.
Buǵan deıin Grekııa men Túrkııa arasynda Jerorta teńizine baılanysty daý týǵan bolatyn. Elladalar eliniń premer-mınıstri Kırıakos Mısotakıs týıtterdegi paraqshasynda «Aıyrmashylyqtarymyzǵa qaramastan, búgin halqymyz apatpen birge kúresetin sát keldi», dep jazdy.
Túrkııa Prezıdenti Rejep Taııp Erdoǵan da týıtterdegi paraqshasynda barsha grek halqynyń qaıǵysymen ortaqtasyp, kez kelgen qıyn sátte kómektesýge ázir ekenin jetkizdi. «Kórshi elderdiń qıyn kezeńde kómek qolyn sozýy ómirdegi basqa nárselerge qaraǵanda áldeqaıda qundy», dep jazdy R.Erdoǵan.
