– Álı Ábdikárimuly, jyldar jyljyǵan saıyn tútini túzý ushqan eldi mekenderdiń qadiri qashyp, berekesi ketip bara jatqan syńaıly. Senat depýtaty, aýyl adamdarynyń únin jetkizip, daýysyn estirtetin partııa tóraǵasy retinde bıik minberde qandaı máselelerdi kóterip kelesiz? Áńgimemizdi osydan bastasaq.
– Elimizdiń tiregi aýyl ekeni beseneden belgili. Búginde bul salanyń máselesimen, sheshýin tappaǵan problemalarymen «Aýyl» partııasy jaqsy tanys. Jalpy, senatorlyq qyzmetim men partııa tóraǵasy retindegi mindetterimdi bir-birinen bólip qaramaımyn. Depýtattyq mandattyń quzyreti aıasynda el azamattarynyń túıtkildi máselelerin nazardan tys qaldyrmaýǵa tyrysamyz. Osy ýaqytqa deıin Úkimet basshysynyń atyna 34 depýtattyq saýal joldandy. Saýaldardyń basym bóligi aýyl jáne aýyl sharýashylyǵy máselelerine arnalǵan. Elimizdiń qaı óńirinde osy salaǵa qatysty másele týyndap jatsa, únimizdi qosyp, túıinin sheshýge atsalysamyz. Eldi mekenderdiń ekologııalyq máselelerine, aýyl sharýashylyǵy jerleriniń sorlanýyna, aýyz sý men aǵyn sýdyń lastanýyna, jaıylym men agroónerkásipti qarjylandyrýǵa baılanysty jáne basqa da kóptegen máselelerdi Úkimet basshysyna jetkizip, oń sheshilýine yqpal ettik. О́ńirlerdegi máslıhattarda 38 depýtatymyz bar. Jergilikti jerlerdegi áleýmettik-ekonomıkalyq máselelerdiń sheshimine olar da belsene atsalysady. «Qazaqstannyń fermerler qaýymdastyǵy», «Aýylsharýashylyq kesheni qaýymdastyqtarynyń alıansy» sııaqty birlestiktermen memorandým jasasyp, jańa bastamalardy qolǵa alýdamyz. Negizgi nıetimiz – aýyldyń damýyna múddeli toptardyń kúsh biriktirip, ortaq múdde jolynda judyryqtaı jumyla jumys isteýlerine jaǵdaı jasaý.
– Aýyl turǵyndaryn alańdatatyn kóp máseleniń biri – sapaly medısınalyq kómektiń joqtyǵy. Máselen, elimizde ambýlatorııalyq pýnktteri, jedel járdem kólikteri, dárihanalary joq aýyldar bar. Muny Densaýlyq saqtaý mınıstri Alekseı Soı da moıyndap otyr. Siz basshylyq etetin partııa osy máselelerdi kún tártibine qoıa aldy ma?
– Pandemııa kezeńi elimizdiń densaýlyq saqtaý júıesiniń olqy tustaryn anyqtap berdi. Ásirese aýyldyq eldi mekenderdiń epıdemııalyq jaǵdaıǵa daıar emes ekendigi anyq baıqaldy. Keıingi bir aıdyń ishinde «Aýyl» partııasynyń belsendileri, volonterleri 200-den astam eldi mekendi aralap, ondaǵy ambýlatorııalar men feldsherlik-akýsherlik pýnktterdiń, aýrýhanalardyń jaı-kúıimen tanysty. О́kinishke qaraı aýyldaǵy medısınalyq qyzmet kórsetý salasynyń problemalary shash etekten. Máselen, 3-4 aýylǵa bir ǵana feldsher qyzmet kórsetetin óńirler kezdesedi. Onyń ózinde tıisti aýyldardy aralap shyǵatyn kóligi joq. Turǵyndar sany 2-3 myńnan asatyn aýyldarda jalǵyz feldsher jumys istep otyrǵanyn da baıqadyq.
Búginde atalǵan máseleni sheshýge baǵyttalǵan birneshe josparymyz bar. Bul birinshi kezekte, aýyldyq eldi mekenderdi zamanaýı medısınalyq qurylǵylarmen qamtamasyz etý úshin tıisti mınıstrlikterge usynystar jasaý. Árıne, barlyq aýyldy bir sátte sapaly ári qymbat qurylǵylarmen qamtı salý qoldan kelmeıtini anyq. Degenmen, muny sheshýdiń bir joly – iri aýyldarda ortalyqtandyrylǵan medısınalyq ortalyqtar ashyp, olardyń jalǵyz ózine ǵana emes, sondaı-aq kórshiles aýyldarǵa, aýdandarǵa qatar qyzmet kórsetýin qamtamasyz etý. Mundaı tájirıbe elimizdiń birqatar óńirinde engizilip te jatyr. Mysaly, Shyǵys Qazaqstan oblysynda osyndaı máseleni sheshýdiń ońtaıly joldary jaqsy nátıje berip keledi. Atap aıtsaq, atalǵan óńirdegi iri aýyldar men aýdan ortalyqtarynda ınsýlttik, «Ana men bala», kardıologııalyq, ońaltý ortalyqtary ashylyp, olar ózderine ǵana emes, sonymen qatar kórshi aýyldar men aýdandarǵa da qatar qyzmet kórsetýde. Iаǵnı aýyl turǵyndary burynǵydaı sabylyp birneshe júzdegen shaqyrym qashyqtyqtaǵy oblys ortalyǵyna nemese iri qalalarǵa aǵylmaı-aq, sapaly medısınalyq kómekti kórshi aýyldan nemese aýdannan ala alatyn boldy.
Jalpy, epıdemııalyq zańdylyqtar boıynsha aýylda indettiń taralýy az bolýy tıis. О́ıtkeni onda halyqtyń shoǵyrlaný tyǵyzdyǵy qaladaǵydaı jıi emes. Myńdaǵan adam turatyn kóp qabatty úıler men iri nysandar joq. Endeshe, aýyldarda kovıdtiń taralýyna ne sebep?.. Árıne, jergilikti ákimdikter indettiń aldyn alý jumystaryn durys uıymdastyrǵany jón. Aýyl halqy óte uıymshyl. Naqty bastamashyl basshy men baǵyt beretin bilikti maman bolsa, óz ıgilikteri úshin eshteńeden tartynyp qalmaıdy. Aıtpaǵym, aýyl ákimderi qandaı iste bolsyn joǵarydan nusqaý kútip, qol qýsyryp otyra bermeı, bar múmkindikti paıdalanyp, iske kirisýleri kerek. Taǵy bir baıqaǵanymyz, turǵyndary iri óndiris oryndarynda vahtalyq ádispen jumys isteıtin aýyldarda indet kóbirek taralǵan. Sondyqtan da iri ken oryndary men óndiristerdegi sanıtarlyq baqylaý men profılaktıkalyq sharalardy da kúsheıtken abzal.
Shyny kerek, aýyldaǵy aǵaıyndar indettiń birinshi tolqyny kezinde sharasyzdyqtan em-domyn úıde qabyldady. Mundaı jaǵdaıǵa jol berýge bolmaıdy. «Aýyl» partııasy pandemııa jaǵdaıynda aýyldardaǵy medısınalyq qyzmettiń sapasyna júrgizgen monıtorıngtik sharalardyń negizinde Úkimetke hat joldadyq.
– Qazaqstanda aýyl turǵyndary jappaı kóship jatyr deýge bolady. О́tken jyldyń ózinde «altyn besikti» qalanyń qym-qýat tirshiligine aıyrbastaǵan otandastarymyzdyń sany jarty mıllıonǵa jetipti. Aýylǵa halyqty qalaı turaqtandyrýǵa bolady?
– Ýrbanızasııa HHI ǵasyrda álemdik úrdiske aınaldy. Aýyldyq eldi mekender quldyraı berse, ýrbanızasııanyń aldyn alý qıynǵa soǵady. Sondyqtan da birinshi kezekte aýyldardyń áleýmettik, sharýashylyq ınfraqurylymyn damytý shart.
El turǵyndarynyń 53,3%-ynyń ýrbanızasııalanýy maqtanarlyq jaıt emes. Sol sebepti, aýyl-aımaq turǵyndaryn turǵylyqty jerlerinde ustaıtyn jaǵdaı jasalýy tıis. Ol úshin eń durysy, aýyl halqynyń qolynda bar sharýashylyǵymen nápaqa tabýyna jaǵdaı jasaýymyz kerek. Árıne, uıymdastyrylǵan túrli agroqurylymdarǵa jaǵdaı jasaǵan jón. Olar túrli jaýapkershiligi shekteýli seriktestikter, sharýa qojalyqtary. Biraq olar da jumys oryndaryn berip únemi ulǵaıa beretin zat emes. Olar aýyldaǵy 4 mln ekonomıkalyq belsendi halyqqa jumys berýge qaýqarsyz. Sol sebepti aýyl halqyna óziniń jeke sharýashylyǵy arqyly nápaqa tabýǵa jaǵdaı jasaýymyz qajet.
Búgingi kúni aýyldaǵy ár azamattyń qora-qopsysy, maly, baqshasy bar. Olar jyl on eki aı óz ónimderin shyǵaryp otyr. Statıstıkalyq derekterdiń ózi-aq búgingi kúni elimizde óndiriletin aýyl sharýashylyǵy taýarlarynyń teń jartysynan astamyn jeke sharýashylyqtardyń óndiretinin kórsetýde. Sol sebepti, olarǵa óz ónimderin ádil baǵaǵa satý arqyly kún kórýlerine jaǵdaı jasaǵan jón. Ol úshin tutyný-servıstik kooperatıvter qurý qajet. Olar aýyl halqynyń ónimderin ádil baǵaǵa satyp alyp, basqa jaqta satýy kerek. Sol kezde aýyl halqy qalalyq jerlerge kóshpeıtin bolady. Bolashaǵy bar aýyldardy iriktep alyp, solarda áleýmettik salany damytýdy, turǵyn úıler men joldar salýdy, kommýnıkasııalar júrgizýdi qarastyratyn «Aýyl – el besigi» jobasy áli de jetildire túsýdi talap etedi. Aýyl halqynyń ál-aýqatyn arttyrýǵa arnalǵan joba sóz júzinde qalmaı, naqty jumystardy atqarýy tıis.
– Úkimet tarapynan aýyldy, aýyl sharýashylyǵyn órkendetýge arnalǵan alýan túrli baǵdarlama bar. Baǵdarlama aıasynda qyrýar qarjy bólinip te otyr. Alaıda qazynadan bólingen qarjy qanshalyqty maqsatty túrde jumsalady? Jumsalǵan kúnde nátıjesi qandaı?
– Joǵaryda atap ótkendeı, «Aýyl – el besigi» baǵdarlamasynyń olqy tustary kóp. «Aýyl» partııasynyń músheleri júrgizgen zertteýlerine súıensek, bul baǵdarlama «Eńbek», «Nurly jer», «Nurly jol» sııaqty baǵdarlamalarmen úılestirilmegen ári jan-jaqty júıeli oılastyrylmaı jasalǵan qujat deýge bolady. Jobaǵa engizilgen tirek aýyldaryn irikteý prınsıpi túsiniksiz, qandaı krıterıılermen tańdap alǵandyǵy belgisiz. Sol sebepti 3561 eldi mekendi quraıtyn tizimnen shalǵaıdaǵy aýyldar tys qalǵan. Biz bul jobany qaıta qaraýdy usynyp otyrmyz.
AО́K-ti damytýǵa 2019 jyly 448 mlrd teńge qarjy bólinse, sonyń 1,6 mlrd teńgesi aýyl túrǵyndaryn turaqty jumyspen qamtıtyn 22 jobaǵa ǵana jumsalǵan. Agrarlyq baǵyt boıynsha granttyq jáne baǵdarlamalyq-maqsatty qarjylandyrý kólemin arttyrý máselesin biz qoldaıtyn bolamyz. Qazir memleket tarapynan AО́K-tiń turaqty damýy men aýyl sharýashylyǵy ónimderiniń qaýipsizdigine bólinetin qarjyny ulǵaıtýdy usynyp otyrmyz.
– Búginde qala turǵyndarynyń jan basyna shaqqandaǵy tabysy 66 207 teńgeni qurasa, aýylda bul kórsetkish nebári 35 349 teńgeni quraıdy. Máselen, tabysy kúnkóris deńgeıinen tómen az qamtylǵan otbasylar sany aýyldyq jerlerde 6,6%-ǵa jetipti. Qala turǵyndarymen salystyrǵanda bul eki jarym ese kóp kórinedi. Sizdińshe osy máseleni qalaı sheshýge bolady?
– «Aýyl» partııasynyń júrgizgen statıstıkasyna sáıkes, aýyldaǵy otbasylardyń ishinde ár besinshi áıel tabysker eken. Sondaı-aq aýylda turatyn otbasylardyń 10 paıyzy áıelder alatyn járdemaqy men zeınetaqy qarajatyna kún kórip otyr.
Qazaqstanda kópbalaly otbasylardy áleýmettik qoldaýdaǵy jaǵdaı túbegeıli ózgeristerdi talap etedi. Qazirgi qoldanystaǵy ana men balany áleýmettik qoldaý júıesinde qaıshylyqtar bar. Memleket tarapynan balany týǵannan bastap 18 jasqa tolǵanǵa deıin áleýmettik qoldaý standartyna kepildik berilip, ony aıqyndaýǵa tıis. Iаǵnı tólemder otbasynyń tabysyna, balalar sanyn rastaýsyz jappaı barlyq balaǵa tólenýi kerek. Mysaly, qazir ataýly áleýmettik kómekti 766 myń adam alady. Olardyń 492 myńy balalar. Al AÁK-tiń ortasha mólsheri 7,3 myń teńgeden sál ǵana asady. Kópbalaly otbasylardyń kedeıligi týraly aqparat osy statıstıkamen-aq rastalyp tur. Sonymen qatar otbasynyń ákesi alıment tóleýden jaltarǵan nemese kásibı biliktiliginiń tómendigine baılanysty jumysqa ornalasa almaıtyn otbasylar kedeılik sheginde qalady. Al anasy bolsa, jumysqa shyǵý kerek nemese memleketten eń az AÁK alyp úıde otyrýy tıis. Muny analar úshin áleýmettik ádiletsizdik dep bilemiz.
Áıelder úshin joǵary aqy tólenetin jumys oryndarynyń bolmaýy, mektepke deıingi bilim berý mekemeleriniń jáne mektep jasyndaǵy balalar úshin aqyly qosymsha bilim alýdyń qoljetimsizdigi qazirgi kezde úlken áleýmettik máselege aınalǵan. Bir sózben aıtqanda, ana men balany qoldaý saıasatynda túıini sheshilmegen túıtkildi máseleler barshylyq. «Balalar – bizdiń bolashaǵymyz» deımiz, al eger biz qazir áleýmettik kómekti kedeılik sheginiń 70% sheginde tóleı otyryp, tárbıeleıtin bolsaq, onda bolashaqta olardan otansúıgishtikti kútýge, «elge qyzmet et» dep talap qoıýǵa moraldyq quqyǵymyz joq.
– Aýyldyń jolyn, ınfraqurylymyn damytý da kún tártibinde tur. Pandemııa jaǵdaıynda jyǵylǵannyń ústine judyryq bolyp, bul máselelerge ınternet tartý qajettiligi qosyldy. Osy máselelerdi sheshýge qatysty partııa qandaı da bir bastamalardy qolǵa alyp jatyr ma?
– Pandemııa sıfrlandyrý salasynda kemshilikterdiń kóp ekendigin kórsetti. Ásirese bilim salasy qashyqtan oqytýǵa kóshken sátten bastap ınternet máselesi týyndady. Internettiń keıbir aýyldarda múldem joq ekendigi aıqyndaldy. Onlaın oqytý úshin biryńǵaı platformanyń bolmaýy, saıttardyń álsiz jumysy, sonymen qatar keń jolaqty ınternetpen barlyq aýyldar qamtylmaǵany, ınternet bolsa da, onyń sapasy men jyldamdyǵy qanaǵattandyrmaıtyndyǵy belgili.
Al aýyl-aımaqtyń ınternet jelisimen qamtylýy bólek áńgime. Bul birinshi kezekte ınternet jyldamdyǵynyń óte álsiz bolýy, ekinshiden, shalǵaı aýyldarǵa kabel tartýda provaıder kompanııalardyń ony shyǵyn kórýinde. Aýyl-aımaqqa uıaly baılanystyń symsyz ınternetin ǵana jetkizip úırengen monopolıst kompanııalar optıkalyq-talshyqty kabelder tartýdy tym qymbat ári shyǵyny kóp sharýa dep esepteıdi. О́zderiniń bas paıdasyn ǵana oılaǵan osyndaı kompanııalardyń kesirinen qarapaıym halyq zardap shegip otyr. Bul másele osy ýaqytqa deıin bilinbes te edi. Biraq koronavırýstyq pandemııa bar shyndyqtyń betin ashty. Qashyqtan oqytýda aýyl-aımaqtyń ınterneti túkke tatymaı qaldy. Osy rette elimizdiń baılanys naryǵyna basqa kompanııalardy engizý tıimdi dep oılaımyn. Bul monopolıst kompanııalar arasyndaǵy kelisim men ózara aımaqtardy bólisip alý josparlaryn buzyp, sapaly ınternettiń el turǵyndaryna qoljetimdi baǵada berilýin qamtamasyz etedi. Básekelestik bolǵan jerde ǵana bul másele sheshiledi.
Qazirgi tańda Qazaqstanda kóptegen aýyl ınternetpen qamtylmaǵan. Eń aldymen, osy máselege baılanysty oqýshylar zardap shegýde. Sondaı-aq eldiń kentteri men aýyldaryndaǵy uıaly baılanystyń sapasy áli de ótkir kúıinde tur.
– «El tiregi – eńbek adamy» deımiz. Alaıda ónim óndirip, eldi asyrap otyrǵan eńbek adamdary – sharýalar da shalqyp otyrmaǵany belgili. Qashanǵy olar sýbsıdııa, nesıe, dızel otynyn surap Úkimetke alaqan jaıady. Bári kerisinshe bolýy kerek emes pe edi?
– Otandyq agroónerkásiptik keshen shamamen 17 myń zańdy tulǵadan, 200 myńnan astam sharýa qojalyǵy jáne 1,7 mln jeke qosalqy sharýashylyqtan quralady. Sońǵylary barlyq ónimniń jartysynan kóbin óndiredi: mal sharýashylyǵynda – 72%, kókónis sharýashylyǵynda – 90%, sút óndirisinde – 80%. Osyǵan qaramastan, kóptegen jyl boıy jeke sharýashylyqtar memlekettik qoldaýdan tys qalyp keledi. Qazirgi kúni aýyldarda shamamen 8 mln adam nemese halyqtyń 42%-y turady. Sondyqtan aýyl sharýashylyǵy bul jaı ǵana ekonomıka salasy emes, ol áleýmettik-ekonomıkalyq sala, ómir salty. Onyń ózegi sharýalarǵa jaqsy tabys tabýǵa jáne aýyldaǵy ómirin jaqsartýǵa múmkindik beretin kúshti kooperatıvter bolýy kerek.
«Aýyl» partııasynyń ókilderi jer-jerlerde fermerler men jeke sharýa qojalyqtaryna kooperasııa qurý, ony damytý men artyqshylyǵy týraly keńes aıtyp, suraqtaryna jaýap berip keledi. Damyǵan elderde, mysaly Izraıl, Japonııa elderinde aýyl sharýashylyǵy osy kooperasııa arqyly damyp otyrǵany belgili. Kooperasııanyń basty mindeti aýylsharýashylyq ónimin óndirýshilerge kómek kórsetý. Ol qandaı kómek? Mysaly, aýyldaǵy shaǵyn qojalyqtar, jeke kásipkerler, JShS-lar et, sút, jumyrtqa, kókenis, taǵy basqa ónim túrlerin óndiredi, biraq ótkizý joldary turaqty emes. Osy jerde kooperasııa kómekke kelýi tıis. Iаǵnı qojalyq ónim óndirýmen, al ótkizýmen kooperasııa aınalysady. Kooperasııalardyń damýy aýyl turǵyndarynyń tabysyn arttyrýǵa, al qala turǵyndarynyń ekologııalyq taza ónim tutynýlaryna múmkindik jasaıdy. Kelesi qadam – búginde bızneske aınalǵan malǵa qystyq azyq daıyndaý. Bir tonna shóptiń ózindik quny – 7-8 myń teńge, shabyndyq barysynda ol 20 myń, kúzde – 30 myń, qysta – 40 myń teńge, al qys qatty jyldary 50 myń teńgege deıin jetedi. Sharýalar shóp úshin ózderiniń az paıdasyn berýge májbúr.
Ár sharýa qojalyǵy óziniń malyna, tehnıkasyna, qarjysyna ózi menshik ıesi bolyp qala beredi. Tek ónim ótkizýde, jem-shóp daıyndaýda nemese satyp alýda, janar-jaǵarmaı satyp alýda kooperasııa kómegine júgine alady. Mysaly, janar-jaǵarmaıdy ár qojalyq 1-2 tonnalap jeke-jeke bólshektik baǵamen satyp alǵannan góri, bári bir kooperasııaǵa birigip kóterme baǵamen satyp alǵan arzan jáne paıdaly bolady. Sol sııaqty tuqymdy, pestısıdterdi, shaǵyn tehnıkalardy taǵy basqa óndiriske kerek zattardy alýǵa septigin tıgizedi. Qazirgi kúni shaǵyn sharýashylyqtardyń bankterden kredıt alý múmkin emes, kredıt alý úshin laıyqty kepilzat bolýy tıis. Alǵan kúnde de paıyzdyq ósimi joǵary. Osy jerde de shaǵyn sharýalarǵa kómekke kooperasııa qol ushyn soza alady. Mysaly, kooperasııa quramyndaǵy úlken sharýalar artylǵan qarjysyn kooperasııaǵa paıyzdyq ósimmen beredi, al kooperasııanyń shaǵyn sharýalarǵa tómen paıyzpen kredıt berý múmkindigi týady.
– Búginde elimizde aýyl halqynyń úlesi 42 paıyzdy quraıdy. Bul úlken kúsh. Aýyldyń jaıyn aıtqanda «Aýyl» partııasynyń qazirgi qyzmetin aınalyp óte almaspyz. Partııanyń búgingi qyzmeti men saıası áleýeti týraly ne aıtar edińiz?
– Búginde «Aýyl» partııasy qaıtadan qalyptasý kezeńin aıaqtap, partııamyzdyń irgesi bekip, qanaty qataıyp, qatary tolyǵyp keledi. «Aýyl» partııasy – ózindik tájirıbesi men tarıhy bar, jumys júıesi qalyptasqan, tanymal saıası brend. Partııamyz qurylymdyq turǵydan kúsheıip, aıaǵyna nyq turdy. Barlyq óńirler men aýdan, aımaqtarda partııanyń fılıaldary men uıymdary turaqty túrde jumys istep keledi. «Aýyl» partııasynyń aımaqtarda shynaıy bedeli bar. Elimizdiń ár óńirinen alynǵan aqparattarǵa súıene otyryp, men turǵyndardyń bizdiń partııaǵa degen kózqarasy odan saıyn jaqsaryp, partııa múshelerine degen senimniń artqandyǵyn atap ótkim keledi. Elimizdiń túkpir-túkpirinde kóptegen azamattyń «Aýyl» partııasyna ótýge nıet bildirýi – partııamyzdyń artyp kele jatqan abyroıynyń taǵy bir aıǵaǵy. Tek 2015-2020 jyldar aralyǵynda bizdiń partııanyń quramy 52 myń adamǵa artty.
«Aýyl» partııasynyń kadrlyq áleýeti de kúsheıdi. Bizdiń qatarymyzda eńbegimen jetistikke jetken iri kásipker de, qarapaıym sharýa da, aýylsharýashylyq uıymdarynyń, ǵylymı-zertteý ınstıtýttarynyń jetekshileri, qyzmetkerleri, bilikti mamandar, ǵylym doktorlary men qandıdattary da bar. Olardy partııanyń alǵa qoıǵan mindetteri men maqsattaryn júzege asyryp kele jatqan «Aýyldyń» altyn qory» desek te bolady.
Qyrkúıek aıynan bastap «El amanaty» jalpyulttyq saýalnamasyn ótkizýdemiz. Saýalnama el azamattarynan qoǵamdaǵy saıası-áleýmettik, ekonomıkalyq máselelerdi jınaqtap, sheshý joldaryn aıqyndaýǵa baǵyttalǵan. Mundaǵy negizgi maqsatymyz – qoǵamdaǵy ózekti máselelerdi anyqtap, tıisti úkimettik organdarǵa jetkizý, elimizdiń damýy boıynsha turǵyndarmen pikir almasý arqyly qordalanǵan máselelerdi qoǵam eleginen ótkizip, olardy «Aýyl» partııasynyń baǵdarlamasyna engizý. Qazirgi kúnge deıin «El amanaty» saýalnamasyna 130 myńnan astam respondent qatysyp, óz usynystaryn joldady. Saýalnama ınternet arqyly sıfly formatta jáne dástúrli túrde ótkizilýde. Aty aıtyp turǵandaı, azamattarymyzdyń máselelerin ózimizge amanat etip alyp, sol máselelerdi sheshý jolynda partııanyń áleýetin jumyldyramyz. Bir sózben aıtqanda, «El amanaty» partııamyzdy qoǵamnyń naqty máselelerimen aınalysýǵa baǵyttaıtyn basty nusqaýlyq bolmaq.
– Áńgimeńizge rahmet.
Áńgimelesken
Raýan QABIDOLDA,
«Egemen Qazaqstan»
