Esimi ánsúıer qaýymǵa etene tanys ánshi qaltaly kásipker emes. Tamasha talantymen týǵan eline talmaı qyzmet etip júrgen ónerpaz. Osy ýaqytqa deıin sulý sazdy únimen kóp kóńilin baýrap, rýhanı baılyq syılap kelse, bul joly indetti seıiltýge qol ushyn berip otyr.
"Qytaıdan jetkizilgen aqyldy apparat qazirgi zamanǵa saı tehnologııamen jasaqtalǵan. Dene qyzýynyń ólshemin bir sekýndtyń ishinde anyqtaýǵa múmkindigi bar. Eshbir jýý quralynsyz, tozańdandyrý arqyly qoldy zararsyzdandyrý tetigi de bar. Apparattyń ishki dálizine kirgende adamdy basynan aıaǵyna deıin tozańmen dezınfeksııalap shyǵarady. Qazir basqa memleketterde indet qatty dendep barady. Bizdiń oblysta da indet birtindep beleń alyp keledi, jaǵdaı kúrdelene túsip jatqanyn estip, bilip júrmiz. Sondyqtan, shamam jetkenshe osy bir apparatty ákeldim. Eger elim degen qaltaly azamattar osyndaı paıdaly apparatty bilim jáne densaýlyq saqtaý mekemelerine ornatýǵa alyp bergisi kelse, onda men Qytaıdan jetkizip berýge kómektesýge daıynmyn", dedi Tóken Ilııasov áńgimege tartqanymyzda. Atalǵan apparat 2 mıllıon teńge kóleminde turady eken.
Sóz arasynda asqaq daýysty ánshi Kókshe topyraǵyna osydan 18 jyl buryn Qytaıdan kóship kelgendigin aıta ketelik. Abaısha aıtqanda, "sen de bir kirpish dúnıege, ketigin tap ta bar qalan" demekshi, qazirgi qıyn kezeńde eline paıdam tıse degen nıetpen osy aqyldy apparatty satyp áperipotyr. Ánshiniń aıtýyna qaraǵanda, mundaı apparat Qytaıdyń barlyq bilim jáne medısına mekemelerinde jappaı ornatylyp jatyr eken.
Et júregi elim dep soǵatyn ár azamat qysyltaıań kezeńde dál osylaı kómek qolyn sozatyn bolsa, tórtkúl dúnıeni tegis túrshiktirip turǵan indettiń izi suıylar edi.
Kókshetaý qalasy
