QMDB tóraǵasyn aımaq basshysy Berdibek Saparbaev qabyldady. Kezdesý barysynda dinniń ultaralyq kelisimdi nyǵaıtýdaǵy róli týraly jan-jaqty qaýzaldy.
- Biz ortaq kúsh-jigerimizdiń arqasynda qoǵamdaǵy kelisim men tynyshtyqty saqtaı alyp otyrmyz. Biz birlik, tózimdilik jáne meıirimdilik qaǵıdattaryn negizge ala otyryp, barlyq qıyndyqtardy eńseretinimizge senimdimin. Halyqtyń rýhanı tutastyǵyn nyǵaıtýǵa, áleýmettik máselelerdi sheshýge QMDB-nyń óńirdegi fılıaly da aıryqsha atsalysýda. Birlesken jumystar nátıjesinde Qordaı aýdanyndaǵy ahýaldy turaqtandyrý múmkindigine qol jetkizdik. Imamdardyń rotasııalanyp, qazirgi tańda meshitterde ýaǵyzdar qazaq tilinde júrgizilýde, - dedi Berdibek Saparbaev.
Ol «Beıbitshilik pen kelisim» jobasynyń iske asyrý barysy týraly toqtalyp, onyń negizinde aýdandardaǵy qoǵamdyq-saıası ahýalǵa monıtorıng júrgizilip jatqanyn jetkizdi.
Elimizdiń bas múftıi Qordaı aýdanynda "Imamdar úıi" ashylatynyn habarlady. Jańa ortalyqta din qyzmetkerleri úshin biliktilikti arttyrý kýrstary uıymdastyrylatyn bolady. Bul kúni Berdibek Saparbaev pen Naýryzbaı qajy О́tpenov "Hıbatýlla Tarazı" medrese-kolledji jataqhanasynyń ashylý saltanatyna qatysty. Olar jańa ǵımaratty aralap tanysyp, ondaǵy oqý jáne tynyǵý úshin barlyq qolaıly jaǵdaı jasalǵanyn atap ótti. Eki qabatty ǵımaratta barlyǵy 12 jatyn bólme, eki oqý kabıneti, kitaphana, ashana, kir jýatyn, jýynatyn bólmeler jáne monsha ornalasqan. Jataqhana demeýshilik qarajat esebinen boı kótergen.
Búginde medrese-kolledjde 61 stýdent oqıdy desek, olardyń arasynda elimizdiń basqa óńirlerinen kelip bilim alyp jatqandar da bar. Búgingi kúnge deıin olar medrese ǵımaratynda turyp kelgen.
Oblys jurtshylyǵy men musylman qaýymynyń ókilderi aldynda quttyqtaý sóz sóılegen aımaq basshysy 30 jyl boıy QMDB jastardy toleranttylyq negizinde tárbıeleýge, qazaq halqynyń salt-dástúrlerin qurmetteýge erekshe kóńil bólip kele jatqanyn atap ótti. Elimizde dinı bilim alýshylar úshin barlyq jaǵdaı jasalǵan.
- О́tken jyly ımamdar jamaǵatqa elimizdiń musylmandarynyń rýhanı tuǵyrnamasyna aınalǵan "Jeti rýhanı qazyq" qujatyn usyndy. Ol eńbeksúıgishtik, meıirimdilik, patrıotızm sııaqty adamgershilikke úndeıtin qundylyqtarǵa baǵyttalǵan. Dinı qyzmetkerler jastarǵa osy qundylyqtardyń maǵynasyn, konfessııaaralyq dıalog negizderin túsinýge baýlıdy. Qoǵamdaǵy turaqtylyq pen tynyshtyqty qamtamasyz etý arqyly ǵana biz halyqtyń ál-aýqatyn arttyrýǵa múmkindigine qol jetkize alamyz, - dedi oblys ákimi.
Naýryzbaı qajy О́tpenov búginde joǵalǵan dástúrler qaıta jańǵyryp, meshitter boı kóterip, medreseler ashylyp jatqanyn tilge tıek etti.
Oblys ákimi men elimizdiń bas múftıi "Hıbatýlla Tarazı" oblystyq meshitinde "Asyldin" stýdııasynyń, "Ájeler mektebi" klýbynyń jumysymen tanysty.
Tóraıymy Jámılá Jumabaevanyń aıtýynsha, klýb túrli ult ókilderinen quralǵan. Ájeler jas qyzdardy halyqtyq dástúrlerge baýlyp, baqytty ómirdiń qupııasymen bólisip, durys jolǵa tárbıeleıdi.
- Qazaqtar tipti «Anańdy úsh ret Mekkege arqalap aparsań da, qaryzyńnan qutylmaısyń» deıdi. Sizderdiń ómirlik tájirıbelerińiz jas urpaq úshin baǵa jetpes ónegege toly. Sizder ómirde shatasyp, jaza basyp júrgen qyzdarǵa qol ushyn soza alasyzdar, - dedi oblys ákimi ájelerge.
Naýryzbaı qajy О́tpenov olarǵa otbasy ınstıtýtyn damytýǵa qosqan úlesteri úshin alǵys bildirdi.
Aıta ketý kerek, búginde oblysta 358 dinı birlestik tirkelgen desek, onyń ishinde 312 meshit pen 46 shirkeý bar. Alty oblystyq, jeti qalalyq jáne 10 aýdandyq aqparattyq-túsindirý toptarynyń quramyndaǵy teologtar, dintanýshylar, psıholog jáne memlekettik qyzmetkerler tıisti jumystar júrgizýde.
