– Tekserýshiler «Aqjol», Castle, Sultan Hall meıramhanalarynda úılený jáne mereıtoılar ótkizý derekterin tirkedi. Al «Murager» saýda úıinde maska taǵý rejimi saqtalmaıdy. Munda termometrııa joq bolyp shyqty. Sátpaev kóshesindegi «Fýdzı» sýshı barynda qyzmetkerler maskasyz jáne qolǵapsyz qyzmet kórsetedi. «Barmaglot» barynda 30-dan asa kelýshi saǵat 22:00-den keıin de bolǵan. Jumysker kentindegi «Gúldııas» dúkeni saǵat 23:00-den keıin qyzmet kórsetip, shekteý sharalary rejimin buzǵan, – dep habarlady óńirlik kommýnıkasııalar qyzmeti.
Turǵyndardyń meıramhanalarda toı ótkizýine kim múddeli deısiz? Aldymen buǵan meıramhanasy bar kásipkerler múddelilik tanytary daýsyz. Muny olar jaqynda ashyq málim etti. Meıramhana bıznesimen aınalysatyn bir top kásipker oblystyq ákimdiktiń aldyna jınalyp, ózderiniń talabyn jarııa etti. Bul qandaı talap?
Naqtysyn aıtqanda, kásipkerler birinshiden, sanıtarlyq talaptardy saqtaı otyryp, 50 adamǵa deıin qatysatyn toı jasaýǵa ruqsat berýdi suraıdy. Ekinshiden, toıhananyń kommýnaldyq tólemin tóleýge ákimdiktiń kómek kórsetkenin qalaıdy. Toıhana ıelerimen kezdesken oblys ákiminiń orynbasary Erjan Ábilhanovtyń aıtýynsha, qazir kóptegen elde koronavırýstyń ekinshi tolqyny ótip jatyr. Al memleket pen oblystyq ákimdik tarapynan otandyq bıznesti qoldaýǵa kóńil bólinýde.
– Alaıda ár azamattyń densaýlyǵy men qaýipsizdigi mańyzdy ekenin umytpaý kerek. Qaýipti indettiń qateri eskerilip, óńirdegi shaǵyn jáne orta kásipkerlik nysandary úshin birtindep jeńildetý sharalary qolǵa alynýda. Toıhanalar men banket zaldaryna 50 adamǵa deıin qatysatyn sharalardy ótkizýge ruqsat berý máselesi qarastyrylyp jatyr, – dedi Erjan Ábilhanov.
Al oblystyń bas memlekettik sanıtarlyq dárigeriniń ýaqytsha mindetin atqarýshy Amantaı Jumaǵalıevtyń aıtýynsha, qaýipti indetti juqtyrý deregi áli de tirkelip jatqanda adamdar shoǵyrlanatyn mundaı toı-tomalaq ótkizýdiń qaýpi basym bolady. Sol sebepten qaýipti indettiń taralý múmkindigi sekildi máseleniń ekinshi jaǵyna kóńil aýdarý kerek.
– Kezdesýde aıtylǵan máseleniń bárin hattamaǵa túsirdik. Soǵan sáıkes máseleni oń sheshý joldaryn qarastyramyz. Árıne, bul – bir kúnde sheshiletin másele emes. Buryn toıhana ıeleri ǵımarattyń jaryǵyna tólem tólep otyrsa, endi jylytý maýsymy bastaldy. Olar tólemderi kóbeıgenin aıtyp otyr. Sondyqtan kásipkerlerdiń usynysyn eskerip, karantın kezindegi talaptardy saqtaı otyryp, eki jaqqa da tıimdi tusyn qarastyramyz, – deıdi oblystyq kásipkerlik jáne ındýstrııalyq-ınnovasııalyq damý basqarmasy basshysynyń mindetin ýaqytsha atqarýshy Ábdýahıt Ábishev.
Ras, birneshe aılap, kásipsiz, tabyssyz otyrý ońaı emes. Degenmen, meıramhanaǵa birneshe adamdy topyrlatyp kirgizip, toı ótkizýden túsken tabys tabý qymbat pa? Álde aınalańdaǵy adamdardyń, aǵaıyn-týystyń densaýlyǵy qymbat pa? Teginde jaqynyńa janashyr bolýdy qalaı túsinesiz?
Atyraý oblysy
