Qyzyljar óńirinde de jergilikti mańyzy bar joldardyń sapasy syn kótermeıdi. Olardyń 43 paıyzynyń tozyǵy jetken. Sonyń saldarynan qaýipsizdikti qamtamasyz etý sharalary qatań saqtala bermeıdi. Jyl basynan beri 300-den astam jol-kólik oqıǵasy oryn alyp, 42 adam kóz jumǵan.
Qyzyljar óńirinde de jergilikti mańyzy bar joldardyń sapasy syn kótermeıdi. Olardyń 43 paıyzynyń tozyǵy jetken. Sonyń saldarynan qaýipsizdikti qamtamasyz etý sharalary qatań saqtala bermeıdi. Jyl basynan beri 300-den astam jol-kólik oqıǵasy oryn alyp, 42 adam kóz jumǵan.
Kólik jáne kommýnıkasııa mınıstri Asqar Jumaǵalıev pen oblys ákimi Samat Eskendirovtiń qatysýymen ótken keńeıtilgen keńeste oblys pen aýdandar qaraýyna jatatyn tas joldardy damytý baǵdarlamasynyń oryndalý barysy men aldaǵy mindetter jan-jaqty talqylandy. Oblys avtomobıl joldarynyń uzyndyǵy boıynsha elimizde úshinshi oryn alsa, 4 myńdaı shaqyrymy qanaǵattanǵysyz kúıde. Bul maqsat úshin aımaqtyq qazynadan kelesi jyly 4,5 mıllıard teńge qarastyrylǵan. Bul kórsetkish 2012 jylǵa qaraǵanda 1,8 esege kóp. Mınıstr óz sózinde sapa máselesine, jańa tehnologııalardy keńinen paıdalanýǵa úlken ekpin túsirdi. Bıyl 3 zamanaýı jyljymaly zerthana satyp alynǵanyn, kelesi jyly taǵy 8-i jetkiziletinin, odan ári barlyq óńirler qamtylatynyn jetkizdi. Munyń ózi jumystyń josparly atqarylýyna múmkindik beredi. Tenderdi utyp ala tura, óz isterine saldyr-salaq qaraıtyn qurylys kompanııalaryna qatań jaza qoldanýdy, tipti, negizgi jumystan shettetýge deıin shara qoldanýdy tapsyrdy.
Samat Saparbekuly Úkimettiń keńeıtilgen otyrysynda Elbasy jergilikti mańyzy bar joldardy damytýdaǵy olqylyqtardy atap kórsetkenin aıta kelip, bıýdjetten bólinetin qarajattyń kóbeıgenin, sapaǵa basty nazar aýdarylǵanyn, Astana – Petropavl jáne Kellerovka – Taıynsha – Chkalov baǵyttarynda eki jobanyń oıdaǵydaı júzege asyp jatqanyn atap kórsetti.
Jıynda birqatar vedomstvo jetekshileriniń esebi tyńdaldy. Oblystyq ishki ister departamentiniń bastyǵy Aqan Qajkenov óńir joldaryndaǵy qaýipsizdikti qamtamasyz etý boıynsha atqaryp jatqan sharalarmen tanystyrdy. Jol apaty 8 paıyzǵa, adam shyǵyny 27 paıyzǵa kemigenine qaramastan jaǵdaı kúrdeli kúıinde qalyp otyr. Jol-kólik apattarynyń 80 paıyzy mas júrgizýshilerdiń kinásinen jasalady. «QazAvtoJol» UK» AQ basqarma tóraǵasy Erik Sultanovtyń aıtýynsha, óńirimizdegi 375 shaqyrym joldyń sapasy respýblıkalyq kórsetkishten de tómen. Ústimizdegi jyly jergilikti jerdegi respýblıkalyq mańyzy bar jol jelilerin damytýǵa 3 mıllıard teńgeden astam qarjy tartylmaq. Petropavl – Kókshetaý qalalary baǵytyndaǵy joldardy jańǵyrtý jumystaryn 2015 jylǵa deıin aıaqtaý kózdelgen. Avtomobıl joldary komıteti tóraǵasynyń orynbasary Amangeldi Bekov jergilikti jelilerdi nyǵaıtýǵa ústimizdegi jyly 1,5 mıllıard teńge jumsalatynyn, aldaǵy jyly 1 mıllıard teńgege molaıatynyn kóldeneń tartty.
Aımaq basshysy jyl ótken saıyn jergilikti maqsatty qarjy mólsheriniń ulǵaıa túskenin, onyń ústine astyqty ólkeniń mańyzdylyǵyn eskere otyryp, respýblıkalyq transferttiń de mólsheri kóbeıse degen tilegin jetkizdi.
О́mir ESQALI,
«Egemen Qazaqstan».
Soltústik Qazaqstan oblysy.
