Qyr astynan mysyqtabandap kele jatqan qys lebi sezilgen saıyn kommýnaldyq sharýashylyq mamandary qolda bar tehnıkalarynyń kem-ketigin jóndep, aq qarmen alysýǵa daıyndyq jumystaryn shırata túsýde. Negizinde oblys ortalyǵynyń kók muz ben aq qardan tazalyǵyna eki seriktestik jaýap beredi. Onyń biri «Zeren plıýs - 2006» kásiporny.
Kásiporyn ótken jyldardyń sabaǵyn eskere otyryp, búginnen qam jasaýda. Bul oraıda, tehnıkanyń keıbiri eskirgendigin, jańartýdy qajet etetindigin aıta ketýge tıistimiz.
– Seriktestikte 80-ge jýyq adam jumys isteıdi. 40-tan astam tehnıkamyz bar. Jumysshylardyń barlyǵy qajetti qysqy kıimdermen qamtamasyz etilgen. Bıyl jańadan tehnıka alynǵan joq. Keler jyly birqatar tehnıka alamyz dep mejelep otyrmyz,–deıdi seriktestik jetekshisiniń mindetin atqarýshysy Dýlat Ámirov.
Kókshe qysynyń qatal ekendigin árkim de jaqsy biledi. Sondyqtan, osy bastan jaýapty kásiporyndarda tıisti sharalar júzege asyrylýda.
– Eki kásiporynmen tıisti kelisim-shart jasaldy. 89 mln teńge qarajat bólindi. Eger qys qatty bolsa, «Kókshe jylý» men «Kókshetaý sý arnasy» kásiporyndarynyń tehnıkalary da jumyldyrylady,–deıdi Kókshetaý qalasy ákiminiń orynbasary Erbol Tóleýov.
«Kókshetaý sý arnasy» kásiporny da qysqa naýqanǵa myqtap daıyndalýda. Bir aıta keterligi, materıaldyq-tehnıkalyq bazasyn jańǵyrtyp, birqatar zamanaýı qondyrǵylar satyp alǵan. Olar qala boıynsha 60 myń tutynýshyǵa qyzmet kórsetedi.
– Bizde 78 tehnıka bar. Olardyń 69-y jumysqa tolyq daıyn. Barlyq tehnıkalar arnaıy tekseristen ótti. Bıyl dızeldi generator satyp aldyq. О́zge de qural-jabdyqtardy jóndep, sapqa qoıdyq,–deıdi «Kókshetaý sý arnasy» kásipornynyń qyzmetkeri Ivan Danchev.
Oblysta qysqy maýsymda qar tazalaýǵa 376 tehnıka, 600-den astam adam jumyldyrylmaq. Qazir qys synaǵyna tótep berý úshin laıyqty qam jasalýda.
Kókshetaý qalasy
