Qoıylym eń aldymen kórermenderdiń ózine Shámshi ánderin oryndatýdan bastaldy. Al dúıim qazaq dalasynda, ásirese eresek, egde qaýymnyń arasynda Shámshiniń ánin shyrqamaıtyn, qulaqqa sińgen tanys áýen estilgende, tosyrqap turyp qalatyn adam bar ma, sirá? Sezim qylyn shertip, júrekti lúpil qaqqyzatyn saǵynyshqa toly lırıkalyq ánderdiń bir-bir shýmaǵyn ár kórermen júrgizýshi ártispen birge shabyttana shyrqap, shalqyǵan kóńil tek shymyldyq ashylǵanda ǵana sabyr taýyp, basylǵandaı boldy. «Aq bantık», «Qaıyqta», «Ana týraly jyr», «Arys jaǵasynda», «Keshikpeı kelem dep eń», «О́mir-ózen» – kompozıtordyń qaı ániniń de kompozısııalyq qurylymy, taqyryby sahnalyq qoıylymǵa óz-ózinen suranyp turǵandaı. Rejısser Erkebulan Qabdyl Shámshiniń halyq arasyna keń taraǵan ánderiniń mazmunyn bir arnaǵa toǵystyryp, qos ǵashyqtyń mahabbat hıkaıasyna negizdegen. Al spektakldiń sýretshisi – Altynaı Júsipáli.
Qýyrshaq teatrynyń aıadaı zaly áp-sátte án padıshasynyń ádemi álemine aınalyp shyǵa keldi. Rejısser E.Qabdyldyń jas kórermenge Shámshi ánderiniń ómirsheńdigin, talant tabıǵatyna jasyrynǵan syrdy túsindirgisi kelgenin, kompozıtor ánderin nasıhattaýdy maqsat tutqanyn ańǵarmaý múmkin emes. Qazaq óneriniń tutas bir dáýirin órkendetýge aıyryqsha úlesin qosqan án serkesiniń mýzykalyq murasy búgingi jas balalarǵa jat bolmaı, kerisinshe, júreginen oryn taýyp jaqyndaı túsýi úshin sahnalyq tásilderdi keńinen paıdalanǵan. Án tabıǵatyna saı, obrazǵa laıyq, óte sándi tigilgen qýyrshaqtardyń qatysýymen oryndalatyn árbir án jandy áser týǵyzady. Ulttyq qunary basym, án ózeginen ushyp shyqqan anaǵa, dosqa, týǵan jerge degen súıispenshilik, meıirim, syılastyq, izgilik sezimi bala boıynda jańadan qalyptasyp kele jatqan adamgershilik qasıettermen ushtasyp, otanshyl azamat bolyp ómir súrýge jeteleıtini sózsiz. «Eń basty maqsatymyz – Shámshi ánderin óskeleń urpaqqa nasıhattap, ulttyq qundylyqtardy dáripteý. Tól ónerin tanyp ósken balanyń keleshekte óz eli men jerine degen mahabbaty mol bolady», deıdi Erkebulan Qabdyl.
Balalarǵa Shámshi Qaldaıaqovtyń ánderin tanystyrý qoıylymy sahnadaǵy sátti qadamnyń biri. Spektaklde Mádenıet salasynyń úzdigi Maqsat Kamalov jáne «Sahnager» ulttyq teatr baıqaýy «Úmit» nomınasııasynyń ıegeri Araı Saqtaǵanova eki jastyń mahabbaty lınııasynda oınasa, Araılym Baıyrbekova, Rýslan Ábý, Shoqan Qulnazarov, Baqytjan Kaıýov, Ásem Chaıalkanova, Saltanat Tórebaı, Ǵalym Amangeldiuly, Gúlbarshyn О́nimbaı syndy jas ártister jarty ǵasyr boıy qalany da, dalany da terbetip kele jatqan ásem ánderdi tamyljyta oryndady.
Aıta ketken jón, qýyrshaq teatry buǵan deıin aqyn Muqaǵalı Maqataevtyń shyǵarmashylyǵyn arqaý etken «Men dep oıla...» atty qoıylymdy sahnalaǵan. Qazaqtyń taǵy bir óner ıesi Shámshi Qaldaıaqovqa arnalǵan kezekti qoıylym – osy týyndynyń zańdy jalǵasy.
ALMATY
