Jıynda Mádenıet jáne sport mınıstri Aqtoty Raıymqulova, Bilim jáne ǵylym mınıstri Ashat Aımaǵambetov, lıngvıst-ǵalymdar men sarapshylardyń qazaq tili álipbıin latyn grafıkasyna kóshirý jumystarynyń nátıjesi boıynsha baıandama jasady.
Aqtoty Raıymqulova ǵylymı turǵydan zerdelengen álipbı jobasyn usyndy. Jetildirilgen álipbı halqymyzdyń jazý dástúrinde ornyqqan «bir dybys – bir árip» prınsıpine tolyq sáıkes keledi, dıgraftar, ıaǵnı bir dybysty eki nemese odan kóp tańbamen belgileý prınsıpi qoldanylmaıdy. Bul álipbı jobasynda qazaq tiliniń 28 dybysy tolyq qamtylǵan. 
Bilim jáne ǵylym mınıstri Ashat Aımaǵambetov jańa álipbıdiń mektepter men bilim berý uıymdaryna júıeli túrde engizýdiń aldyn ala daıyndyq kezeńderi, ustazdardy, oqýlyqtardy daıarlaý men ádistemelik quraldardy jańartý máselesi boıynsha aqparat berdi. Onyń aıtýynsha, barlyq sharalar keshendi túrde kezeń-kezeńimen, aldyn ala tolyq daıyndyq júrgizilgennen keıin uıymdastyrylatyn bolady.
Memleket basshysy keńeste qaralǵan máseleler boıynsha birqatar tapsyrmalar berdi. Atap aıtqanda, álipbı jobasy ǵalymdarmen birge tolyq zerdelenip, Úkimet janyndaǵy Qazaq tili álipbıin latyn grafıkasyna kóshirý jónindegi Ulttyq komıssııanyń kezekti otyrysynyń qaraýyna engizýdi tapsyrdy.
Atalǵan komıssııa otyrysynyń qorytyndysy shyqqannan keıin Úkimet jetildirilgen álipbıdi bekitý týraly Jarlyq jobasyn Prezıdent Ákimshiligine engizýi tıis.
– Jańa álipbı bastamasy – bul kúrdeli ári shetin másele ekenin umytpaǵan jón. Jańa grafıkany engizý bir kúnde ıa bolmasa, tipti, bir jylda iske asa qoıatyn jumys emes. Áıtpese, asyǵystyq búkil mádenıetimizge jáne tarıhı bolmysymyzǵa zııan keltirýi múmkin. Másele – kırıllısadan latyn álipbıine aýdarýda emes, bul qazaq tiliniń aýqymdy reformasy degen sóz. Qarjy máselesin de eskerýimiz kerek. Latyn álipbıin engizý jumysy birtindep júzege asýy kerek. Negizinde, bul grafıka jas urpaqqa arnalǵan dep aıtýǵa bolady. Onyń ıgiligin, eń aldymen, solar kórýi kerek. Sondyqtan, bul úrdis josparly túrde, birtindep iske asyrylýy qajet, – dedi Memleket basshysy.
Qasym-Jomart Toqaev Mádenıet jáne sport, Bilim jáne ǵylym, Aqparat jáne qoǵamdyq damý mınıstrlikterine ǵalymdardy, sarapshylar men zııaly qaýym ókilderin tarta otyryp, jańa álipbıdi halyqqa jan-jaqty túsindirýge baǵyttalǵan keshendi aqparattyq jumys júrgizý týraly tapsyrma berdi.
