Mádenıet jáne sport mınıstrligi baspasóz qyzmetiniń habarlaýynsha, The New York Times-ta jarııalanǵan materıal álemdegi eń tanymal ári oqyrmany kóp ondaǵan onlaın-basylymdarǵa taraldy. Olardyń ishinde: Huffington Post, The Guardian, Insider.com, Forbes.com, Yahoo.com, CNN, BBC, Daily Mail jáne basqa tilderdegi kóptegen basylymdar bar. «Kazakhstan. Very Nice» beınerolıgi YouTube platformasynda qazirdiń ózinde 900 myńǵa jýyq qaraldy. Jeli qoldanýshylary, sondaı-aq kommýnıkasııa jáne týrızm salasyndaǵy kásibı mamandar naýqannyń ózektiligi men biregeıligin atap ótti. Álemniń bedeldi joǵary oqý oryndarynyń biri – New York University jarnama naýqanyn jasaýshylardan «Týrızmdi basqarý» baǵdarlamasy boıynsha oqyp jatqan magıstranttarǵa dáris ótkizip berýdi suraǵan bolatyn.
Osy rette Kazakh Tourism UK AQ Basqarma tóraǵasynyń orynbasary Qaırat Sadýaqasov «Týrdestınasııalardyń marketıngi» páni boıynsha «Fılm – týrızmniń destınasııalardy ilgeriletýdegi róli» atty taqyrypta dáris oqydy. «Bul qazaqstandyq týrızm tarıhyndaǵy eń jyldam uıymdastyrylǵan jáne eń jeńisti naýqan. Sıtýasııalyq marketıng sátti júzege asyrylýy, ásirese týrızmde, birqatar faktorlarǵa baılanysty. Bul jyldam sheshim qabyldaý, jete oılastyrylǵan tujyrymdama jáne jarnama mánmátininde qoıylatyn messedj», dedi Q.Sadýaqasov.
Sóz sońynda spıker naýqannyń basty maqsaty AQSh pen Eýropadan keletin saıahatshylar arasynda Qazaqstandy tanymal etý ekenin atap kórsetti.
