– Syrtqy naryqtardaǵy jaǵdaı sııaqty, ótken aıda teńge serpini ártúrli baǵytta boldy, qubylmalyq ortasha sıpatta boldy. Alaıda, qazannyń sońǵy kúnderinde energııa tasyǵyshtar baǵasynyń kúrt tómendeýi aıasynda teńgege aıtarlyqtaı qysym tústi. Aıdyń sońǵy aptasynda munaı qunynyń tómendeýi qarqyndy boldy, jalpy 2020 jylǵy sáýirden bastap barynsha nashar boldy, baǵa 10,3%-ǵa tómendedi. Osy kezeńde valıýta naryǵynda valıýta usynysynyń kúrt tómendeýi jáne ótimdiliktiń tómendigi baıqaldy. Osyǵan baılanysty Ulttyq bank valıýtalyq ıntervensııa júrgizdi, onyń kólemi 91,3 mln dollardy qurady. Ulttyq banktiń qatysýy jalpy naryqtyq serpinge kedergi keltirmedi, – dedi Álııa Moldabekova.
Valıýta naryǵy úshin qolaıly faktorlardyń ishinde memlekettik baǵaly qaǵazdar naryǵyna beırezıdentterdiń kelýi qaıta bastalǵanyn atap ótý qajet. Qazanda onyń kólemi 71,8 mlrd teńgeni nemese shamamen 167 mln dollardy qurady.
Ulttyq bank tóraǵasynyń orynbasary eldegi altyn-valıýtalyq aktıvterdiń jaǵdaıy men altyn naryǵyndaǵy jaı-kúıine de toqtaldy. Onyń aıtýynsha, qazan aıynda altynnyń arzandaý traektorııasy jalǵasyp, bir aıda ýnsııasy 1883,4 dollardan 1875,8 dollarǵa nemese 0,4%-ǵa tómendedi.
– Baǵaly metaldar naryǵyndaǵy negizgi anyqtaýshy faktor AQSh-taǵy saılaýǵa qatysty belgisizdik boldy. Altyn baǵasynyń tómendeýi is júzinde Ulttyq banktiń altyn portfeline áser etpegenin aıta ketken jón, óıtkeni ol basym quqyqty iske asyrý sheńberinde otandyq altyndy satyp alýmen rettelgen bolatyn. Qazannyń sońynda Ulttyq banktiń altyn portfeli 23,2 mlrd dollardy qurady, – dedi ol.
Degenmen, aldyn ala derekter boıynsha altyn-valıýta aktıvteri bir aıda 200 mln dollarǵa qysqaryp, qazannyń sońynda 33,6 mlrd dollardy qurady. Onyń tómendeýi negizinen shamamen 90 mln dollar kóleminde memlekettik boryshty tóleýge jáne 91,3 mln dollar kóleminde valıýtalyq ıntervensııa júrgizýge baılanysty boldy.
