Onyń aıtýynsha, biraz jyl bala tárbıesimen úıde otyrýǵa týra kelipti. Sol kezde bos otyrmaı, «hanshaıym maqpaly» dep atalatyn matadan kórpe tigýdi úırenipti. Oǵan turǵyndardan ulttyq naqyshpen bederlengen kórpe-kópshikke tapsyrystyń kóbeıýi sebep bolypty. Osylaısha, tórt jyl buryn óziniń kásibin ashýǵa qadam jasady.
– Bıyl ulttyq oıý-órnekter salynǵan qyz jasaýy men kıim-keshek, túrli buıymdardy sándep tigetin otbasylyq isimdi keńeıtýdi kózdedim. Tapsyrys burynǵydan da kóbeıdi. Ásirese qyz jasaýyna suranys artyp otyr. Shaǵyn tigin sheberhanasyn keńeıtip, qyzmetkerlerdiń sanyn arttyrdyq. Naýryz aıynan beri Atyraý qalasynyń irgesindegi Kókarna aýylynda bos turǵan toıhanany jalǵa alyp, jumysymyzdy jandandyrdyq, – deıdi Meıramgúl Imanǵalıeva.
Qazir onyń tigin sheberhanasynda 25 adam jumys isteıdi. Aıyna 100-150 dana toptamaǵa tapsyrys túsip tur. Sheberhanada tiginshiler tegin túski aspen qamtylyp otyr. Sondaı-aq tiginshilerge 150 myń teńgege deıin jalaqy tóleıdi.
– Sheberhanaǵa jumysqa ornalasqanyma kóp bolǵan joq. Jumysym ózime unaıdy. Ulttyq naqyshta is tigýdiń ózindik ereksheligi bar ǵoı. Shyn nıeti bar adamǵa bul qıyn emes eken, – deıdi jas tiginshilerdiń biri Aıym Jaqsylyqova.
Atyraý oblysy
