"Shanhaı Yntymaqtastyq uıymy óziniń qajettiligi men ómirsheńdigin dáleldeı otyryp, shtatty rejimde jumysyn jalǵastyryp keledi. Biz búgin bekitýdi kózdep otyrǵan qujattar paketi – sonyń jarqyn dáleli. Bul qujattardyń bári de Shanhaı Yntymaqtastyq Uıymynyń abyroıyn bekemdeı túsýi jolynda jumys atqaratynyna senimdimin", dedi Qasym-Jomart Toqaev.
Qazaqstan Prezıdenti sońǵy 20 jylda ShYU-ǵa múshe memleketter úlken joldan ótkenin atap ótti.
"ShYU – eń tabysty halyqaralyq uıymdardyń birine aınaldy. Bul uıym jer jahannyń tórtten bir bóligin alyp jatqan aýmaqta senim men seriktestikti nyǵaıta biletin tıimdi qural retinde qaralady. Bul yntymaqtastyqqa múshe memleketterde álem halqynyń 40 paıyzy turady, álemdik JIО́-niń 40 paıyzy – osy uıymǵa múshe memleketterge tıesili. Sonymen qatar ShYU jaýapty aımaqtaǵy jaǵdaı óte kúrdeli bolyp otyr, ári ol tereń transformasııadan ótýde. Koronavırýs álemdik qaýymdastyqtar úshin qatań synaq bola otyryp, halyqaralyq yntymaqtastyqtyń kemshin tustaryn kórsetip berdi. Pandemııa jahandyq derjavalardyń arasyndaǵy senim daǵdarysyn kúrdelendirip jiberdi. Aldyn alý dıplomatııasy men qaqtyǵystardy retteýdiń qazirgi mehanızmderi aıtarlyqtaı irkilip qaldy. Qaýipsizdik máseleleri boıynsha qater artyp barady. Onyń ishinde terrorızm, qarýlaný básekesi, ártúrli gıbrıdti soǵystar, klımattyń ózgerýi bar", dedi Qasym-Jomart Toqaev.
