Kúmis júldege kúres qyzyp tur

Almatylyq komanda el birin­shiliginde mıssııasyn oryndap qoıǵan soń, bas bapker Alekseı Shpılevskıı qalǵan oıyndarda alańǵa qarsylastarǵa upaı syılaý úshin emes, meıilinshe barlyq oıynda jeńiske jetý úshin shyǵamyz degen bolatyn. Dese de «Qaırat» bul týrda «Qaısarmen» kúsh synasyp, tegeýrindi qarsylyqqa tap boldy. Negizgi quramnyń birqatar oıynshysyna demalys berip, jasyl alańǵa qosalqy quramdaǵy fýtbolshylaryn shyǵarǵan alma­tylyq ujym qorǵaýshy Sergeı Keıler men jartylaı qorǵaýshy Konrad Vrjeshınskııdiń soqqan goldarynyń arqasynda kezdesýdiń 70-mınýtyna deıin 2:0 esebimen alda turǵan-dy. Oıynnyń 70-mınýtynda «Qaısardyń» surmergeni Elgýdja Lobjanıdze gol soǵyp, esep aıyrmasyn qysqartty. 89-mınýtta Ivan Graf mergendigimen kózge túsip, koman­dasyna bir upaı syılady. Keıingi úsh oıynda jeńilis tapqan «Qaısar» uzaq kúttirgen bir upaıyna qol jetkizdi. Al negizgi quramnyń fýtbolshylarynsyz, eń bas­tysy, Vagner Lavsyz oına­ǵan chempıondar qolda turǵan 3 upaıynan aıyrylyp qaldy. «Qaırattyń» týrnır kestesinde 45 upaımen birinshi orynda qalǵany aıtpasa da túsinikti shyǵar. Al «Qaısar» 21 upaımen besinshi orynǵa kóterildi.

 «Taraz» ben «Shahter» komandalary arasynda ótken oıynnyń úshinshi mınýtynda «Taraz» shabýylshysy Serj Nıýadzı óz aıyp alańynda qolmen oınaǵany úshin qyzyl qaǵaz alyp, alańnan qýylǵannan keıin jáne «kenshiler» komandasynyń shabýylshysy Arsen Hýbýlov 11 metrlik aıyp dobyn sátti oryndaǵan soń bul básekede qaı klýbtyń jeńiske jetetini belgili boldy. Birinshi taımnyń 28-mınýtynda dál osy Hýbýlov dýbl avtory atandy. Al ulttyq quramaǵa shaqyrtý alǵan «Taraz» qaqpashysy Muham­medjan Seısen 40-mınýtta óz qaqpasyna gol soǵyp aldy.

Ekinshi taımda úsh gol jáne bir oıynshy basymdyǵymen alda bolǵan «Shahter» biraz erkinsı bastady. Sonyń saldarynan 73-mınýtta «Taraz» klýbynyń qosal­qy quramynan alańǵa shyq­qan Abylaıhan Jumabek kózge tússe, araǵa bir mınýt salyp Tonı Sılva óz komandasynyń ekinshi golyn soqty. Match sońyna deıin «Taraz» klýbynyń gol soǵatyn birneshe múmkindigi bolǵanymen, tıimdi paıdalana almady. Qorytyndy esep – 4:2. Bul osy týrdaǵy eń nátıjeli oıyn boldy. «Shahter» osy jeńistiń arqasynda 23 upaımen 5-orynǵa kóterildi. «Taraz» 17 upaımen 8-orynda tur.

Kúmis júldeden úmitker klýb­tyń biri – Qostanaıdyń «To­byly» bul týrda týrnır keste­sinde tómengi oryndarǵa jaı­ǵasqan Petropavldyń «Qyzyl­jar» komandasymen kezdesip, tartysty ótken oıynda 1:0 esebimen basym tústi. Kezdesýdegi jalǵyz ári jeńisti goldy qorǵaýshy Temirlan Erlanov soqty. «Tobyl» aýtsaıder komandany bir dop aıyrmashylyǵymen áreń jeńse de, bastysy, mańyzdy úsh upaıyna qol jetkizdi. Sóıtip týrnır kestesinde ekinshi orynǵa kóterilip, úshinshi orynda turǵan «Astanadan» bes upaıǵa ozyp ketti. Biraq elor­dalyqtardyń bir oıyny kem. Osy­laısha chempıonattaǵy ekinshi oryn úshin tartys kúsheıe tústi. 16 upaıy bar «Qyzyljar» 9-orynǵa jaıǵasty.

Týrdyń sońǵy oıynynda «Oqjetpes» klýby Taldyqor­ǵan­nyń «Jetisý» komandasynan jeńilip, týrnır kestesindegi jaǵdaıyn odan ári nasharlatyp aldy. 11 upaımen 11-orynda kele jatqan kókshe­taýlyqtardyń bir saty joǵarylaýyna ońtaıly sát týǵan edi. Alaıda 10-orynda turǵan «Kaspııdiń» bul týr­daǵy demalysyn sátti paıdalana almaı, qaýipti aımaqta qalyp qoıdy. Kezdesýdegi jalǵyz ári jeńis golyn oıynnyń 21-mınýtynda «Jetisý» oıynshysy Nenad Adamovıch soqty. Úsh upaı enshilegen «Jetisý» týrnır kestesinde 22 upaımen 6-orynǵa kóterildi.

Chempıonatta baq synap jatqan komandalar qysqa merzimdi úzilis­ke shyqty. О́ıtkeni osy aptada ulttyq quramalar «Ulttar lı­ga­sy» aıasyndaǵy sońǵy týr oıyn­daryn ótki­zedi. S dıvızıonynda óner kórsetetin Qazaq­stan qu­ra­masy 15 qara­shada syrt alań­da Albanııamen, 18 qarashada Almatynyń Ortalyq stadıonynda Lıtva fýtbolshylarymen kezdesedi. Albanııa quramasymen ótetin oıyn­ǵa deıin jerlesterimiz búgin Podgorısada Cherno­go­­rııamen joldastyq match ótkizedi.

Sonymen qatar ish­ki bi­­rin­­­­shi­­lik­tiń 18-týr oıyndarynan keıin Qazaqstan kásip­qoı fýtbol lıgasy chem­pıonattaǵy sońǵy tórt týrynyń kún­tizbesin jarııalady. Lıga ákimshiligi týrnırge qa­tysýshy komandalardyń qol­daýy­men 4 týrdyń oıyndaryn 10 kún ishinde ótkizýge sheshim qabyl­daǵanyn málimdedi. Oıyn­dar kestesiniń tyǵyzdyǵyna baılanysty endi komandalar týrdyń barlyq kezdesýin bir kúnde, keı kezderi bir ýaqyt­ta ótkizýge máj­búr. Kezdesýlerdiń bir bóligi QAZSPORT telear­nasynyń tike­leı efırinde kórsetilse, ekinshi bóligin telear­nanyń qazsporttv.kz resmı saıtynda tikeleı efırde kórsetý josparlanǵan.